1 Axitufil inna i Abcalum: “Ejj ayi ad farzeɣ tenɛac-ařef n yeryazen, ad sswejdeɣ i ixef inu ḥima ad ḍfareɣ Dawud ǧiřet-a. 2 Xenni necc ad xas hejmeɣ, mintra ifassen nnes ɛad uḥřen u ḍeɛfen. Ad t ssiggʷideɣ u marra řgens i ɣares iǧan ggur ad yarweř. Xenni necc ad nɣeɣ ajeǧid, netta waha. 3 Ad ɣarek dd-arreɣ marra řgens. Aryaz i x tarezzud aqa-t amecnaw adwař n yewdan marra: marra řgens ad ɣares yiři řehna.” 4 Tuɣa aya d ijj n wawař nican di tiṭṭawin n Abcalum u di tiṭṭawin n marra imɣaren n Israil.

5 Inna Abcalum: “Řaɣat uřa i Ḥucay, Ayarki. Ejj aneɣ ad ɣares nseř ɛawed min ɣa yini.” 6 Umi dd-yudef Ḥucay, issiweř Abcalum akides, inna: “Ammu i issiweř Axitufil. Ma ad negg am min iqqar wawař nnes? Mařa war iǧi ammu, xenni siweř cek!” 7 Xenni inna Ḥucay i Abcalum: “Twařat-a ccwar nni iwcin Axitufil war iǧi mliḥ.” 8 Yarni Ḥucay inna: “Cek tessned aqa babac d yeryazen nnes nitni d ayt n bu-teɣruḍt u aqa řeɛmar nsen yarzeg am ijj n ddub di řexřa, wenni umi ittwacar wenjuɣ. Babac d ijj n weryaz aɛeskari u netta war ittnusi ak-d řgens. 9 Aqa řexxu innuffar deg ijj zeg ifran niɣ deg ijj zeg imucan n tnuffra. Mařa ɣar umezwaru wḍan ca zzaysen, xenni marra wi t ɣa isřen, ad yini: ‘Aqa din ict n tecti di řgens nni iḍfaren Abcalum.’

10 Xenni ɛad wenni dd-ixeřqen i umenɣi, wenni uř nnes am wuř n ijj n weyrad, ad ifceř deɣya, maɣar marra Israil issen aqa babac d ijj n bu-teɣřuḍt u ɣares ayt n umenɣi.

11 S uyenni ad ac ssecneɣ ad tessmuned deɣya marra Israil zi Dan ař Bi’r-Sebɛa, ijj n ubarru aṭṭas am ijdi ɣar tma n řebḥar, u cek ad kidsen teffɣed di řwest nsen.

12 Xenni neccin ad xas nehjem deg ijj zeg imucan n tnuffra mani i ɣa ittwaf. Ad xas nehjem amecnaw iweṭṭa nnda x temmurt. War ittɣimi uřa d ijjen zzayes u zi marra iryazen inni ɣares iǧan.

13 Mařa netta ad issmun ixef nnes di ca n tendint, marra Israil ad kkaren ad awyen iseɣwan ɣar tendint nni, ad tt njarr di teɣzurt ařami war zzayes ittwaf uřa d ijj n weẓru ɛad.”

14 Xenni inna Abcalum uřa d marra iryazen n Israil: “Ccwar n Ayarki Ḥucay iḥřa x ccwar n Axitufil.” Aqa SIDI tuɣa yumur ad beḍřen ccwar n lemliḥ n Axitufil, ḥima SIDI ad yawi tuɛeffna x Abcalum.

15 Uca inna Ḥucay i ikehhanen Ṣaduq d Abyatar: “Ta d ta tuɣa ittcawar Axitufil i Abcalum d imɣaren n Israil, maca d ta d ta ixef ttweṣṣiɣ necc.

16 Xenni řexxu, sekk deɣya ijj n ureqqas maḥend ad ixebbar i Dawud, ad yini: “War sens ǧiřet-a deg imucan n uẓekkwu n řexřa. Ẓwa deɣya, niɣ ad ittwaṣarḍ ujeǧid d marra řgens i ɣares iǧan.”

17 Maca Yunatan d Aximaɛaṣ qqimen bedden ɣar tařa n Rujal. Ict n tesmeɣt tuyur dinni, tḥaja asen tt. Nitni uyuren u ḥajan tt i ujeǧid Dawud. Tuɣa war izemmar ad ten ẓaren iwdan am ttadfen nitni ɣar tandint.

18 Waxxa amenni ijj n uḥudri iẓra i-ten uca iḥaja t i Abcalum. Maca ina s tnayen idsen uzzřen, usin-dd ɣar taddart n ijj n weryaz di Baḥurim wenni tuɣa ɣar iǧa ijj n wanu di řemraḥ. Nitni ḍrin dayes.

19 Tamɣart teksi tazarbeč uca tessars i-tt x uqemmum n wanu uca tareyyec xas iwzan i ittwaqeccaren n imendi. Ammu i war dd-tbin tmesřact. 20 Řami imsexxaren n Abcalum usin-dd ɣar temɣart di taddart, sseqsan tt: “Mani iǧa Aximaɛaṣ d Yunatan?” Tamɣart tarra-dd xasen: “Nitni ẓwan tiɣzart nni.” Nitni ffɣen arzun, war ten ufin. Xenni ɛeqben ɣar Urcalim.

21 Awarni i umi tuɣa nitni uyuren, imsar, nitni geɛɛden zeg wanu, uyuren, xebbaren aya i ujeǧid Dawud. Nitni nnan i Dawud: “Kkarem, ẓwam aman deɣya, maɣar ta d ccwar i xawem igga Axitufil.”

22 Ikkar Dawud ak-d marra řgens i ɣares iǧan u nitni ẓwan L'Urdun. Ɣar tfawt n tuffut n wass, tuɣa war din ɛad uřa d ijjen war iẓwi L'Urdun. 23 Umi Axitufil iẓra, aqa ccwar nnes ittwabeṭṭeř, ibardeɛ netta i weɣyuř nnes, ikkar, yuyur ɣar taddart nnes di tendint nnes. Netta yumur i taddart nnes uca xenni yuyeř ixef nnes. Ammu i immut u ittwanḍeř deg wenḍeř n babas.

24 Dawud yiweḍ ɣar Maḥanayim u Abcalum iẓwa L'Urdun, netta d marra iryazen n Israil akides. 25 Abcalum tuɣa igga Ɛamasa x řɛeskar deg wemcan n Yuwab. Ɛamasa tuɣa d mmis n ijj n weryaz qqaren as Yitra, Ayisraili, wenni tuɣa yudfen ɣar Abijayil, yeǧis n Naḥac, učmas n Ṣaruya, yemmas n Yuwab. 26 Israil d Abcalum wtin iqiḍan nsen di temmurt n Jilɛad.

27 Umi dd-yusa Dawud ɣar Maḥanayim, imsar, aqa Cubi, mmis n Naḥac, zi Rabba, zeg ayt n Ɛammun, d Maxir, mmis n Ɛammiyil zi Lu-Dabar, d Barzilay, Ajilɛadi zi Rujalim, ^■   28 iwyen ifarracen d ṭṭbaṣi d iqdiḥen n třaxt d irden d imendi d waren, aqa qřan, uca ibawen d řeɛdes, aqa uřa d nitni qřan, 29 d tamment d ddhen d wuǧi d trussi n tfunasin ɣar Dawud d řgens i ɣares iǧan maḥend ad ccen. Maɣar nnan: “Řgens iǧuẓ, iheyyef, iffud din di řexřa.”