1 Awarni i uya imsar, aqa Abcalum ijja ad as idebbaran ijj n ukarru d iysan d xemsin n yeryazen inni ittazzřen ɣar zzat nnes. 2 Tuɣa ittekkar Abcalum zic ɣar tuffut n řḥař uca ibedd xenni ɣar uɣezdis n webrid ɣar tewwart n tendint. Uca imsar, meřmi ma ixs ijj n weryaz ad iraḥ s ict n ddeɛwet ɣar ujeǧid i ccreɛ, iřaɣa-dd xas ɣares, inna: “Zi man tandint cek?” Mařa wanita xenni yarra-dd: “Amsexxar nnek zeg ict zi tqebbař n Israil”, 3 inna as Abcalum: “Xzar, timesřayin nnek mliḥ u nican, maca ɣar ujeǧid war iǧi uřa d ijj wenni ɣarek ɣa isřen.” 4 Abcalum yarni inna: “Man wen d ayi ɣa iggen d řqaḍi di temmurt, maḥend kuř aryaz wenni ɣar iǧa umcubbec niɣ ddeɛwet, ad ɣari dd-yas, necc ad as aɣeɣ tasɣart?” ^□   5 Mařa iqarreb-dd ɣares ijj n weryaz ḥima ad as yuḍar, imsar, isswiẓẓeḍ afus nnes, iṭṭef i-t uca issudem i-t. 6 Ammu igga Abcalum ɣar marra inni iǧan zi Israil, inni dd-yusin i ccreɛ ɣar ujeǧid. Ammu yucar Abcalum uř n yeryazen n Israil.

7 Awarni i arebɛin n iseggʷusa imsar aqa Abcalum inna i ujeǧid: “Ejj ayi ad uyureɣ, ad ssqefřeɣ di Ḥabrun lwaɛd inu i waɛdeɣ i SIDI. 8 Maɣar amsexxar nnek igga ijj n lwaɛd umi tuɣa zeddɣeɣ ɛad di Jacur di Aram, nniɣ: ‘Mařa SIDI ijja ayi s tidett ad dd-dewřeɣ ɣar Urcalim, xenni ad xedmeɣ i SIDI.’ ” 9 Xenni inna as ujeǧid: “Uyur di řehna!” Ikkar netta uca yuyur ɣar Ḥabrun.

10 Abcalum maca issekk ireqqasen s tazřa ɣar marra tiqebbař n Israil ḥima ad inin: “Mařa kenniw tesřam i uṣuḍi deg uyicc n icarri, xenni ittxeṣṣa ad tinim: ‘Abcalum d ajeǧid di Ḥabrun.’ ”

11 Zi Urcalim uyuren ak-d Abcalum mitayen n yeryazen inni ittwaɛarḍen. Nitni uyuren akides di řehna nsen, war ssinen x walu.

12 Řami din iqeddem tiɣarṣa, issekk Abcalum ɛawed ɣar Axitufil, Ajiluwi, wenni d amcawar n Dawud, zi tendint nnes, zi Jilu. Ammu i tedweř tmeɛmuč tmeqqar uca immarni řgens i iǧan ɣar Abcalum.

13 Xenni dd-yusa ijj n ureqqas ɣar Dawud, inna: “Uř n kuř aryaz idweř ak-d Abcalum!”

14 Xenni inna Dawud i marra imsexxaren nnes, inni tuɣa ɣares iǧan di Urcalim: “Kkarem, ad narweř, maɣar war ittɣimi ɣarneɣ uřa d ijjen ad injem zzat i wudem n Abcalum. Deɣyam deg wuffuɣ niɣ netta ad iqeǧeb ad xaneɣ iḥart, ad dayneɣ igg tuɛeffna uca ad iwwet tandint-a s řeqḍeɛ n ssif.”

15 Xenni nnan imsexxaren n ujeǧid i ujeǧid: “Xzar, imsexxaren nnek ad ggen ɛlaḥsab marra min ɣa ixḍar sidi inu, ajeǧid.”

16 Ammu i iffeɣ ujeǧid zi tendint, ak-d marra taddart nnes deg iṣuraf nnes. Ajeǧid ijja ɛecra n tiyya maḥend ad ḥḍant taddart.

