1 Umi Yuwab, mmis n Ṣaruya, iḥekkar aqa uř n ujeǧid tuɣa ḍidd i Abcalum, 2 issekk Yuwab ijj n ureqqas ɣar Taquɛa uca ijja ad ssenni dd-awyen ict n temɣart d tamiɣist, inna as: “Ttzawgeɣ, egg axmi cem tceḍned, yarḍ arruḍ n wecḍan u war dehhen ixef nnem s zzect! Sneɛmiř am ict n temɣart nni iceḍnen x ijj n umettin aṭṭas n wussan. ^□   3 Adef ɣar ujeǧid u siweř akides awař-a wanita d ijjen.” Uca Yuwab inna as min ɣa tini.

4 Tamɣart zi Taqquɛa tenna i ujeǧid, am tewḍa s uɣembub nnes ɣar temmurt, tuḍar: “Senjem ayi, a ajeǧid!” 5 Inna as ujeǧid: “Min cem yuɣin?” Nettat tenna as: “S tidett necc d tajjač, aryaz inu immut. 6 Tamsexxart nnek tuɣa ɣares tnayen n iḥenjiren u nitni s tnayen idsen mmenɣen deg iyyar. Tuɣa war din uřa d ijj ad ten ibḍa. Xenni iwta ijjen wenneɣni uca inɣa i-t. 7 U xzar, marra řaǧ iɣewweɣ x temsexxart nnek, nnan: ‘Awi-dd wenni inɣin umas da, maḥend ad t nenneɣ di ssibbet n řeɛmar n umas wenni t inɣin u ammu i ɣa neqḍa uřa x wewrit.’ Ammu i xsen nitni ad ssxesyen ayenni n řefḥem itteḥduduqen i d ayi iqqimen ařami war ittɣimi i weryaz inu isem di temmurt qaɛ.”

8 Xenni inna ujeǧid i temɣart: “Uyur ɣar taddart! Necc ad ssuffɣeɣ řumurat xam.” 9 Maca tamɣart zi Taqquɛa tenna i ujeǧid: “Sidi inu ajeǧid, aqa řmuɛṣiyyet teǧa xafi u x taddart n baba. Ajeǧid d řɛarc nnes d imezdagen.”

10 Inna ujeǧid: “Awi ayi-dd wenni ɣar iǧa ca xam, ɣari u netta war ittɣimi ɛad ad cem iḥada.”

11 Nettat tenna: “Ejj ajeǧid ad ixarreṣ di SIDI, AREBBI nnek, ḥima wenni ixsen ad ixřef idammen war yarenni ɛad di arẓiyyet u war issuffuɣ mmi ɣar ṭṭarf.” Xenni inna netta: “S tidett am iddar SIDI, mařa uřa d ijj n uzeṭṭu n ucewwaf n uzeǧif n mmim ad iwḍa di temmurt!”

12 Xenni tenna temɣart: “Ttzawgeɣ, ejj tamsexxart nnek ad tini ɛad ijj n wawař i sidi.” Uca netta inna: “Siweř.”

13 Tamɣart tenna: “Mayemmi xenni tenwid ad tegged ammu ak-d řgens n AREBBI? Umi inna ujeǧid řexxu awař-a, aqa netta simant nnes am wenni di iǧa řɛib, minzi ajeǧid war dd-ittarri ɣares wenni t inḍaren.

14 Maɣar neccin marra ad nemmet, aqa neccin am waman ittwafarrɣen x temmurt, war nnyarwen. SIDI maca war ittekkes řeɛmar, ad ixarreṣ ḥima wenni zzayes ittwammenḍar, war ittɣimi immenḍar.

15 Xenni řexxu, necc usiɣ-dd da ḥima ad ssiwřeɣ awař-a ak-d ujeǧid, sidi inu, awař-a, minzi řgens issiggʷed ayi. Xenni tenna temsexxart nnek: ‘Ejj ayi ad ssiwřeɣ ak-d ujeǧid, ad taɣ ad igg ujeǧid min ɣa tini tayya nnes,

16 maɣar ajeǧid ad iseř ɣar tayya nnes maḥend ad tt ifekk zeg ufus n weryaz nni ixsen ad iteḥḥa necc d mmi zi tesɣart i ṭṭfeɣ zi AREBBI.’

17 Tamsexxart nnek tenna ɛawed: ‘Iři ad issyareyyeḥ wawař n sidi inu, ajeǧid, maɣar sidi inu, ajeǧid, igga am ijj n lmalak n AREBBI ařami ittesřa min iṣebḥen d min war iḥřin uca SIDI, AREBBI nnek, ad yiři akidek.’ ”

18 Ajeǧid yarra-dd xas, inna i temɣart: “War xafi teffar walu zi tmesřact i x cem i ɣa sseqsiɣ.” Tamɣart tenna: “Ejj sidi inu, ajeǧid, ad issiweř.”

