1 Ina d ayt n Israil ak-d řqedd nsen, izeǧifen jar ibabaten n řaǧat, u řqebṭanat x wařef d imeqqranen x mya ak-d iweqqafen nsen, inni tuɣa ittsexxaren i ujeǧid di marra timesřayin n terbiɛin, am man wen i dd-ittasen, am man wen ittraḥen, u man aya zeg uyur ař uyur nneɣni di marra iyuren n useggʷas. Ict n terbiɛt dayes arebɛa u-ɛicrin-ařef n yeryazen.

2 Yasubɛam, mmis n Zabdiyil, tuɣa x terbiɛt tamezwarut i uyur wiss amezwaru. Tarbiɛt nnes dayes arebɛa u-ɛicrin-ařef n yeryazen.

3 Netta tuɣa zeg iḥenjiren n Fariṣ. Netta d azeǧif n marra ikumandaren n řɛeskar deg uyur amezwaru.

4 Duday, Axuxi, tuɣa x terbiɛt n uyur wiss tnayen. Miqlut d ameḥday n terbiɛt nnes. Tarbiɛt nnes dayes arebɛa u-ɛicrin-ařef n yeryazen.

5 Banaya, mmis n Yahuyadaɛ, akehhan ameqqran tuɣa d akumandar wiss třata n řɛeskar i uyur wiss třata. Tarbiɛt nnes dayes arebɛa u-ɛicrin-ařef n yeryazen.

6 Banaya wa tuɣa d bu-teɣruḍt n třatin u netta tuɣa x třatin. Mmis Ɛammizabad tuɣa x terbiɛt nnes.

7 Ɛasayil, mmis n Yuwab, d wiss arebɛa i uyur wiss arebɛa u mmis Zabadya tuɣa awarni as. Tarbiɛt nnes dayes arebɛa u-ɛicrin-ařef n yeryazen.

8 Camḥut, Ayazaraḥi, akumandar, tuɣa x terbiɛt wiss xemsa i uyur wiss xemsa. Tarbiɛt nnes dayes arebɛa u-ɛicrin-ařef n yeryazen.

9 Ɛira, mmis n Ɛiqqis, Atiquɛi, tuɣa d wiss setta i uyur wiss setta. Tarbiɛt nnes dayes arebɛa u-ɛicrin-ařef n yeryazen.

10 Ḥaliṣ, Afalituni, zeg iḥenjiren n Ifrayim, tuɣa d wiss sebɛa i uyur wiss sebɛa. Tarbiɛt nnes dayes arebɛa u-ɛicrin-ařef n yeryazen.

11 Sibkay, Aḥucati, n Izaraḥiyyen, d wiss tmenya i uyur wiss tmenya. Tarbiɛt nnes dayes arebɛa u-ɛicrin-ařef n yeryazen.

12 Abiɛazar, Aɛanatuti, n Ibinyaminiyyen, tuɣa d wiss tesɛa i uyur wiss tesɛa. Tarbiɛt nnes dayes arebɛa u-ɛicrin-ařef n yeryazen.

13 Maharay, Anaṭufati, i Izaraḥiyyen, tuɣa d wiss ɛecra i uyur wiss ɛecra. Tarbiɛt nnes dayes arebɛa u-ɛicrin-ařef n yeryazen.

14 Banaya, Afarɛatuni, zeg iḥenjiren n Ifrayim, tuɣa d wiss ḥiṭṭac i uyur wiss ḥiṭṭac. Tarbiɛt nnes dayes arebɛa u-ɛicrin-ařef n yeryazen.

15 Xalday, Anaṭufati, idd-iqqarsen zi Ɛutniyil, tuɣa d wiss tenɛac i uyur tenɛac. Tarbiɛt nnes dayes arebɛa u-ɛicrin-ařef n yeryazen.

16 Ina bedden x tqebbař n Israil:

I Irubiniyyen tuɣa Iliɛazar, mmis n Zikri, d amgewwed.

I Icamɛuniyyen: Cafaṭya, mmis n Maɛka.

17 I Lawi: Ḥacabya, mmis n Qamuwil.

I Harun: Ṣaduq.

18 I Yahuda: Ilihu, zeg aytmas n Dawud.

I Issakar: Ɛumri, mmis n Mixayil.

19 I Zabulun: Yicmaɛya, mmis n Ɛubadya.

I Naftali: Yarimut, mmis n Ɛazaryil.

20 I iḥenjiren n Ifrayim: Ḥuciɛa, mmis n Ɛazarya.

I wezyen n teqbič n Manassa: Yuwil, mmis n Fadaya.

21 I wezyen n teqbič n Manassa di Jilɛad: Jaddu, mmis n Zakariyya.

I Binyamin: Yaɛisiyil, mmis n Abner.

22 I Dan: Ɛazaryil, mmis n Yaruḥam.

Ina tuɣa d řḥukkam n tqebbař n Israil.

23 Dawud war iksi ca řqedd n yinni ɣar iǧa ɛicrin n iseggʷusa d swadday, maɣar SIDI tuɣa inna aqa Netta ad yarr Israil deg waṭṭas am itran n ujenna. 24 Yuwab, mmis n Ṣaruya, tuɣa ibda ad iḥseb řgens, maca war t ikemmeř umi dd-yusa uduqqez d ameqqran n weɣḍab x Israil. S uyenni war ittwagg řqedd deg wedlis n imezruyen n ujeǧid Dawud.

25 Ɛazamut, mmis n Ɛadiyil, tuɣa x ixxamen n txubay n ujeǧid.

Yunatan, mmis n Ɛuzziya, tuɣa x ixxamen n txubay n temmurt, di tneddam, di dcurat u di lburjat.

26 Ɛazri, mmis n Kalub, tuɣa iṭṭef acbar x mammec ggin řxedmet deg iyyar ḥima ad carzen acař.

27 Cimɛi, Aramati, tuɣa iṭṭef acbar x imarjaɛen n uḍiř.

Zabdi, Acifmi, tuɣa x zzad n binu nni iǧan deg imarjaɛen n uḍiř.

28 Baɛl-Ḥanan, Ajadiri, tuɣa iṭṭef acbar x iḥwicen n zzitun u x izemmuren nni iǧan di Temmurt Iwaṭan.

Yuwac tuɣa x zzad n zzect.

29 Ciṭray, Acaruni, tuɣa iṭṭef acbar x ifunasen d tfunasin, inni ihedda di řewḍa n Carun.

Cafat, mmis n Ɛalay, tuɣa x ifunasen d tfunasin di řewḍat n teɣzurt.

30 Ubil, Asmaɛili, tuɣa iṭṭef acbar x iřeɣman.

Yaḥadya, Amirunuti, tuɣa x tiɣyař.

31 Yaziz, Ahajri, tuɣa iṭṭef acbar x wuǧi.

Nitni marra tuɣa aten d imeḥdayen x wagřa nni iǧan n ujeǧid Dawud.

32 Yunatan, ɛemmis n Dawud, tuɣa d amcawar, ijj n bnadem d amiɣis. Netta tuɣa ɛawed d amarir.

Yaḥiyil, mmis n Ḥakmuni, tuɣa ɣar iḥenjiren n ujeǧid, yarebba i-ten.

33 Axitufil tuɣa d amcawar n ujeǧid,

u Ḥucay, Ayarki, tuɣa d ameddukkeř n ujeǧid.

34 Yahuyadaɛ, mmis n Banaya, d Abyatar tuɣa aten awarni i Axitufil.

Yu’ab tuɣa-t d akumandar n řɛeskar n ujeǧid.