1 Awarni aya imsar, aqa ajeǧid n ayt n Ɛammun immut. Mmis Ḥanun idweř d ajeǧid deg wemcan nnes. ^□   2 Xenni inna Dawud: “Necc xseɣ ad ssecneɣ tamexsiwt icewwaren i Ḥanun, mmis n Naḥac, am mammec i d ayi isscen babas tamexsiwt nnes icewwaren.” Dawud issekk ireqqasen ḥima ad t iɛezza x řmewt n babas s ufus n imsexxaren nnes u imsexxaren n Dawud iwḍen ɣar temmurt n ayt n Ɛammun. 3 Xenni nnan řḥukkam n ayt n Ɛammun i sidi nsen Ḥanun: “Ma, di tiṭṭawin nnek, ixs Dawud ad iweqqar babac umi dd-issekk netta inni cek i ɣa iɛezzan? Maca ma war dd-issekk Dawud s tidett imsexxaren nnes ɣarek, ḥima ad arzun di tendint ad ssmunen řexbar uca xenni ad tt arren war teǧi d nettat?”

4 Xas uca iṭṭef Ḥanun imsexxaren n Dawud uca iḥeff asen azyen zi tmart u iqess asen azyen n warruḍ ař ḍeffar uca issekk i-ten. 5 Umi xebbaren aya i Dawud, issekk asen ireqqasen, minzi nitni tuɣa ttseḍḥan ixef nsen aṭṭas. Inna ujeǧid: “Qqimem di Ariḥa ař dd ɣa temɣar tmart nwem, xenni ad dd-tdewřem.”

6 Umi ẓrin ayt n Ɛammun belli nitni tuɣa ssarzgen ixef nsen ɣar Dawud, ssekken ayt n Ɛammun ireqqasen u cran zeg Iramiyyen zi Bayt-Raxub u zeg Iramiyyen zi Ṣuba ɛicrin-ařef n yeryazen x iḍaren u zeg ujeǧid n Maɛka ařef n yeryazen u zeg yeryazen n Ṭub tenɛac-ařef n yeryazen. 7 Umi isřa Dawud aya, issekk Yuwab s marra řɛeskar nnes, marra ayt n bu-teɣruḍt. 8 Ayt n Ɛammun ffɣen-dd u sedden ixef nsen i umenɣi ɣar wadaf n tewwart n tendint, maca Iramiyyen n Ṣuba d Raxub d yeryazen n Ṭub d Maɛka tuɣa aten s yixef nsen deg iyyar. 9 Umi iẓra Yuwab, aqa amenɣi řa zeg urendad uřa zi ḍeffar n uɣembub, ixḍar netta zi marra inni ittwafarzen di řɛeskar n Israil uca issbedd i-ten i umenɣi ajemmaḍ n Iramiyyen.

10 Min iqqimen n řgens igga i-ten sadu ufus n umas Abicay, wenni ten issbedden ajemmaḍ n ayt n Ɛammun.

11 Inna netta: “Mařa Aram ijhed xafi, xenni as-dd, ewc ayi afus! Mařa ayt n Ɛammun jehden xak, xenni ad dd-aseɣ ad cek fekkeɣ.

12 Iři d aryaz u ad niři d iryazen di ṭṭweɛ n řgens nneɣ u di ṭṭweɛ n tneddam n AREBBI. Iři ad igg SIDI min iǧan mliḥ di tiṭṭawin nnes.”

13 Xenni iqarreb-dd Yuwab d řgens i ɣares iǧan i umenɣi ak-d Aram uca ina ṭṭfen di tarewřa zzat i wudem nnes.

14 Umi ẓrin ayt n Ɛammun, aqa Iramiyyen arewřen, ṭṭfen uřa d nitni di tarewřa zzat i wudem n Abicay uca iwḍen ɣar tendint. Yuwab iɛqeb awarni i umenɣi ak-d ayt n Ɛammun uca yiweḍ ɣar Urcalim.

15 Umi ẓrin Iramiyyen aqa nitni ttwaɣeřben zzat i wudem n Israil, nnyarwen twařa nneɣnit.

16 Uca Hadad-Ɛazar issekk ireqqasen, ijja ad dd-asen Iramiyyen inni izeddɣen x ujemmaḍ n yeɣzar n Lfuraṭ uca nitni usin-dd ɣar Ḥilam. Cubak, akumandar n řɛeskar n Hadad-Ɛazar, iffeɣ zzat i wudem nsen.

17 Umi ittwanna aya i Dawud, issmun netta marra Israil, iẓwa L'Urdun u yusa-dd ɣar Ḥilam. Iramiyyen sedden ixef nsen i umenɣi ɣar ujemmaḍ i Dawud u mmenɣen akides.

18 Iramiyyen arewřen zzat i wudem n Israil u Dawud iqḍa x sebɛa-mya n ikarruten n umenɣi d arebɛin-ařef n imnayen n Iramiyyen. Ɛawed iwta Cubak, akumandar n řɛeskar nsen, ařami immut din.

19 Umi ẓrin marra ijeǧiden nni tuɣa ittraḥen ak-d Hadad-Ɛazar, belli aqa nitni twaɣellben zzat i wudem n ayt n Israil, ggin nitni řehna ak-d Israil u sexxaren as. Iramiyyen ggʷeden ad fekken ayt n Ɛammun twařa nneɣnit. ^□