1 Idweř ij n umenɣi jar taddart n Cawul d taddart n Dawud i ikkin aṭṭas. Dawud idweř yarenni di jjhed u inni n taddart n Cawul gguren arexxun.

2 Di Ḥabrun ttwarwen-dd i Dawud iḥenjiren. Amenzu nnes Amnun, n Axinuɛam Tayazraɛilit. ^□  ■   3 Wiss tnayen nnes Kil’ab, n Abijayil, tamɣart n Nabal, Akarmali, wiss třata Abcalum, mmis n Maɛka, yeǧis n Talmay, ajeǧid n Jacur, ^□   4 wiss arebɛa Aduniya, mmis n Hajjit, wiss xemsa Cafaṭya, mmis n Abiṭal, 5 u wiss setta Yitraɛam, n Ɛajla, tamɣart n Dawud. Ina ttwarwen-dd ɣar Dawud di Ḥabrun.

6 Min ikka umenɣi jar taddart n Cawul d taddart n Dawud, imsar, aqa Abnir issemɣar tizemmar nnes di taddart n Cawul. 7 Cawul tuɣa ɣares ict n tayya, ttřaɣan as Riṣfa. Nettat tuɣa-tt d yeǧis n Ayya. Uca inna Icbucat i Abnir: “Mayemmi tudfed ɣar tayya n baba?” ^■   8 Abnir iffugem x wawařen n Ic-Bucat, inna: “Ma necc d ijj n uzeǧif n weqzin i iqqnen ɣar Yahuda? Necc d wenni isscanen ass-a tamexsiwt inu icewwaren i taddart n Cawul, babac, u i yaytmas u i imeddukkař nnes, d wenni war cek ijjin ad tewḍiḍ deg ifassen n Dawud? Uca řexxu, x řmuɛṣiyyet ak-d ict n temɣart, texsed ad xafi tɛeyyared? 9 Ejj AREBBI ad igg ak-d Abnir ta d ta uca ad yarni ɛad ktar zzayes! Am mammec ijjuǧ SIDI i Dawud, ammu i zzayes ɣa ggeɣ

10 umi i ɣa sseɛduɣ tageldit n taddart n Cawul uca ad ssmetneɣ řɛarc n Dawud x Israil u x Yahuda, zi Dan ɣares ař Bi’r-Sebɛa.”

11 Netta war izemmar x temwarrit i Abnir, maɣar netta tuɣa iggʷed zzayes.

12 Xenni issekk Abnir ireqqasen di ṭṭweɛ n yixef nnes ɣar Dawud, inna: “Wi i yiřan tammurt?” Inna ɛawed: “Egg akidi řɛahd nnek, xzar, ad ac wceɣ afus ḥima marra Israil ad ɣarek dd-inneḍ.”

13 U netta inna: “Mliḥ, necc ad ggeɣ ijj n řɛahd akidek, maca mɣir ict n tmesřact ad ac tt ttareɣ uca ad ac iniɣ: ‘Cek war tẓarred udem inu, mɣir mařa cek ad tawyed da Mixal, yeǧis n Cawul, d amezwaru xmi dd ɣa tased ḥima ad tẓared udem inu.’ ”

14 Xenni issekk Dawud ireqqasen ɣar Ic-Bucat, mmis n Cawul, inna: “Ewc ayi-dd tamɣart inu Mixal, tenni i dd-iwyeɣ s mya n řeɛdařeyyat n Ifilisṭiniyyen s wexḍab n tesřit!” ^■  

15 Ic-Bucat issekk ireqqasen uca ikkes i-tt x weryaz nnes, x Falṭiyil, mmis n Layic. ^■  

16 Aryaz nnes yuyur akides ɣares ař Baḥurin, yusa-dd ittru awarni as. Xenni inna as Abnir: “Uyur, ɛqeb!” Uca iɛqeb netta.

17 Tuɣa issiweř Abnir x imɣaren n Israil, inna: “Aṭṭas zeg wami kenniw texsem Dawud ad yiři d ajeǧid xawem.

18 Řexxu ggem t, maɣar SIDI issiweř ak-d Dawud, inna: ‘S ufus n Dawud, amsexxar inu, ad fekkeɣ řgens inu Israil zeg ufus n Ifilisṭiniyyen u zeg ufus n marra řɛedyan nsen.’ ”

19 Issiweř Abnir uřa deg imezzuɣen n ayt n Binyamin. Xenni yuyur Abnir ɣar Ḥabrun, ḥima ad issiweř deg imezzuɣen n Dawud x marra min iǧan d lemliḥ di tiṭṭawin n Israil u di tiṭṭawin n taddart n Binyamin.

20 Uca yusa-dd Abnir ɣar Dawud di Ḥabrun, u tuɣa ɛicrin n yeryazen akides. Dawud igga ijj n umensi i Abnir d yeryazen i kides iǧan. 21 Xenni inna Abnir i Dawud: “Necc ad kkarɣ ad ṭṭfeɣ abrid ad yarweɣ marra Israil ɣar sidi inu, ajeǧid, ḥima nitni ad ggen akidek ijj n řɛahd u cek ad tiřid d ajeǧid x marra min immeẓri řeɛmar nnek.” S uya ijja Dawud Abnir ad yuyur di řehna.

