1 Isedd Dawud řgens nni tuɣa ɣares iǧan u igga xasen imeqqranen x wařef d imeqqranen x mya. 2 Dawud issekk řgens. Ict n tuřut zzaysen sadu ufus n Yuwab, ict n ttuřut sadu ufus n Abicay, mmis n Ṣaruya, umas n Yuwab, d ict n tuřut sadu afus n Ittay, Ajitti. Inna ujeǧid i řgens: “Uřa d necc ad akidwem ffɣeɣ ɣar umenɣi.” 3 Maca řgens inna: “Cek war akidneɣ teffɣeḍ ca ɣar umenɣi, maɣar mařa neccin narweř s tidett, war akidneɣ řehhin. Mařa azyen zzayneɣ immut, war akidneɣ řehhin. Maɣar cek řexxu tsekkwʷid am ɛecra n řuřuf zzayneɣ. S uyenni řexxu mlih, mařa cek ad aneɣ tewced afus zi tendint.” 4 Xenni inna asen ujeǧid: “Necc ad ggeɣ min tᵉttwařam mliḥ di tiṭṭawin nwem!” Ajeǧid ibedd ɣar tewwart n tendint u marra řgens iffeɣ s řmyawat d řuřuf. 5 Yumur ujeǧid i Yuwab, Abicay d Ittay: “Egg s uḥaweř ak-d uḥudri, ak-d Abcalum, di ṭṭweɛ inu.” Marra řgens isřa i ujeǧid am yumur marra ikumandaren x Abcalum.

6 Řgens iffeɣ ɣar iyyar, ɣar umsagar ak-d Israil. Amenɣi ikkar deg wezɣar n Ifrayim. ^□   7 Ittwaɣelleb din x řgens n Israil zzat i wudem n imsexxaren n Dawud. Deg wass nni temsar din ict n tecti tameqqrant ařami wḍan ɛicrin-ařef n yeryazen. 8 Amenɣi iffeɣ ssenni di marra jjwayeh. Deg wass nni iṣarḍ wezɣar iryazen zi řgens ktar zeg inni iṣarḍ ssif.

9 Imsar Abcalum ibedd tiṭṭ di tiṭṭ ak-d imsexxaren n Dawud. Abcalum inya x ijj n userdun. Umi aserdun yuyur sadu řefruɛ imcubbcen n yict n tcejjart n yigg ameqqran, innuɣ netta s uzeǧif nnes di tcejjart n yigg ařami iqqim ittenyuyuř jar ujenna d temmurt d userdun yuyur swadday nnes.

10 Ijj n weryaz iẓri t, iḥaja t i Yuwab, inna: “Xzar, necc ẓriɣ Abcalum yuyeř ɣar ict n tcejjart n yigg.”

11 Inna Yuwab i weryaz i d as iḥajan aya: “Xzar, cek teẓrid t, mayemmi war t teẓwiḍed ca dinni ɣar temmurt? Xenni ad yiři d necc ad ac wceɣ ɛecra n uqiyyat n nnuqart d ijj n webyas!”

12 Inna weryaz i Yuwab: “War wezzneɣ uřa d ařef n uqiyyat n nnuqart deg ifassen inu, war sswiẓẓiḍeɣ afus inu x mmis n ujeǧid maɣar ajeǧid yumur i cek d Abicay d Ittay deg imezzuɣen n řgens, inna: ‘Ejj kuř ijj ad iḥḍa x uḥuḍri Abcalum!’

13 Niɣ ad as ggiɣ s ixef inu ẓur - aqa i ujeǧid war teqqim uřa d ict n řḥajjet txemmeř - xenni ad tiřid cek ḍidd inu.”

14 Xenni inna Yuwab: “Necc war xak ttrajiɣ.” U netta iksi třata n fřitcat, ijju as ten deg wuř n Abcalum, am netta ɛad iddar dinni di řwest n tcejjart n yigg.

15 Ɛecra n iḥudriyyen inni d as yarebbun řesnaḥ i Yuwab, nnḍen as uca wtin Abcalum, nɣin t.

16 Xenni iṣuḍ Yuwab deg uyicc n icarri uca iɛqeb-dd řgens marra zeg weḍfar n Israil, minzi Yuwab ixs ad iḥaweř x řgens.

17 Nitni ksin Abcalum, nḍaren t deg wezɣar di tesraft tuǧeɣ u ssarbun xas ijj n uɛurric n yeẓra imɣar aṭṭas. Marra Israil iṭṭef di tarewřa, kuř aryaz ɣar iqiḍan nnes.

