1 Awarni aya imsar aqa Dawud iɣřeb x Ifilisṭiniyyen uca yarra i-ten sadu afus nnes u Dawud ikkes Mitig-Ha’amma zeg ufus n Ifilisṭiniyyen. 2 Ɛawed iɣřeb netta Mu’ab uca iɛbar i-ten s yijj n ufiřu n řeɛbar am zzřen di temmurt, uca netta iɛbar tnayen n ifiřan n řeɛbar ḥima ad ten ineɣ uřa d ijj n ufiřu imun ḥima ad ten yejj ddaren. Ammu i dewřen Imu’abiyyen d imsexxaren i Dawud inni ittxeṣṣan ad as wcen tirzifin.

3 Dawud iɣřeb ɛawed x Hadad-Ɛazar, mmis n Raḥub, ajeǧid n Ṣuba, umi tuɣa dd-iffeɣ wanita ḥima ad ɣares dd-yarr řeḥkamet nnes ɣar yeɣzar n Lfuraṭ. ^□   4 Dawud ikkes zzayes ařef u sebɛa-mya n imnayen d ɛicrin-ařef n yeryazen x iḍaren u iqess Dawud iḍaren n marra iysan n ikarruten uca ijja zzayes mya n iysan n ikarruten. ^■   5 Yusa-dd Aram zi Dimacq ḥima ad iwc afus i Hadad-Ɛazar, ajeǧid n Ṣuba, u Dawud iɣřeb x tnayen u-ɛicrin-ařef n yeryazen n Aram. 6 Dawud igga řɛeskarat n uḥewwes jar Iramiyyen n Dimacq u Iramiyyen dewřen d imsexxaren n Dawud inni ittxeṣṣan ad as wcen tirzifin. SIDI igga ttasiɛ i Dawud mani ma iruḥ. 7 Dawud iksi tiseddariyin iqesḥen n uɛeskari nni ttwaggent s wureɣ, tinni tuɣa iǧan n imsexxaren n Hadad-Ɛazar u yiwyi tent ɣar Urcalim. 8 Iksi Dawud aṭṭas n nnḥas zi Bataḥ u zi Biratay, tineddam n Hadad-Ɛazar.

9 Umi Tuɛi, ajeǧid n Ḥamat, isřa aqa Dawud iɣřeb x marra řɛeskar n Hadad-Ɛazar,

10 issekk Tuɛi mmis Yuram ɣar ujeǧid Dawud ḥima ad isseqsa x umeddur nnes u ḥima ad as ibarek, minzi netta imneɣ akides u iɣřeb xas, maɣar Hadad-Ɛazar tuɣa i Tuɛi d ijj n weryaz yarezzu amenɣi. Netta yiwi akides deg ufus nnes řeqcuɛ n nnuqart d řeqcuɛ n wureɣ d řeqcuɛ n nnḥas, ^□  

11 inni issqeddes ujeǧid Dawud ɛawed i SIDI, imun ak-d nnuqart d wureɣ nni tuɣa issqeddes zi marra řegnus nni tuɣa yarra sadu nnes,

12 zi Aram u zi Mu’ab u zeg ayt n Ɛammun u zeg Ifilisṭiniyyen u zi Ɛamaliq uřa zi tkeccaḍt n Hadad-Ɛazar, mmis n Raxub, ajeǧid n Ṣuba.

13 Igga Dawud ɛawed ijj n yisem, umi dd-iɛqeb netta zeg řeɣřeb x Aram di Teɣzurt n Tmeǧaḥt, tmenṭac-ařef n yeryazen. ^■  

14 Netta igga řɛeskarat n uḥewwes di Idum. Di marra Idum igga řɛeskarat n uḥewwes u marra Idumiyyen dewřen d imsexxaren i Dawud. SIDI igga ttasiɛ i Dawud mani ma iffeɣ netta.

15 Dawud iḥkem x marra Israil u Dawud igga s řḥeqq d tsegda i marra řgens nnes.

16 Yuwab, mmis n Ṣaruya, tuɣa-t x řɛeskar u Yahucafaṭ, mmis n Axilud, tuɣa-t d amarir n umezruy.

17 Ṣaduq, mmis n Axiṭub, d Aximalik, mmis n Abyatar, tuɣa aten d ikehhanen u Saraya tuɣa-t d amarir.

18 Banaya, mmis n Yahuyadaɛ, tuɣa-t x iɛessasen n arrimet n ujeǧid u x ireqqasen n tazřa. Iḥenjiren n Dawud tuɣa aten d imtiqqan nnes.