1 Tirbiɛin n iɛessasen n tewwura:

N Iquraḥiyyen: Macalamya, mmis n Quri, zeg iḥenjiren n Abiyasaf.

2 Macalamya tuɣa ɣares iḥenjiren:

Zakariyya tuɣa-t d amenzu,

Yadiɛil wiss tnayen, Zabadya wiss třata,

Yatniyil wiss arebɛa,

3 Ɛilam wiss xemsa,

Yuḥanan wiss setta,

Ilihu-Ɛinay wiss sebɛa.

4 Uřa Ɛubid-Idum tuɣa ɣares iḥenjiren:

Cmaɛya tuɣa-t d amenzu,

Yahuzabad wiss tnayen,

Yuwax wiss třata,

Sakar wiss arebɛa,

Natanayil wiss xemsa,

5 Ɛamiyil wiss setta,

Issakar wiss sebɛa,

Faɛaltay wiss tmenya, maɣar ibarek i-t AREBBI.

6 Uřa i mmis Cmaɛya ttwaxeřqen as-dd iḥenjiren, inni tuɣa d řḥukkam di taddart n babatsen, minzi nitni tuɣa aten d ayt n bu-teɣruḍt imeḥḍen. 7 Iḥenjiren n Cmaɛya tuɣa aten d: Ɛutni, Rafayil, Ɛubid, Ilzabad ak-d aytmas, iḥenjiren imeḥḍen: Ilihu d Camakya.

8 Ina marra tuɣa aten zeg iḥenjiren n Ɛubid-Idum, nitni d iḥenjiren nsen d wawmaten nsen, iryazen imeḥḍen, ccuren s jjehd i tsexxart nsen, tnayen u-settin n yeryazen n Ɛubid-Idum.

9 Macalamya tuɣa ɣares iḥenjiren d wawmaten, iḥenjiren imeḥḍen, tmenṭac n yeryazen.

10 Ḥusa, zeg iḥenjiren n Marari, tuɣa ɣares iḥenjiren-a:

Cimri tuɣa d azeǧif, waxxa netta war iǧi d amenzu, maca babas igga i-t d azeǧif.

11 Ḥilqiya tuɣa-t d wiss tnayen,

Tabalya wiss třata,

Zakariyya wiss arebɛa.

Marra iḥenjiren d wawmaten n Ḥusa tuɣa aten di třeṭṭac n yeryazen.

12 X terbiɛin-a n iɛessasen n tewwura, x izeǧifen n ayt n bu-teɣruḍt, tuɣa ccɣeř n tsexxart di Taddart n SIDI, jmiɛ ak-d aytmatsen.

13 Nitni nḍaren taqedduḥt, am umeẓyan am umeqqran, i řaǧat nsen, i tewwart u i tewwart nneɣni.

14 Taqedduḥt i tɛessast n ccarq tekkar as-dd i Calamya.

Uřa i mmis Zakariyya, wenni d amcawar s řeɛqeř, tewḍa as-dd taqedduḥt u taqedduḥt nnes tekkar as-dd i ccamal.

15 I Ɛubid-Idum tekkar as-dd tqedduḥt i ljanub u i iḥenjiren nnes i taddart n ixxamen n řexzen. ^□  

16 I Cuffim d Ḥusa tekkar asen-dd tqedduḥt i lɣarb, ak-d tewwart n Calkat ɣar webrid ameqqran igeɛɛden ɣar Zzawect Tameqqrant. Ijj n uɛessas tuɣa ibedd ɣar ijj n uɛessas nneɣni.

17 Ɣar manis i dd-tneqqar tfuct bedden setta n Ilawiyyen u ɣar ccamal bedden din kuř ass arebɛa. Ɣar ljanub ɛawed kuř ass arebɛa u ɣar ixxamen n řexzen tnayen u ɛawed tnayen.

18 Ɣar řebni barra ɣar uɣezdis n lɣarb n Zzawect Tameqqrant arebɛa ɣar webrid ameqqran u tnayen ɣar řebni n barra.

19 Tina tuɣa d tirbiɛin n iɛessasen n tewwura zeg iḥenjiren n Uquraḥi u zeg iḥenjiren n Marari.

20 Aytmatsen Ilawiyyen tuɣa aten x ixxamen n txubay n Taddart n AREBBI u x ixxamen n txubay n tewhibin ittwaqeddsen.

21 Iḥenjiren n Laɛdan, iḥenjiren n Ujarcuni nni tuɣa ɣar Laɛdan, ixs ad yini izeǧifen n ibabaten n řaǧat n Laɛdan, Ajarcuni: Jaḥiyili waha.

22 Iḥenjiren n Yaḥyili tuɣa aten d Zitam d Yuwil, umas. Nitni tuɣa aten x ixxamen n txubay n Taddart n SIDI.

23 N Iramiyyen d Iyiṣhariyyen d Iḥabruniyyen d Iɛaziyiliyyen 24 tuɣa Cabuwil, mmis n Jarcum, mmis n Musa, d ameḥḍayi x ixxamen n txubay.

25 Aytmas zi jjadira n Iliɛazar tuɣa aten d mmis Raḥabya, mmis nnes Yacaɛya, mmis Yuram, mmis nnes Zikri d mmis Calumit. 26 Calumit wanita d aytmas tuɣa aten x ixxamen n txubay n tewhibin ittwaqeddsen, tinni issqeddes i-tent ujeǧid Dawud ak-d izeǧifen jar ibabaten n řaǧat u ak-d řqebṭanat x wařef d x mya, u ak-d ikumandaren n řɛeskar. 27 Nitni tuɣa ssqeddsen tent zi garrat u zi tkeccaḍt ḥima ad zzaysent ɛedřen Taddart n SIDI. 28 Uřa marra min tuɣa issqeddes i-t umwařaw Camwil, d Cawul, mmis n Qis, d Abnir, mmis n Nir, d Yuwab, mmis n Ṣaraya. Marra min tuɣa ittwaqeddsen tuɣa sadu afus n Calumit d aytmas.

29 Zeg Iyiṣhariyyen tuɣa Kananya d iḥenjiren nnes xeddmen am iweqqafen d řquḍat barra di temmurt n Israil.

30 Zeg Iḥabruniyyen, tuɣa taweqqaft x Israil ɣar Ḥacabya d aytmas, iryazen imeḥḍen, ařef u-sebɛa-mya n yeryazen, x ujemmaḍ n L'Urdun ɣar lɣarb, tuɣa aten x marra řxedmet i SIDI u x tsexxart i ujeǧid. 31 Zeg Iḥabruniyyen tuɣa Yariya d azeǧif, n Iḥabruniyyen, n řecyur nsen inni dd-iqqarsen zeg ibabaten. Deg useggʷas wiss arebɛin n tgeldit n Dawud ttwarzun u ttwafen ayt n bu-teɣruḍt imeḥḍen di Yaɛzir di Jilɛad. 32 Aytmas tuɣa aten d iḥenjiren imeḥḍen, ařfayen u-sebɛa-mya n izeǧifen jar ibabaten n řaǧat. Ajeǧid Dawud igga ten x Irubiniyyen, Ijadiyyen d wezyen n teqbič n Manassa, x marra timesřayin n AREBBI u x marra timesřayin n ujeǧid.