1 Issekk SIDI Natan ɣar Dawud. Řami ɣares yudef netta, inna as:

“Deg ict n tendint tuɣa din tnayen n yeryazen, ijjen tuɣa ɣares agřa, wenneɣni d amezřuḍ. 2 Bu-wagřa ɣares abarru n wuǧi d ifunasen d tfunasin. 3 Amezřuḍ maca war ɣares walu mɣir ict n tḥuřit d tameẓyant waha i tuɣa dd-isɣa. Netta tuɣa issecca i-tt u tedweř tmeqqar ɣares netta ak-d iḥenjiren nnes. Tecca zeg uřeqquz n weɣrum nnes u teswa zeg ufenjař nnes u ttᵉṭṭeṣ x ifadden nnes. Tuɣa-tt i netta am ict n yeǧis. 4 Umi dd-yusa ijj n umsebrid ɣar weryaz bu-wagřa, yewɛar xas netta ḥima ad issewjed macca i umsebrid i ɣares-dd yusin zeg wuǧi nnes niɣ zeg ifunasen d tfunasin nnes. S uyenni iksi netta taḥuřit tameẓyant n weryaz amezřuḍ uca issewjed i-tt i weryaz nni tuɣa ɣares-dd yusin.”

5 Yarɣa uxeyyeq n Dawud aṭṭas x weryaz nni, inna i Natan: “S tidett am iddar SIDI, aryaz i iggin aya, tekkar as-dd řmewt 6 uca taḥuřit tameẓyant ad tt ixřef arebɛa n tseqqar, minzi netta igga aya war dayes yarḥim.” ^■  

7 Xenni inna Natan i Dawud: “Cek simant nnek d aryaz nni. Ammu iqqar SIDI, AREBBI n Israil: ‘Necc dehneɣ cek d ajeǧid x Israil u Necc ssnejmeɣ cek zeg ufus n Cawul. ^■   8 Necc wciɣ ac taddart n sidi nnek d temɣarin n sidi nnek x ifadden nnek u Necc wciɣ ac taddart n Israil d Yahuda. Mařa aya drus, ad iři arniɣ wa niɣ ta i cek. 9 Mayemmi tesseḥqared awař n SIDI u teggid min iǧan d aɛeffan di tiṭṭawin nnes? Cek tenɣid Aḥitti Uriya s ssif u teksid tamɣart nnes, teggid tt d tamɣart i yixef nnek uca tenɣid t s ssif n ayt n Ɛammun.

10 X uyenni řexxu, ssif war ittḥeyyid i řebda x taddart nnek, maɣar cek tesseḥqared ayi u teksid tamɣart n Uḥitti Uriya ḥima ad tedweř d tamɣart nnek.’

11 Ammu i iqqar SIDI: ‘Xẓar, Necc ad xak ssekkareɣ tuɛeffna zi taddart nnek u Necc ad ac kkseɣ timɣarin nnek zzat i tiṭṭawin nnek, ad tent wceɣ i umqarreb nnek u netta ad iṭṭeṣ ak-d temɣarin nnek ɣar tfuct deg ujenna. ^■  

12 Maɣar cek teggid tt s tnuffra, maca Necc ad ggeɣ aya zzat i tiṭṭawin n marra Israil u ɣar tifawt n tfuct.’ ”

13 Xas uca inna Dawud i Natan: “Necc xḍiɣ ak-d SIDI!” Inna Natan i Dawud: “SIDI iɣfar ddenb nnek, war tmettid ca.

14 Minzi cek maca tarrid řɛedyan n SIDI ad ceqqfen aṭṭas, uřa d mmic i d ac dd-ittwarwen ad immet s tidett.”

15 Xenni yuyur Natan ɣar taddart nnes. SIDI iřqef aḥenjir i tuɣa dd-turuw temɣart n Uriya i Dawud uca idweř iḥřec aṭṭas.

16 Dawud yarzu AREBBI di ṭṭweɛ n uḥenjir. Iẓumm Dawud břa aqeṭṭi u netta yudef, izzeř x temmurt di ǧiřet.

17 Imɣaren n taddart nnes usin-dd, bedden ɣares ḥima ad t arren ad dd-ikkar zi temmurt. Netta maca war ixs u war icci aɣrum akidsen.