19 Inna ujeǧid: “Ma Yuwab ɣares afus di marra man aya?” Tamɣart tarra-dd xas: “S tidett am iddar řeɛmar inu, sidi inu, ajeǧid, ma izemmar uřa d ijjen ad ibeɛɛed x marra min issiweř sidi inu ɣar yeffus niɣ ɣar uzeřmaḍ, ajeǧid! Wah, amsexxar nnek Yuwab d wenni d ayi yumuren. Netta igga marra awařen-a deg uqemmum n temsexxart nnek. 20 Aya igga i-t umsexxar nnek Yuwab, ḥima ad iwc i tmesřact ijj n uɣembub nneɣni. Maca sidi inu d amiɣis am ijj n umalak n AREBBI, ařami issen marra min ittemsaran di temmurt.”

21 Xas uca inna ujeǧid i Yuwab: “Xzar ɛafak, necc ggiɣ man aya. Uyur, awi-dd aḥudri Abcalum!” 22 Yuwab iwḍa x uɣembub nnes ɣar temmurt, yuḍar uca iqada i ujeǧid. Uca inna Yuwab: “Ass-a issen umsexxar nnek, aqa ufiɣ arḍa di tiṭṭawin nnek, sidi inu, ajeǧid, minzi ajeǧid igga ɣar wawař n umsexxar nnes.” 23 Ikkar Yuwab uca yuyur ɣar Jacur u yiwiḍ ɣar Urcalim ak-d Abcalum. 24 Inna ujeǧid: “Ejj i-t ad iɛqeb ɣar taddart nnes. Udem inu maca war t iẓẓar.” Xenni iɛqeb Abcalum ɣar taddart nnes, war iẓri udem n ujeǧid.

25 Di marra Israil war iǧi uřa d ijj n weryaz icewwar amecnaw Abcalum ařami ittwasuɛřa aṭṭas. Zi tařeqqa n iḍaren ɣares ař tqiccit n uzeǧif nnes war dayes uřa d ijj n řɛib. 26 Mařa netta iḥeff acewwaf nnes - maɣar netta tuɣa innum ad t iḥeff ɣar uneggar n wussan ɛlaḥsab ussan n kuř asseggʷas minzi tuɣa iddekkwař idqeř xas - xenni iḥeff u iwzen acewwaf n uzeǧif nnes. Tuɣa řewzen n ucewwaf mitayen n iciqlen ɛlaḥsab řewzen n ujeǧid. 27 Ttwarwen-dd třata n iḥenjiren i Abcalum d ict n yeǧis qqaren as Tamar. Nettat d ict n temɣart dayes aẓri.

28 Abcalum izdeɣ tnayen n iseggʷusa di Urcalim. Netta war iẓri udem n ujeǧid. 29 Xenni issekk Abcalum ijj n ureqqas ɣar Yuwab, ḥima ad t issekk ɣar ujeǧid, maca netta war ixs ad ɣares dd-yas. Uca issekk ict n twařa nneɣnit, maca netta war ixs ad dd-yas. 30 Xenni inna i imsexxaren nnes: “Xzarem, iyyar n Yuwab i iǧan x uɣezdis n wenni inu u netta iẓẓu dinni imendi. Uyurem din, qqedem as timessi!” Uca imsexxaren n Abcalum qqden timessi i iyyar nni.

31 Xas uca ikkar Yuwab uca issijj x Abcalum di taddart nnes, inna as: “Mayemmi qqden imsexxaren nnek timessi i ureqqiɛ n iyyar i iǧan inu?” 32 Abcalum inna i Yuwab: “Xzar, necc ssekkeɣ-dd ɣarek ḥima ad ac iniɣ: ‘As-dd da, ḥima ad cek ssekkeɣ ɣar ujeǧid ad tinid: Min ɣar dd-usiɣ da zi Jacur? Mliḥ i necc mři dinni qqimeɣ.’ Xenni řexxu ittxeṣṣa ad ẓareɣ udem n ujeǧid. Mařa dayi ɛad řmuɛṣiyyet, ejj i-t ad ayi ineɣ.” 33 Xenni yuyur Yuwab ɣar ujeǧid, inna as aya. U wanita iřaɣa-dd x Abcalum uca yudef netta ɣar ujeǧid, yuḍar zzates s uɣembub nnes ɣar temmurt, zzat i uɣembub n ujeǧid, uca ajeǧid issudem Abcalum.