1 Marra tiqebbař n Israil usint-i-dd ɣar Dawud ɣar Ḥabrun, ssiwřent, nnant: “Xzar, neccin d iɣussan d weysum nnek. 2 Iḍennaḍ uřa d fariḍennaḍ umi tuɣa Cawul d ajeǧid xaneɣ, tuɣa d cek i dd-issuffɣen Israil ɣar umenɣi u tejjid i-t-i-dd ad idweř. Ɛawed inna ac SIDI: ‘Cek ad tarewsed řgens inu Israil u cek ad tiřid d amgewwed x Israil.’ ” ^■   3 Xenni usin-dd marra imɣaren n Israil ɣar ujeǧid di Ḥabrun u ajeǧid Dawud igga ijj n řɛahd akidsen di Ḥabrun zzat i wudem n SIDI. Nitni dehnen Dawud d ajeǧid x Israil.

4 Tuɣa ɣar Dawud třatin n iseggʷusa umi idweř netta d ajeǧid. Netta iḥkem arebɛin n iseggʷusa. 5 Di Ḥabrun iḥkem x Yahuda sebɛa n iseggʷusa d setta n iyuren u di Urcalim iḥkem třata u-třatin n iseggʷusa x marra Israil d Yahuda. ^■  

6 Ajeǧid iffeɣ ak-d yeryazen nnes ɣar Urcalim, ḍidd i ayt n Iyabusiyyen, imezdaɣ n temmurt. Ssiwřen ak-d Dawud, nnan: “Cek war tᵉttidfed ca da, maɣar idarɣařen d iqiḍaren ad cek ḥṣaren, ad inin: ‘Dawud war da ittidef ca.’ ” 7 Dawud iḥewwes lburj n Ṣihyun, d wenni d tandint n Dawud. 8 Deg wass nni inna Dawud: “Kur ijj i ɣa iwten ijj n Uyabusi, ad yaweḍ ɣar waman ittcefcufen. Iqidaren d idarɣařen carrhen řeɛmar n Dawud.” S uyenni qqaren: “Ijj n udarɣař d ijj n uqiḍar war dd-ttidfen ɣar taddart.” ^■  

9 Dawud iqqim izdeɣ di lburj ifaryen uca igga as: ‘Tandint n Dawud’. Ibna Dawud deg wenneḍ n lqelɛa uřa ɣar daxeř nnes.

10 Dawud idweř yarenni di řemɣaret, maɣar SIDI, AREBBI n řɛeskarat, tuɣa-t akides.

11 Ḥiram, ajeǧid n Ṣur, issekk ireqqasen ɣar Dawud ak-d akeccuḍ n tcejjart n tengelt d ineqqacen n ukeccuḍ u n weẓru n řḥiḍ. Nitni ssbedden ict n taddart i Dawud. ^□  

12 Dawud issen, aqa SIDI tuɣa igga i-t d ajeǧid x Israil u tuɣa issgeɛɛed tageldit nnes di ṭṭweɛ n řgens nnes Israil.

13 Awarni i twasit nnes zi Ḥabrun tuɣa Dawud yarenni tiyya d temɣarin i yixef nnes zi Urcalim u ttwarwen as-dd i Dawud ɛad iḥenjiren d tḥenjirin. ^■  

14 Ina d ismawen n iḥenjiren i d as dd-ittwarwen di Urcalim: Cammuɛ, Cubab, Natan, Suliman,

15 Yibḥar, Ilicuɛ, Nafaj, Yafiɛ,

16 Alicamaɛ, Alyadaɛ d Ilifalaṭ.

17 Umi sřan Ifilisṭiniyyen, aqa dehnen Dawud d ajeǧid x Israil, geɛɛden marra Ifilisṭiniyyen ḥima ad arzun x Dawud. Dawud isřa x man aya u netta ihwa ɣar lqelɛa deg idurar.

18 Ifilisṭiniyyen usin-dd uca bezzɛen ixef nsen di teɣzurt n Irafawiyyen.

19 Xenni isseqsa Dawud SIDI, inna: “Ma ad geɛɛdeɣ ḍidd i Ifilisṭiniyyen? Ma ad ten tegged deg ufus inu?” SIDI inna i Dawud: “Gaɛɛed, maɣar Necc nican ad ggeɣ Ifilisṭiniyyen deg ufus nnek!” 20 U yiweḍ Dawud ɣar Baɛl-Faraṣim. Dinni iwta Dawud Ifilisṭiniyyen, inna: “SIDI icuqq zzat i wudem inu di řɛedyan inu am ict n tareẓẓit n waman.” S uyenni igga as i wemcan nni Baɛl-Faraṣim. ^■   21 Ifilisṭiniyyen jjin dinni řexyařat n ṣṣanam nsen u Dawud d yeryazen nnes ksin ten akidsen.

22 Gaɛɛden Ifilisṭiniyyen ict n twařa nneɣnit u bezzɛen ixef nsen di teɣzurt n Irafawiyyen. 23 Dawud isseqsa SIDI u Netta inna: “War ttgeɛɛid ca, maca ekk asen-dd ɣar ḍeffar, ad ɣarsen dd-tased zeg urendad n tcejjura n umetti. 24 Xmi i ɣa tesřed i tecři n iṣuraf di tqiccat n tcejjura n umetti, xenni qeǧeq ixef nnek, maɣar SIDI ad ac izwar zzat i wudem nnek ḥima ad iwwet řɛeskar n Ifilisṭiniyyen.” 25 Dawud igga am mammec i d as yumur SIDI u netta iwta Ifilisṭiniyyen zi Jibɛa ař mani i ɣa tawḍed ɣar Jazar.