18 Deg wass wiss sebɛa imsar aqa aḥenjir immut. Imsexxaren n Dawud ggʷeden ad as inin, aqa aḥenjir immut, maɣar nitni nnan: “Xzar, umi aḥenjir tuɣa iddar ɛad, nessiweř akides, maca war ɣarneɣ isři ca. Mammec i nzemmar řexxu ad as nini: ‘Aḥenjir immut!’? Netta ad igg tuɛeffna deg ixef nnes.”

19 Dawud iẓra aqa imsexxaren nnes ssawařen s tḥessect jar asen u Dawud yuca illa aḥenjir tuɣa immut. Netta inna i imsexxaren nnes: “Ma immut uḥenjir?” Nitni nnan as: “Aqa immut!” 20 Xenni ikkar Dawud zi temmurt, issird, idhen ixef nnes, ibeddeř arruḍ nnes. Netta yudef ɣar Taddart n SIDI, yuḍar. Umi xenni yareggʷeḥ ɣar taddart, ittar aɣrum u nitni ssarsen aɣrum zzates uca icca. 21 Nnan as imsexxaren nnes: “Min teggid cek řexxu? Umi aḥenjir ɛad iddar, tẓummed di ṭṭweɛ nnes u trud. Awarni řami immut maca uḥenjir, tekkared uca teccid aɣrum.” 22 Netta yarra-dd xasen: “Umi aḥenjir ɛad iddar, ẓummeɣ u ruɣ, maɣar necc nniɣ: ‘Wi issnen, SIDI ad xafi iḥinn u aḥenjir ad iddar.’ 23 Řexxu maca immut. Mayemmi i ɣa ẓummeɣ ɛad? Ma zemmareɣ ad t-i-dd arreɣ? Necc ad ɣares raḥeɣ ict n twařa, maca netta war dd ɣari ittɛiqqib.”

24 Dawud issfewwej tamɣart nnes Batcabaɛ u netta yudef ɣares uca iṭṭeṣ akides. Nettat turuw-dd ijj n uḥenjir, igga as Suliman. SIDI tuɣa ittexs i-t ^■   25 u s ufus n unabi Natan igga as Yadidya, am mammec tuɣa ixs SIDI.

26 Yuwab imneɣ ak-d Rabba n ayt n Ɛammun u netta iḥewwes tandint n ujeǧid. ^■   27 Xas uca issekk Yuwab ireqqasen ɣar Dawud, inna: “Necc menɣeɣ ak-d Rabba ṭṭfeɣ uřa d tandint n waman. 28 Smun min iqqimen n řɛeskar uca nneḍ i tendint, ṭṭef i-tt, niɣ ad ṭṭfeɣ necc tandint uca ad xas řaɣan s yisem inu.”

29 Xenni issmun Dawud marra řɛeskar, iffeɣ ɣar Rabba. Immneɣ akides uca iṭṭef i-tt. 30 Ikkess x uzeǧif ttaj n ujeǧid, wenni s yijj n řewzen n ict n talint n wureɣ u xas tayaqutin iɣřan, u tusa-dd temrist x uzeǧif n Dawud. Netta yiwi ɛawed ict n tkeccaḍt d tameqqrant aṭṭas zi tendint. ^■   31 Řgens nni dayes iǧan issuffeɣ i-t u issezzeř i-ten sadu řmencarat u sadu iyařzimen n wuzzař u sadu ccwaqar n wuzzař uca netta ijja i-ten ad ɛdun s řkuccat n llajur. Ammu i igga netta ak-d marra tineddam n ayt n Ɛammun. Xenni iɛqeb Dawud d marra řgens ɣar Urcalim. ^■