1 Imsar awarni aya, aqa Abcalum, mmis n Dawud, tuɣa ɣares ict n učmas dayes aẓri, qqaren as Tamar uca Amnun, mmis n Dawud, iɛceq i-tt. 2 Amnun tuɣa icḍen aṭṭas ařami ggur ad ihřec x učmas Tamar, maɣar nettat tuɣa d taɛzarect uca tuɣa war izemmar di tiṭṭawin n Amnun ad as igg ca. 3 Amnun tuɣa ɣares ijj n umeddukkeř qqaren ass Yunadab, ijj n mmis n Cimɛa, umas n Dawud. Yunadab tuɣa d ijj n weryaz d amiɣis aṭṭas. 4 Netta inna as: “Mayemmi tceḍneḍ ammu zi tuffut ař tuffut, cek, mmis n ujeǧid? Ma war texsed cek ad ayi t tɛawded?” Amnun yarra-dd xas: “Necc ɛecqeɣ Tamar, učmas n uma Abcalum.”

5 Inna as Yunadab: “Zzeř di qama u egg ixef nnek theřced. Mařa xenni yusa-dd babac, ḥima ad xak issijj, ini as: ‘Ejj učma Tamar ad ɣari dd-tas maḥend ad ayi tewc macca u ad tessewjed macca zzat i tiṭṭawin inu, ḥima ad ẓarɣ, ad cceɣ zeg ufus nnes.’ ” 6 Amnun izzeř din, issniɛmiř ihřec. Umi dd-yusa ujeǧid ḥima ad xas issijj, inna Amnun i ujeǧid: “Ejj ad dd-tas učma Tamar maḥend nettat ad ayi tessewjed tnayen n tiɣaryiṭatin n wuřawen u necc ad tent cceɣ zeg ufus nnes.” 7 Dawud issekk ijj ɣar Tamar, di taddart nnes, ḥima ad as inna: “Ruḥ maca ɣar taddart n umam Amnun u sewjed as macca.” 8 Tamar tuyur ɣar taddart n umas Amnun wenni din izzřen. Nettat teksi arecti teggʷa t u tessewjed tiɣaryiṭatin n wuřawen zzat i tiṭṭawin nnes uca taref tiɣaryiṭatin n wuřawen. 9 Nettat teksi marmita tfarreɣ i-tt zzates, maca netta yugi ad icc. Xenni inna Amnun: “Ejj ad xafi ffɣen marra!” U marra ffɣen xas.

10 Xenni inna Amnun i Tamar: “Awi-dd macca deg wexxam, ḥima ad cceɣ zeg ufus nnem.” U Tamar teksi tiɣaryiṭatin n wuřawen i tuɣa tegga u tiwyi tent i umas Amnun deg wexxam.

11 Nettat tessars i-tent zzates i macca. Netta iṭṭef i-tt, inna as: “As-dd, ṭṭeṣ-dd ɣari, učma!”

12 Maca nettat tenna as: “Lla, a uma, war d ayi tessexsarid ca, maɣar ammu war ittwagg di Israil. War ttegg ca řefḍiḥet-a!

13 Mani i ɣa uyureɣ di řefḍiḥet inu? U cek, cek ad tiřid d ijjen zeg ibuhařiyyen di Israil. Siweř maca ak-d ujeǧid, minzi netta war d ayi itteṭṭef xak.”

14 Maca Amnun war ixs ca ad ɣares iseř, maca ijhed xas uca issbehdeř i-tt, iṭṭeṣ akides.

15 Daweḥda nnes maca iɛiff i-tt s yijj n uɛiffi d ameqqran aṭṭas, minzi aɛiffi i zi tt iɛiff, tuɣa-t d tameqqrant x tayri i zi tuɣa tt iɛceq. Amnun inna as: “Kkar, aggʷej!”

16 Xenni inna as: “War din řesbab maḥend ad ayi tessekked. Tuɛeffna aya ad tiři ɛad d řɛib d ameqqran x min d ayi teggid.” Netta maca war ixs ad ɣares iseř.

17 Iřaɣa x uḥudri nnes wenni i xas ittsexxaren, inna as: “Sekk ta xafi ɣar barra u belleɛ tawwart awarni as!”

18 Nettat tuɣa xas arruḍ d aqarqac izewweq, maɣar ammu i yarḍent yessis n ujeǧid min ɣa kkent d tiɛzariyyin s řizarat. Amsexxar nnes yiwyi tt ɣar barra, ibelleɛ tawwart awarni as.

19 Tamar tzuzzar iɣɣeḍ x uzeǧif nnes u tcarreg arruḍ aqarqac izewwqen i tyarḍ nettat, tessars ifassen nnes x uzeǧif nnes uca tuyur tesɣuyyu.

