1 Ɣar ubeddu n useggʷas n jdid, di řweqt i di itteffɣen ijeǧiden ɣar umenɣi, imsar aqa Dawud issekk Yuwab ak-d yeryazen nnes nni akides iǧan d marra Israil. Nitni řebzen ayt n Ɛammun uca nnḍen i Rabba. Maca Dawud simant nnes iqqim di Urcalim. ^■  

2 Umi dd-ikkar Dawud ict n twařa ɣar tmeddit zi qama nnes, imsar aqa netta yuyur x tzeqqa iwaṭan n tzeddiɣt n ujeǧid. Iẓra ssenni ict n temɣart tessirid ixef nnes. Tamɣart dayes aẓri aṭṭas. 3 Dawud issekk ijj din maḥend ad isseqsa x temɣart. Ittwanna as: “Ma war teǧi Batcabaɛ, yeǧis n Iliɛam, tamɣart n Aḥitti Uriya?” 4 X as uca issekk Dawud ireqqasen, ijja ad tt-i-dd-awyen. Nettat tudef-dd ɣares uca iṭṭeṣ netta akides. Nettat tuɣa tqeddes ixef nnes zi řexmej nnes, xenni teɛqeb ɣar taddart nnes. ^■   5 Tamɣart tuɣa teksi s ddeyset uca tessekk ijj, tessargeb Dawud, tenna: “Necc ksiɣ s ddeyset.”

6 Xas uca issekk Dawud ict n tebrat ɣar Yuwab: “Sekk-dd Aḥitti Uriya ɣari!” U Yuwab issekk Uriya ɣar Dawud. 7 Umi ɣares-dd yusa Uriya, isseqsa Dawud x mammec iǧa Yuwab u x mammec iǧa řgens u x mammec iggur umenɣi. 8 Xenni inna Dawud i Uriya:“ Hwa ɣar taddart nnek uca ssird iḍaren nnek!” Uriya ismeḥ di taddart n ujeǧid u sseḍfaren as ict n tarzeft n ujeǧid. 9 Uriya maca izzeř ɣar tewwart n taddart n ujeǧid ak-d marra imsexxaren n sidi nnes. Netta war ihwi ca ɣar taddart nnes.

10 Xebbaren i Dawud, nnan: “Uriya war ihwi ca ɣar taddart nnes.” Xas uca inna Dawud i Uriya: “War dd-tedwiřed řexxu zeg usafar? Mayemmi cek war dd-tehwid ɣar taddart nnek?” ^□  

11 Uriya yarra-dd x Dawud: “Ttabut d Israil d Yahuda ttɣiman deg iqiḍan u sidi inu Yuwab d imsexxaren n sidi inu wtin iqiḍan nsen deg iyyar yarezmen. Ma xenni ad uyureɣ necc ɣar taddart inu, ḥima ad cceɣ, ad sweɣ u ad wḍiɣ ak-d temɣart inu? S tidett am teddared cek u iddar řeɛmar nnek, war ggur ad ggeɣ aya!”

12 Xas uca inna Dawud i Uriya: “Qqim uřa d ass-a ɛad danita. Tiwecca ad cek ssekkeɣ ɛawed.” Uca ammu i iqqim Uriya ass nni d wass i t-i-dd iḍfaren di Urcalim.

13 Iɛarḍ i-t Dawud uca netta icca u iswa zzat i wudem nnes uca Dawud isscar i-t. Ɣar tmeddit maca iffeɣ Uriya, ḥima ad izzeř ɛawed ɣar imsexxaren n sidi nnes, maca netta war ihwi ca ɣar taddart nnes.

14 Ɣar tuffut imsar, aqa Dawud yura ict n tebrat i Yuwab uca issekk i-tt s ufus n Uriya.

15 Netta yura di tebrat nni: “Sbeddet Uriya ɣar zzat mani iǧa umenɣi iqesḥen, xenni ḥeyydet xas, ḥima ad ittwařqef, ad immet.”

16 Awarni Yuwab tuɣa ixezzar tandint, imsar netta issbedd Uriya ɣar mani netta issen aqa dinni bedden yeryazen imeḥḍen aṭṭas.

17 Xenni dd-ffɣen yeryazen zi tendint, mmenɣen ak-d Yuwab. Wḍan yeryazen zi řgens, zeg imsexxaren n Dawud, uřa d Aḥitti Uriya immut.

18 Yuwab issekk ijj n umsexxar uca iḥaja i Dawud x mammec iggur umenɣi.

19 Netta yumur i umsexxar, inna: “Mařa cek tkemmřed řexbar nnek x mammec iggur marra umenɣi 20 uca imsar xenni ad ikkar wesɛar n ujeǧid, ad ac yini: “Mayemmi tudsem tandint deg umenɣi? Ma war tessinem kenniw, aqa nitni ccaten-dd kenniw zi řḥiḍ? 21 Man wen inɣin Abimalik, mmis n Yarubbucat? Ma war iǧi d ict n temɣart tenḍared xas tasirt yuɛřan n tsirt zi řḥiḍ, ařami netta immut di Tabaṣ? Mayemmi tuyurem tudsem ammu řḥiḍ?’, xenni cek ad tinid: ‘Uřa d amsexxar nnek, Aḥitti Uriya, ittwaneɣ.’ ” ^■  

22 Areqqas yuyur, yusa-dd ɣar Dawud uca iḥaja as marra x min xef t issekk Yuwab. 23 Areqqas inna i Dawud: “Iryazen tuɣa jehden xaneɣ u nitni tuɣa ffɣen-dd ɣarneɣ ɣares ař iyyar, maca neccin neḥṣar i-ten ɣares ař tawwart n tendint. 24 Xenni ccaten-dd inni ittḥakan s řqews zi řḥiḍ x imsexxaren nnek, ařami mmuten imsexxaren n ujeǧid. Uřa d amsexxar nnek, Aḥitti Uriya, immut.” 25 Xenni inna Dawud i ureqqas: “Ammu i ɣa tinid i Yuwab: ‘War ttejji ad tiři tmesřact-a d taɛeffant di tiṭṭawin nnek, maɣar ssif ad icc wanita, daweḥda wenneɣni. Iři d aryaz deg umenɣi ak-d tendint u hdem i-tt!’ Egg dayes taryast s man aya.” 26 Tamɣart n Uriya tesřa belli aqa aryaz nnes Uriya immut u nettat tegga x sidi nnes acḍan n imettan. 27 Umi teɛdu řweqt n wecḍan issekk Dawud ad tt-i-dd-awyen di taddart nnes. Nettat tedweř d tamɣart nnes uca turuw as-dd ijj n uḥenjir. Maca min tuɣa igga Dawud, tuɣa d aɛeffan di tiṭṭawin n SIDI.