18 Umi tuɣa iddar, iksi Abcalum i yixef nnes ijj n umayḍu iqeddsen, issbedd i-t di Teɣzurt n Ujeǧid, minzi inna: “Necc war ɣari bu mmi i ɣa issɛeqřen isem inu.” Netta iřaɣa as i umayḍu nni s yisem nnes. Ɣares ař ass-a qqaren as i umayḍu nni ‘afus n Abcalum’.

19 Xenni inna Aximaɛaṣ, mmis n Ṣaduq: “Ejj ayi ad azzřeɣ ɣar ujeǧid ad as ssiwḍeɣ řexbar aṣebḥan, aqa SIDI iḥḍa t zeg ifassen n řɛedyan nnes.” 20 Maca Yuwab inna as: “Ass-a war tessiwḍed ca řexbar aṣebḥan, maca deg ijj n wass nneɣni tzemmared ad tessiwḍed řexbar aṣebḥan. Ass-a war tessiwḍed areqqas d aṣebḥan maɣar mmis n ujeǧid immut.” 21 Inna Yuwab i Kuci: “Uyur, ini i ujeǧid, min teẓrid cek!” Kuci yuḍar zzat i Yuwab, uca xenni yuzzeř. 22 Xenni Aximaɛaṣ, mmis n Ṣaduq, inna ict n twařa nneɣnit i Yuwab: “Ad dd-yas wi ixsen, ejj ayi uřa d necc ad azzřeɣ awarni i Kuci!” Inna Yuwab: “Mayemmi texsed ɛad ad tazzřed, a mmi? War ittwaf ɛad areqqas d aṣebḥan i cek!” 23 Inna: “Ad dd-yas wi ixsen, necc xseɣ ad din azzřeɣ.” Xenni inna as Yuwab: “Azzeř!” Uca Aximaɛaṣ yuzzeř x webrid n udewwar n L'Urdun uca izzar netta Kuci.

24 Dawud iqqim jar tnayen n tewwura n tendint. Aɛessas igeɛɛed tazeqqa n tewwart i iǧan ɣar řḥiḍ, issgeɛɛed tamuɣři nnes, iceyyeɛ, iẓra ijj n weryaz ittazzeř, netta weḥḥdes. 25 Aɛessas iřaɣa, inna i-t i ujeǧid. Ajeǧid inna: “Mařa netta weḥḥdes, xenni ad yaweḍ ijj n ureqqas d aṣebḥan!” Yarni iqarreb-dd weryaz. 26 Xenni iẓra uɛessas ɛad ijj n weryaz nneɣni ittazzeř uca iřaɣa ɣar uɛessas n tewwart, inna: “Aqa, iggur-dd ɛad ijj n weryaz, uřa d netta weḥḥdes.” Ajeǧid inna: “Uřa d netta ad yaweḍ ijj n řexbar d aṣebḥan.” 27 Aɛessas inna ɛawed: “Necc ttwařiɣ amezwaru iggur am Aximaɛaṣ, mmis n Ṣaduq.” Inna ujeǧid: “Wa d ijj n weryaz iṣbeḥ, netta ad dd-yas s yijj n ureqqas d aṣebḥan.” 28 Aximaɛaṣ iřaɣa, inna i ujeǧid: “Řehna!” U netta yuḍar zzat i ujeǧid s uɣembub nnes ɣar temmurt, inna: “Ad ittwabarek SIDI, AREBBI nnek, wenni d ac isellmen iryazen, inni igeɛɛden afus nsen x sidi inu, ajeǧid.” 29 Inna ujeǧid: “Ma aḥudri, Abcalum, aqa-t mliḥ?” Inna Aximaɛaṣ: “Necc ẓriɣ ijj n ubarru ameqqran, umi Yuwab, amsexxar n ujeǧid, issekk amsexxar nnek, maca necc war ssineɣ min imsaren.” 30 Inna ujeǧid: “Ḥeyyed ɣar uɣezdis, bedd da!” U netta iḥeyyed ɣar uɣezdis, iqqim ibedd dinni. 31 Uca xzar, yusa-dd uřa d Kuci u Kuci inna: “Xzar, ijj n řexbar d aṣebḥan i sidi inu, ajeǧid. SIDI iḥḍa cek zeg ufus n marra inni xak iɣewwɣen.” 32 Xenni inna ujeǧid i Kuci: “Ma aḥudri, Abcalum, aqa-t mliḥ?” Inna Kuci: “Iři ad dewřen marra řɛedyan n sidi inu, ajeǧid, d marra inni xak iɣewwɣen maḥend ad cek ggen tuɛeffna am uḥuḍri.”