1 Umi iqqim ujeǧid di taddart nnes u SIDI tuɣa igga as řehna zi marra řɛedyan nnes i d as dd-innḍen, imsar, 2 aqa inna ujeǧid i unabi Natan: “Xzar, necc zeddɣeɣ deg ict n taddart n ukeccuḍ n tcejjart n tengelt, maca Ttabut n AREBBI třeḥḥef sadu tajartiřt n uqiḍun.” 3 Natan inna i ujeǧid: “Uyur waha, egg marra min ɣarek deg wuř nnek, maɣar SIDI akidek.”

4 Di ǧiřet nni imsar aqa iffeɣ wawař n SIDI ɣar Natan, inna: 5 “Uyur, ini i umsexxar inu, i Dawud: “Ammu i iqqar SIDI: ‘Ma cek texsed ad ayi tebnid ict n taddart, maḥend ad dayes zedɣeɣ? 6 Ɛemmarṣ war zdiɣeɣ deg ict n taddart zeg wass umi dd-ssgeɛɛdeɣ ayt n Israil zi Miṣra ɣares ař ass-a, maca durryeɣ deg ijj n Uqiḍun, deg ict n Tzeddiɣt. 7 Mani ma durryeɣ ak-d ayt n Israil, ma Necc ssiwřeɣ ɛemmarṣ uřa s yijj n wawař i yict zi tqebbař n Israil tinni i umureɣ ad arwesen řgens inu Israil, u nniɣ: ‘Mayemmi war d ayi tebnim ict n Taddart n ukeccuḍ n tcejjart n tengelt?’ 8 Xenni řexxu, ammu i ittxeṣṣa ad tinid i umsexxar inu, i Dawud: ‘Ammu i iqqar SIDI n řɛeskarat: Necc iwyeɣ-dd cek zi řkuri, zi ḍeffar n wuǧi, maḥend ad tiřid d amgewwed x řgens inu, x Israil. 9 Mani ma tuyured, Necc aqa ayi akidek u necc qḍiɣ x marra řɛedyan zzat i wudem nnek. Necc ggiɣ ac ijj n isem d ameqqran amecnaw ismawen n imeqqranen nni iǧan x temmurt. ^■  

10 Necc neyyceɣ ijj n wemcan i řgens inu, i Israil, uca ẓẓuɣ t din, maḥend ad izdeɣ deg wemcan nnes u war ggur ad ittwanhezz ɛad u war t ssḥeṣṣarin ɛad ayt n řmuɛṣiyyet am umezwaru,

11 zeg wass nni ggiɣ Necc řquḍat x řgens inu Israil. Necc wciɣ ac řehna zi marra řɛedyan nnek uca řexxu ad ac isscen SIDI, aqa SIDI ad ac igg ict n taddart.

12 Řami ttwakemmřen wussan nnek uca tᵉttwasarsed deg wenḍeř jar řejdud nnek, ad dd-ssekkareɣ zzariɛet nnek i dd-itteffɣen zi daxeř nnek u Necc ad ssmetneɣ tagelda nnes. ^■  

13 Netta ad ibna ict n taddart i Yisem inu u Necc ad ssmetneɣ řɛarc n tagelda nnes i řebda. ^■  

14 Necc ad iřiɣ d Babas i netta u netta ad yiři i Necc d mmi. Mařa netta iffaryeḍ, ad t arebbiɣ s weɛmud d teyyita n ayt n bnadem. ^■  

15 Tamexsiwt inu icewwaren war zzayes ttxennes am mammec ttessxenseɣ Necc x Cawul, wenni dd-kkseɣ zi zzat n wudem nnek.

16 Taddart nnek d tgelda nnek ad ttwasmetnent zzat i wudem nnek i řebda, řɛarc nnek ad iqqim ibedd i řebda.’ ” ^□  

17 Natan issiweř ɣar Dawud nican awařen-a d ijjen d marra asargeb-a i iẓar.

18 Xenni yudef ujeǧid Dawud uca iqqim zzat i wudem n SIDI, inna: “Min ɛniɣ necc, Sidi inu SIDI, u min teɛna taddart inu aqa Cek tnedhed ayi-dd ɣares ař danita?

19 Di tiṭṭawin nnek d man aya ɛad drus, a Sidi inu, SIDI, u cek tessiwřed řexxu ɛad x taddart n umsexxar nnek i wussan iggʷejen i dd ittasen. D man aya d taɣuri n Ccariɛa i bnadem, Sidi inu, SIDI.

20 Min d ac i ɣa yini Dawud ɛad ktar? Cek tessned amsexxar nnek, Sidi, inu SIDI! 21 Di ṭṭweɛ n wawař nnek u ɛlaḥsab uř nnek aqa teggid marra řemɣaret-a, ḥima ad tt tessargbed i umsexxar nnek. 22 S uyenni Cek d ameqqran, Sidi inu, SIDI, maɣar war din iǧi uřa d ijj am Ck u war din iǧi uřa d ijj n SIDI mɣir Cek ɛlaḥsab marra min nesřa s imezzuɣen nneɣ. ^■   23 Man wen i iǧan am řgens nnek, am Israil, ayenni n řgens x temmurt i ɣar iraḥ AREBBI ḥima ad t ifdi i yixef nnes d řgens u ḥima ad igg i yixef nnes ijj n Yisem u ḥima ad awen igg ict n řxedmet d tameqqrant uřa d tmegga d timeqqranin i temmurt nnek zzat i wudem n řgens nnek nni tefdid i yixef nnek zi Miṣra, zi řegnus u zeg irebbiten nsen. ^□  ■   24 Cek teggid řgens nnek Israil d ijj n řgens i yixef nnek i řebda. Cek, a SIDI, aqa cek tdewřed d AREBBI i nitni.

25 Xenni řexxu, SIDI AREBBI, ejj awař nni tessiwřed x umsexxar nnek u x taddart nnes ad ibedd i řebda u egg am mammec tessiwřed. 26 Ejj Isem nnek ad ittwassemɣar i řebda, ad inin: ‘SIDI n řɛeskarat ijehden aqa-t d AREBBI x Israil!’, uca iři ad tᵉttwassemten taddart n umsexxar nnek Dawud zzat i wudem nnek. 27 Maɣar Cek, SIDI n řɛeskarat, AREBBI n Israil, aqa tessargbed deg imezzuɣen n umsexxar nnek, tennid: ‘Necc ad ac ssbeddeɣ ict n taddart!’ S uyenni tusa-dd deg wuř n umsexxar nnek maḥend ad iẓẓaǧ taẓaǧit-a ɣarek. 28 Xenni řexxu, Sidi inu, SIDI, Cek d AREBBi nni uca awařen nnek d tidett u Cek tessiwřed s marra tcuni aya ɣar umsexxar nnek. ^■   29 Xenni řexxu, mařa tusa ac-dd x řxaḍar, barek taddart n umsexxar nnek ḥima ad tiři zzat i wudem nnek i řebda, minzi Cek, a Sidi inu, SIDI, tessiwřed aya u s lbaraka nnek ad tᵉttwabarek taddart n umsexxar nnek i řebda.’ ”