17 Umi dd-iffeɣ ujeǧid zi tendint ak-d marra řgens nnes deg iṣuraf nnes, qqimen nitni bedden ɣar Taddart n Řaggʷaj.

18 Marra imsexxaren ɛdun xas uřa d iɛessasen n arrimet nnes marra u marra ireqqasen nnes n tazřa, uřa d marra Ijattiyyen, setta-mya n yeryazen nni dd-yusin deg iṣuraf nnes zi Jat, aqa kkin zzat i wudem n ujeǧid. ^■  

19 Xenni inna ujeǧid i Ittay, Ajitti: “Mayemmi texsed uřa d cek ad tuyured akidneɣ? Ɛqeb u qqim ɣar ujeǧid, maɣar cek d ijj n ubarrani, aqa cek beɛda tᵉttwasuffɣed zi temmurt nnek. 20 Iḍennaḍ i dd-tusid cek. Ma necc ad cek awyeɣ akidneɣ ass-a ḥima ad dd-teffɣed ɛawed, umi i ɣa uyureɣ necc mani ma i xseɣ ad řaḥeɣ. Ɛqeb, awi-dd akidek aytmac. Ad kidek tiři tmexsiwt icewwaren.” 21 Maca Ittay inna i ujeǧid, inna: “S tidett am iddar SIDI u iddar sidi inu ajeǧid, deg wemcan mani i ɣa yiři sidi inu, ajeǧid, ma immut niɣ iddar, dinni i ɣa yiři uřa d amsexxar nnek!” 22 Xenni inna Dawud i Ittay: “Uyur, ẓwa-dd!” Xenni ikka xas Ittay, Ajitti, ak-d marra iryazen nnes d iḥenjiren i ɣares iǧan. 23 Marra temmurt tru umi ikka řgens. Ajeǧid iẓwa tiɣzart n Qidrun uřa d marra řgens iẓwa, ṭṭfen abrid n řexřa. ^■  

24 Aqa din uřa d Ṣaduq d marra Ilawiyyen inni yarbun Ttabut n Řɛahd akides. Nitni ssarsen Ttabut n AREBBI u Abyatar igeɛɛed din ɣares ařami iqfeř uɛeddu n marra řgens zi tendint. 25 Xenni inna ujeǧid i Ṣaduq: “Arr Ttabut n AREBBI ɣar tendint. Mařa necc ufiɣ arḍa zzat i tiṭṭawin n SIDI, xenni Netta ad ayi dd-yarr ɣar da, ad ayi ijj ad ẓarɣ Ttabut ɛawed uřa d Tazeddiɣt. 26 Maca mařa Netta ad yini: ‘Cek war d ayi dd-tusid x řxaḍar!’, aqa ayi da, ejj i-t ad kidi igg min ittwařa d aṣebḥan di tiṭṭawin nnes.”

27 Yarenni inna ujeǧid i ukehhan Ṣaduq: “Ma war teǧid cek d amwařaw? Ɛqeb di řehna ɣar temmurt nnek d tnayen n iḥenjiren nwem akidwem: mmic Aximaɛaz, d Yunatan, mmis n Abyatar. ^□   28 Xzar, necc ad rajiɣ di řexřa ɣar manis ẓekkwan x L’Urdun, ɣares ař dd ɣa tas tebrat zzaywem ɣari.” 29 Xas uca yiwyi Ṣaduq ak-d Abyatar Ttabut n AREBBI ɣar Urcalim uca qqimen dinni.

30 Dawud igeɛɛed tasawent n wedrar n Zzitun. Iru am dd-igeɛɛed. Tuɣa azeǧif nnes ireḥḥef, yuyur x iḍaren s řeḥfa. Uřa d marra řgens i ɣares, kuř aryaz zzayes ireḥḥef azeǧif nnes uca geɛɛden u run am geɛɛden. 31 Xenni ḥajan as i Dawud uca nnan: “Axitufil tuɣa-t jar inni iggin tameɛmuč x uɣezdis n Abcalum.” Uca inna Dawud: “A SIDI, senneḍ ddunect n Axitufil.”

32 Řami Dawud yiweḍ ɣar tqiccet n wedrar, imsar aqa yuḍar netta zzat i AREBBI. U xzar, yusa-dd Ḥucay, Ayarki, i umsagar akides s warruḍ icarrgen u s ucař x uzeǧif nnes. 33 Dawud inna as: “Mařa cek teẓwid akidi, ad xafi tiřid d ddqeř. 34 Mařa maca cek tɛeqbed ɣar tendint, ad tinid i Abcalum: ‘Necc ad iřiɣ d amsexxar nnek, a ajeǧid! Tuɣa ayi zic d amsexxar n babac, řexxu maca ad iřiɣ d amsexxar nnek!’, xenni tzemmared ad tbeḍřed ccwar n Axitufil. 35 Ma war dinni ɣarek ikehhanen Ṣaduq d Abyatar? Ad imsar ad tɛawded marra min ɣa tesřed zi taddart n ujeǧid i ikehhanen Ṣaduq d Abyatar. 36 Aqa nitni ɣarsen dinni tnayen n iḥenjiren nsen, Aximaɛaṣ, mmis n Ṣaduq, d Yunatan, mmis n Abyatar. Ad ayi-dd tessiwḍem marra awař i tesřim zzaysen.”

37 Uca Ḥucay, ameddukkeř n Dawud, yudef ɣar tendint uca uřa d Abcalum yudef ɣar Urcalim.