1 Dawud issmun twařa nneɣnit marra iɛeskariyyen ittwafarzen di Israil, třatin-ařef n yeryazen. 2 Uca ikkar Dawud, iffeɣ ak-d marra řgens i ɣares iǧan zi Baɛlim-Yahuda ḥima ad ssenni issgeɛɛed Ttabut n SIDI, Ttabut nni zi ittwabarreḥ Isem, Isem n SIDI n řɛeskarat wenni ittɣiman sennej i ikiruben. ^□   3 Nitni nedhen Ttabut n SIDI x ijj n ukarru n jdid. Nitni iwyen tt-i-dd zi taddart n Abinadab tenni ibedden x ict n teɛrurt. Ɛuzza d Axiyu, iḥenjiren n Abinadab, nedhen akarru n jdid. ^■   4 Nitni iwyen t-i-dd zi taddart n Abinadab i tuɣa ibedden x ict n teɛrurt. Uca ffɣen-dd xenni ak-d Ttabut n SIDI. Axiyu yuyur ɣar zzat i Ttabut. 5 Dawud d marra taddart n Israil uraren zzat i wudem n SIDI s ɛřam kuř dduzan n ǧɣa zeg ukeccuḍ n tcejjart n umerzi, s řgambriyat d lharpat d ibendiren d nnaqusat d teǧunin n wuzzař. ^□  

6 Umi iwḍen ɣar unedrar n Naxun, isswiẓẓeḍ Ɛuzza afus nnes ɣar Ttabut n AREBBI uca iṭṭef i-tt, minzi nderfen ifunasen. 7 Xenni yarɣa weɣḍab n SIDI x Ɛuzza uca iwta i-t AREBBI din x uxeṭṭu aya. Netta immut din ɣar Ttabut n SIDI. 8 Yiweḍ ssem ɣar wuř n Dawud, aqa SIDI tuɣa isɛar ammu x Ɛuzza, uca iřaɣa as i wemcan nni Fariṣ-Ɛuzza ɣares ař ass-a. 9 Deg wass nni teřqef Dawud tiggʷudi zi SIDI u netta inna: “Mammec i ɣa yegg ad ɣari dd-tas Ttabut n SIDI?”

10 S uyenni Dawud war ixs ad yejj ad ɣares dd-awyen Ttabut n SIDI di tendint n Dawud. Dawud ijja i-tt ad taggʷej ɣar taddart n Ɛubid-Idum, Ajitti. ^□  

11 Tekka Ttabut n SIDI třata n iyuren di taddart n Ɛubid-Idum, Ajitti, uca SIDI ibarek Ɛubid-Idum d marra taddart nnes.

12 Xenni xebbaren i ujeǧid Dawud, nnan: “SIDI aqa ibarek taddart n Ɛubid-Idum d marra min iǧan nnes, di ṭṭweɛ n Ttabut n AREBBI.” Xenni yuyur Dawud din u issgeɛɛed Ttabut n AREBBI s řefraḥet zi taddart n Ɛubid-Idum ɣar tendint n Dawud.

13 Řami uyuren xenni inni yarbun Ttabut n SIDI setta n iṣuraf, imsar, aqa iqeddem ijj n ufunas d ijj n ufunas imesřen i tɣarṣt.

14 Dawud icḍeḥ s marra tizemmar nnes zzat i wudem n SIDI. Tuɣa Dawud yarḍ ijj n upalṭu n ukehhan n řeqṭen.

15 Dawud d marra taddart n Israil iwyen Ttabut n SIDI s usřiwřew d uṣuḍi deg uyicc n icarri ɣar sennej.

16 Řami dd-tiweḍ Ttabut n SIDI ɣar tendint n Dawud, imsar, aqa Mixal, yeǧis n Cawul, texzar-dd zi řkazi. Umi teẓra nettat mammec ineggez ujeǧid Dawud zzat i wudem n SIDI u iceṭṭeḥ, tesseḥqar i-t deg wuř nnes.

17 Arbun Ttabut n SIDI ɣar daxeř uca ssarsen tt deg wemcan nnes di řwest n uqiḍun nni tuɣa i d as icedd Dawud uca Dawud issgeɛɛed tiɣarṣa n wecmaḍ zzat i wudem n SIDI, uřa d tiɣarṣa n řehna.

18 Umi ikemmeř Dawud zeg usgeɛɛed n tɣarṣa n wecmaḍ d tɣarṣa n řehna, ibarek řgens deg Yisem n SIDI n řɛeskarat.

19 Netta ibḍa x marra řgens, x marra řɣaci n Israil, x yeryazen d temɣarin, i kuř ijj iwca asen ict n txebbazt n weɣrum, ijj n uřeqquz n weysum n ufunas d ijj n weɣrum n zzbib. Xenni yuyur řgens marra, kuř aryaz ɣar taddart nnes.

20 Yareggʷeḥ Dawud ḥima ad ibarek taddart nnes, Teffeɣ-dd ɣares Mixal, yeǧis n Cawul, tenna as: “Mammec igga ujeǧid n Israil ass-a ccan d ameqqran i ixef nnes, umi iɛarra netta ixef nnes zzat i tiṭṭawin n tiyya n imsexxaren nnes, am mammec iɛarra ca n yijjen zeg yeryazen nni xwan?” 21 Dawud yarra-dd x Mixal: “Necc ggiɣ t zzat i wudem n SIDI wenni d ayi ifarzen x babam d marra taddart nnes, ḥima ad ayi igg d amgewwaed x řgens n SIDI, x Israil, zzat i wudem n SIDI i ssniɛmiřeɣ. 22 D ameẓyan ɛad i ɣa dewřeɣ. Necc ad iřiɣ d amuqřiř di tiṭṭawin inu. Ak-d tiyya i x tessiwřed cem, ad kidsent i ɣa ṭṭfeɣ ccan.” 23 Mixal, yeǧis n Cawul, teqqim břa aḥenjir ař ass n řmewt nnes.