1 Umi iɛdu Dawud cwayt x tqiccet n wedrar, iffeɣ Ṣiba, amsexxar n Mafibucat, i umsagar akides s ict n tyuya n yeɣyař bardɛen, ttwassarsen xasen mitayen n iɣrumen, mya n iɣrumen n zzbib u mya n tini n unebdu d ict n tecyart dayes binu. ^□   2 Inna ujeǧid i Ṣiba: “Min texsed ad tegged s uya?” Inna Ṣiba: “Iɣyař i taddart n ujeǧid ḥima ad xasen nyen u aɣrum d tini n unebdu i iḥudriyyen ḥima ad ccen u binu i yenni yuḥřen di řexřa ḥima ad swen.” 3 Xenni inna ujeǧid: “Mani iǧa mmis n sidi nnek?” Inna Ṣiba i ujeǧid: “Xzar, netta iqqim di Urcalim, maɣar netta inna: ‘Ass-a taddart n Israil ad ayi dd-tarr tageldit n baba.’ ” ^■   4 Xenni inna ujeǧid i Ṣiba: “Xzar, marra min iǧan n Mafibucat, ad yiři nnek!” Ṣiba inna: “Necc uḍareɣ, mři ufiɣ arḍa di tiṭṭawin nnek, sidi inu, ajeǧid!”

5 Umi dd-yusa ujeǧid Dawud ɣar Baḥurim, iẓra ijj n weryaz iffeɣ-dd ssenni zi řaǧ n taddart n Cawul. Qqaren as Cimɛi, mmis n Jira. Netta iggur am ineɛɛeř. ^■   6 Netta iḥejjar Dawud d marra imsexxaren n ujeǧid Dawud s yeẓra, am řgens marra d marra ayt n bu-teɣruḍt bedden zzates ɣar yeffus d uzeřmaḍ. 7 Ammu i iqqar Cimɛi am t ineɛɛeř: “Aggʷej, aggʷej, cek, aryaz n usizzeř n idammen d weryaz i war isekkwin! 8 SIDI issiweḍ xak marra idammen n taddart n Cawul wenni deg wemcan nnes i tḥekmed. SIDI iwca tageldit deg ifassen n mmic Abcalum. Xzar man aya iffeɣ-dd zi tuɛeffna nnek umi cek d ijj n weryaz n usizzeř n idammen.” 9 Xenni inna Abicay, mmis n Ṣaruya, i ujeǧid: “Mayemmi i ɣa inɛeř weqzin-a immuten, sidi inu, ajeǧid? Ejj ayi ad din ẓwiɣ, ad as qesseɣ azeǧif.” ^■  

10 Maca ajeǧid inna: “Min din jar ayi d kenniw, iḥenjiren n Ṣaruya? Aqa netta inɛeř, umi d as inna SIDI: ‘Nɛeř Dawud!’ Man wen izemmaren xenni ad yini: ‘Mayemmi i teggid aya?’ ”

11 Dawud yarni inna i Abicay d marra imsexxaren nnes: “Xzarem, mmi wenni dd-iffɣen zi ddat inu, yarezzu ad ayi ineɣ. Mahu xenni řexxu Abinyamini aya? Jjem t ad inɛeř, minzi SIDI i d as t innan.

12 Ad taɣ SIDI ad ittwařa ddenb inu uca ad ayi dd-yarr SIDI taṣebḥant i nneɛřet nnes n wass-a.”

13 Dawud ak-d yeryazen nnes ṭṭfen abrid u Cimɛi yuyur arendad nnes ɣar uɣezdis nneɣni n tewrirt, am ineɛɛeř u ittḥejjar Dawud s yeẓra uca igga taɛejjajt ad tḍuw.

14 Yiweḍ-dd ujeǧid ak-d marra řgens i ɣares ɣar Ayafim. Dinni izemmar ad yarr nnefs ɛawed.

15 Abcalum ak-d marra řgens, iryazen n Israil, usin-dd ɣar Urcalim u Axitufil tuɣa-t ɣares.

16 Umi i dd-yusa Ḥucay, Ayarki, ameddukkeř n Dawud ɣar Abcalum, imsar belli Ḥucay inna i Abcalum: “Tudart i ujeǧid, tudart i ujeǧid!”

17 Abcalum inna i Ḥucay: “Ma d man aya xenni d ijj n wescan n tmexsiwt icewwaren i umeddukkeř nnek? Mayemmi war triḥed ak-d umeddukkeř nnek?”

18 Ḥucay inna i Abcalum: “Lla, necc ad iřiɣ n wenni ittwafarzen zi SIDI u zi marra řgens-a u zi marra iryazen n Israil u necc ad ɣares qqimeɣ.

19 I umi ɣa sexxareɣ xenni? Ma war ittiři zzat i wudem n mmis? Am mammec necc xedmeɣ zzat i wudem n babac, ammu i ɣa iřiɣ zzat i wudem nnek.” 20 Abcalum inna i Axitufil: “Ewcet ccwar, min ɣa negg?” 21 Axitufil inna i Abcalum: “Adef ɣar tiyya n babac tinni ijja awarni as ḥima ad ḥḍant taddart. Ammu i ɣa iseř marra Israil, aqa cek tessarzged ixef nnek ɣar babac uca ad ttwasjehden ifassen n marra inni akidek iǧan.” 22 Wtin i Abcalum ict n tqiḍunt x tzeqqa u Abcalum yudef ɣar tiyya n babas zzat i tiṭṭawin n marra Israil. 23 Deg wussan nni ittwaḥseb ccwar n Axitufil axmi ijjen yarezzu awař n AREBBI. Ammu i yeǧa s marra ccwar n Axitufil, am ɣar Dawud am ɣar Abcalum.