1 Umi isřa mmis n Cawul, aqa Abnir immut di Ḥabrun, dewřen ifassen nnes ḍeɛfen u marra Israil innexřeɛ. 2 Mmis n Cawul tuɣa ɣares tnayen n yeryazen jar imsexxaren nnes, inni iǧan d imqeddan n bandiyyat. Ijjen qqaren as Baɛna u wenneɣni Rakab, tuɣa aten d iḥenjiren n Rimmun, Abi’ruti, zeg ayt n Binyamin, maɣar uřa d Bi’rut ittwaḥseb-dd ɣar Binyamin.^■   3 Ibi’rutiyyen arewřen ɣar Jattayim uca qqimen zeddɣen dinni ɣares ař ass-a am ibarraniyyen.

4 Yunatan, mmis n Cawul, tuɣa ɣares ijj n mmis wenni tuɣa iqarrmen zi tnayen n iḍaren. Netta tuɣa ɣares xemsa n iseggʷusa umi dd-yusa řexbar x Cawul d Yunatan zi Yazraɛil. Tenni t isseymen tuɣa tᵉṭṭef i-t uca tarweř. Aqa deg uqeǧeq n tarewřa, imsar, netta iwḍa u idweř iqarrem. Qqaren as Mafibucat. ^■  

5 Rakab d Baɛna, iḥenjiren n Rimmun, Abi’ruti, ṭṭfen abrid uca usin-dd di ṭṭḥa n uziř ɣar taddart n Ic-Bucat. Netta tuɣa izzeř di qama di tmeddit. ^□   6 Xzar, nitni udfen ɣar daxeř di taddart axmi tuɣa nwan ad ksin irden u ssnuqqben t deg uɛeddis. Rakab d umas Baɛna xtuttřen. 7 Nitni udfen ɣar taddart umi t tuɣa izzeř di qama, deg wexxam n yiḍeṣ nnes, uca ssnuqben t, nɣin t uca qessen as azeǧif. Ksin azeǧif nnes akidsen uca uyuren ǧiřet tmun kkin abrid n Řewḍa. 8 Nitni iwyen azeǧif n Ic-Bucat ɣar Dawud ɣar Ḥabrun, nnan i ujeǧid: “Xzar, azeǧif n Icbucat, mmis n Cawul, řeɛdu nnek, wenni tuɣa yarezzun buḥbeř nnek. Aqa ass-a SIDI ixřef i sidi ajeǧid zi Cawul d zzariɛet nnes.” ^□   9 Maca Dawud yarra-dd x Rakab d umas Baɛna, iḥenjiren n Rimmun, Abi’ruti, inna asen: “S tidett am iddar SIDI, wenni ifekken řeɛmar inu zi marra řeḥṣaret,

10 aqa wenni d ayi dd-yiwyen řexbar uca inna: ‘Xẓar, Cawul immut!’, tuɣa ittɣiř as di tiṭṭawin nnes aqa netta am ijjen i dd-yiwyen řexbar aṣebḥan, maca necc ṭṭfeɣ t uca nɣiɣ t di Ṣiqlaɣ, waxxa netta tuɣa iraja ad as wceɣ řmunet i řexbar aṣebḥan. ^■  

11 Mecḥař ɛad řexxu iryazen iɛeffanen inni inɣin ijj n weryaz d amsegged di taddart nnes x qama nnes! Xenni řexxu, ma necc war xeǧfeɣ xenni zzaywem idammen nnes u ad kenniw mḥiɣ zi temmurt?”

12 Xenni yumur Dawud iḥudriyyen nnes u nitni nɣin ten. Qessen asen ifassen d iḍaren uca uyřen ten ɣar uyeřmam n Ḥabrun. Azeǧif n Ic-Bucat maca ksin t nitni, neḍřen t deg wenḍeř n Abnir di Ḥabrun. ^■