22 Uca xzar, imsexxaren n Dawud d Yuwab ɛeqben-dd zeg ijj n usafar n ukecceḍ uca nitni iwyen akidsen ict n tkeccaḍt d tameqqrant. Abnir tuɣa war iǧi ɛad ɣar Dawud di Ḥabrun, maɣar Dawud tuɣa ijja i-t ad yuyur di řehna. 23 Řami dd-yiweḍ Yuwab d marra řɛeskar nni ɣares, ɛawden ca i Yuwab, nnan: “Abnir, mmis n Nir, yusa-dd ɣar ujeǧid u netta ijja i-t ad yuyur uca xenni yuyur Abnir di řehna.” 24 Xenni yuyur Yuwab ɣar ujeǧid, inna as: “Min teggid? Aqa Abnir yusa-dd ɣarek. Mayemmi i t tessekked uca xenni yuyur netta amenni waha? 25 Cek tessned maca Abnir, mmis n Nir. Netta yusa-dd waha ḥima ad cek icmet u ḥima ad issen x wuffuɣ nnek ɣar umenɣi u x weɛqab nnek u x marra min i tᵉttegged.” 26 Yuwab iffeɣ zi ɣar Dawud uca issekk ireqqasen awarni i Abnir inni t-i-dd i ɣa yarren zeg wanu n Sira. Dawud maca war issin walu x man aya. 27 Umi dd-iɛqeb Abnir ɣar Ḥabrun, indeh i-t Yuwab ɣar uɣezdis di řwest n tewwart n tendint maḥend ad kides issiweř s řhudnet uca xenni ijju t din deg uɛeddis, ařami immut, di ssibbet n wexřaf n idammen n umas Ɛasayil. ^□  ■   28 Umi isřa Dawud manawenni awarni as, inna: “Necc d tgeldit inu d afurri zzat i SIDI i řebda x idammen n Abnir, mmis n Nir. 29 Ad iřin x uzeǧif n Yuwab u x marra taddart n babas. Ejj taddart n Yuwab war d as ineqqeṣ ɛemmarṣ ca n ijj ad dayes yiři usizzeř, niɣ wenni di iǧa řbarṣ, niɣ wenni iṭṭfen deg umekkuk n uxeyyaḍ, niɣ wenni iwḍan s ssif niɣ wenni ittxeṣṣan aɣrum!

30 Yuwab d umas Abicay nɣin Abnir, minzi netta tuɣa inɣa umatsen Ɛasayil deg umenɣi ɣar Jibɛun.” 31 Dawud maca inna i Yuwab u i marra řgens nni tuɣa ɣares iǧan: “Carrgem arruḍ nwem, yarḍem arruḍ n wecḍan uca uyurem zzat i řmeḥmeř n Abnir am teccatem agejdur!” Ajeǧid Dawud simant nnes yuyur ɣar ḍeffar i řmeḥmeř. 32 Řami neḍřen Abnir di Ḥabrun, issgeɛɛed ujeǧid tmijja nnes, iru ɣar wenḍeř n Abnir uřa d řgens iru marra. 33 Ajeǧid issgeɛɛed ict n ucetci n imettan i Abnir, inna: “Ma immut Abnir xenni am immut ijj n ubuhaři? 34 Ifassen nnek tuɣa war carfen u iḍaren nnek tuɣa war qeyyden s ssnaseř n nnḥas, maca cek tewḍid am mammec iwḍa bnadem sadu ufus n ayt n řmuɛṣiyyet.” Řexdenni yarni řgens marra ɛad deg imeṭṭawen.

35 Marra řgens yusa-dd ɣar Dawud ḥima ad xas ziyyaren ad icc aɣrum am tuɣa d aziř ɛad. Maca Dawud ijjuǧ, inna: “Ejj SIDI ad ayi igg ta d ta, mařa necc qqaseɣ aɣrum niɣ d ca nneɣni qbeř ma ad teɣři tfuct!” 36 Man aya idweř ittwassen ɣar marra řgens uca tuɣa d man aya mliḥ di tiṭṭawin nsen, am mammec marra min igga ujeǧid tuɣa mliḥ di tiṭṭawin n marra řgens. 37 Marra řgens d marra Israil ssnen deg wass nni, aqa war dd-yekki zeg ujeǧid maḥend ad nɣen Abnir, mmis n Nir. 38 Inna ujeǧid i imsexxaren nnes: “Ma war tessinem kenniw, aqa ass-a iwḍa ijj n řḥakem, wah, ijj n weryaz d ameqqran di Israil? 39 Ass-a ḍeɛfeɣ waxxa necc ttwadehneɣ d ajeǧid. Iryazen-a, iḥenjiren n Ṣaruya, qesḥen xafi. SIDI ad ixeǧeṣ wenni d aɛeffan s tuɛeffna nnes.”