1 Dawud inna: “Ma iqqim ɛad ca n yijjen zi taddart n Cawul, ḥima necc ad as ssecneɣ tamexsiwt inu icewwaren di ṭṭweɛ n Yunatan?” 2 Tuɣa din ijj n umsexxar ɣar taddart n Cawul ttřaɣan as Ṣiba. Řaɣan as-dd ɣar Dawud. Inna as ujeǧid: “Ma cek d Ṣiba?” Netta inna: “D amsexxar nnek.” ^■   3 Ajeǧid inna: “Ma iqqim ɛad ca n ijj zi taddart n Cawul iddar, ḥima ad as ssecneɣ tamexsiwt icewwaren n AREBBI?” Xenni inna Ṣiba i ujeǧid: “Aqa din ɛad ijj n mmis n Yunatan wenni d aneɛḍab zi tnayen n iḍaren.” ^■   4 Inna as ujeǧid: “Mani iǧa netta?” Ṣiba inna as i ujeǧid: “Xzar, netta aqa-t di taddart n Maxir, mmis n Ɛammiyil di Ludabar.”

5 Xenni issekk ujeǧid Dawud din u yiwyi t-i-dd zi taddart n Maxir, mmis n Ɛammiyil di Ludabar. 6 Umi Mafibucat, mmis n Yunatan, mmis n Cawul, yudef ɣar Dawud, iwḍa x uɣembub nnes, yuḍar. Dawud inna: “Mafibucat!” Netta inna: “Xzar, aqa da amsexxar nnek.” 7 Dawud inna as: “War tteggʷed, maɣar necc ad ac ssecneɣ tamexsiwt inu icewwaren di ṭṭweɛ n babac Yunatan. Necc ad ac arreɣ marra iyyaren n jedd nnek Cawul u cek ad tecced řebda macca ɣar ṭṭabřa inu.” ^□   8 Xenni yuḍar as, inna: “Min iɛna umsexxar nnek ařami cek texzared ɣar ijj n weqzin immuten am mammec ǧiɣ necc?” 9 Xenni iřaɣa ujeǧid x Ṣiba, amsexxar n Cawul, inna as: “Marra min iǧan n Cawul d marra taddart nnes, wciɣ t i mmis n sidi nnek.

10 Cek ad as tcarzed tammurt, cek d iḥenjiren nnek d imsexxaren nnek, ḥima mmis n sidi nnek ad ɣares yiři weɣrum ad yecc. Mafibucat, mmis n sidi nnek, ad yecc řebda aɣrum ɣar ṭṭabřa inu.” Ṣiba tuɣa ɣares xemmesṭac n iḥenjiren d ɛicrin n imsexxaren.

11 Ṣiba inna i ujeǧid: “Amsexxar nnek ad igg ɛlaḥsab marra min yumur sidi ajeǧid i umsexxar nnes!” Dawud inna ɛad: “Mafibucat ad icc ɣar ṭṭabřa inu am ijjen zeg iḥenjiren n ujeǧid.”

12 Mafibucat tuɣa ɣares ijj n mmis ttřaɣan as Mixa. Marra inni tuɣa izeddɣen di taddart n Ṣiba tuɣa aten d imsexxaren n Mafibucat.

13 U Mafibucat tuɣa izeddeɣ di Urcalim, maɣar netta ittett řebda ɣar ṭṭabřa n ujeǧid. Netta tuɣa-t d aneɛḍab zi tnayen n iḍaren.