20 Umas Abcalum isseqsa tt: “Ma tuɣa umam Amnun akidem? Xenni řexxu, učma, susem, netta d umam. War d am itteqqes bu řḥař!” U Tamar teqqim weḥḥdes di taddart n umas Abcalum. 21 Řami isřa ujeǧid Dawud x marra timesřayin-a, idweř ixeyyeq aṭṭas. 22 Abcalum war issiweř ɛad ak-d Amnun, war iǧi di tcuni uřa di tuɛeffna, maɣar Abcalum iɛiff Amnun minzi wanita tuɣa issbehdeř učmas Tamar.

23 Awarni řami ɛdun tnayen n iseggʷusa munen, imsar, aqa Abcalum tuɣa ɣares irewwan di Baɛl-Ḥaṣur nni iǧan ɣar Ifrayim u Abcalum iɛarḍ marra iḥenjiren n ujeǧid. 24 Yuyur Abcalum ɣar ujeǧid, inna: “Xzar, amsexxar nnek ɣares irewwan! Ejj ujeǧid s marra imsexxaren nnes ad uyuren ak-d umsexxar nnek.” 25 Maca ajeǧid yarra-dd x Abcalum: “LLa, a mmi, ejj aneɣ war dd-nettis marra, ḥima war xak nettegg ddqeř!” Netta izeyyar xas, maca netta war ixs akides yuyur uca ibarek i-t. 26 Xenni inna Abcalum: “Mařa lla, ejj Amnun ad kidneɣ yuyur!” Ajeǧid inna as: “Mayemmi akidek i ɣa yuyur?” 27 Umi xas izeyyar Abcalum, ijja Amnun d marra iḥenjiren n ujeǧid akides uyuren.

28 Abcalum yumur iḥudriyyen nnes, inna: “Ḥḍam, xmi i ɣa yarecceq uř n Amnun zi binu u necc ad awem iniɣ: ‘Wtem Amnun!’, xenni ittxeṣṣa kenniw ad t nɣem. War tteggʷedem ca! Ma necc simant inu war t umureɣ? Iřim d iryazen u iřim d ayt n umenɣi.” 29 Iḥudriyyen n Abcalum ggin ak-d Amnun am mammec i tuɣa xasen igga Abcalum. Xenni kkaren marra iḥenjiren n ujeǧid, nyin, kuř aryaz x usardun nnes, uca arewřen.

30 Umi nitni tuɣa aten ɛad deg webrid, imsar, aqa řexbar yiweḍ ɣar Dawud, nnan: “Abcalum inɣa marra iḥenjiren n Dawud, war iqqim uřa d ijjen zzaysen.” 31 Uca ikkar Dawud, icarreg arruḍ nnes uca izzeř x temmurt. Marra imsexxaren nnes bedden din ɣares s warruḍ nsen icarrgen. ^■   32 Yunadab maca, mmis n Cimɛa, umas n Dawud, issiweř, inna: “Ittxeṣṣa i sidi inu war ittɣiř deg ixef nnes, aqa marra iḥudriyyen, iḥenjiren n ujeǧid, ttwanɣen. Amnun waha i ittwanɣen, maɣar Abcalum igga aya di řbař nnes zeg wass i di issxarreg wanita učmas Tamar. 33 Ejj sidi inu ujeǧid war d as ittɣimi řḥař řexxu, ad yini: ‘Marra iḥenjiren n ujeǧid ttwanɣen!’, maɣar Amnun waha immut.”

34 Abcalum tuɣa yarweř u aḥudri wenni ittɛessan, issgeɛɛed tamuɣři nnes, u xzar, aqa iwdan aṭṭas usin-dd zeg webrid i iǧan awarni as zeg uɣezdis n wedrar. 35 Xenni inna Yunadab i ujeǧid: “Xzar din, iḥenjiren n ujeǧid i dd-ittasen. Aqa imsar am mammec inna umsexxar nnek.” 36 Uca imsar umi ikemmeř awař nnes, aqa xeḍren-dd iḥenjiren n ujeǧid. Nitni ssgeɛɛden tmijja nsen, run. Uřa d ajeǧid d marra imsexxaren nnes ksin deg imeṭṭawen.

37 Abcalum tuɣa yarweř, yuyur ɣar Talmay, mmis n Ɛammihud, ajeǧid n Jacur. Dawud icḍen x mmis marra ussan. 38 Abcalum tuɣa yarweř, yuyur ɣar Jacur. Dinni iqqim třata n iseggʷusa. 39 Aya issbedd ajeǧid Dawud maḥend ad iffeɣ i umenɣi ak-d Abcalum, maɣar netta issɛezza ixef nnes zi jjihet n řmewt n Amnun, maɣar wanita aqa immut.