1 Awařen n Naḥamya, mmis n Ḥakalya. Imsar deg uyur n Kisluw, deg useggʷas wiss ɛicrin, umi d ayi tuɣa di řeqṣar di Cucan, 2 aqa yusa-dd Ḥanani, ijjen zeg aytma, jmiɛ ak-d ca n yeryazen zi Yahuda, uca sseqsiɣ ten x Wudayen nni innejmen, inni iqqimen zi tmeḥbast, u x Urcalim. 3 Nitni nnan ayi: “Inni iqqimen, inni din iqqimen di lɛamala zi tmeḥbast, aqa aten di řeɣben d ameqqran u di řefḍiḥet u řḥiḍ n Urcalim ittwarẓ u tiwwura nnes ttwascemḍent.”

4 Umi sřiɣ awařen-a, imsar, aqa qqimeɣ ɣar temmurt, ruɣ u ceḍneɣ ca n wussan, ẓummeɣ u ẓuǧeɣ zzat i wudem n AREBBI n ijenwan. 5 Nniɣ: “A SIDI, AREBBI n ijenwan, Cek d Arebbi d ameqqran issaggʷaden, wenni iṭṭfen di Řɛahd d tmexsiwt icewwaren di ṭṭweɛ n yinni Cek ittexsen u n yinni iṭṭfen di tweṣṣa nnek, ^■   6 ejj ad yiři umezzuɣ nnek iften u tiṭṭawin nnek arzment ḥima ad tesřed i tẓaǧit n umsexxar nnek nni ẓuǧeɣ ass-a zzat i wudem nnek, ass d ǧiřet, di ṭṭweɛ n ayt n Israil, imsexxaren nnek. Neɛmeɣ ɛawed s ddnub n ayt n Israil i zi xak xḍan. Necc d taddart n baba, aqa nexḍa akidek. 7 Negga akidek aṭṭas n řɛib u war neṭṭif ca di řumurat d tweṣṣa d lfarayiḍ i zi tumured i umsexxar nnek Musa. 8 Idar awař i tumured i umsexxar nnek Musa umi tennid: “Mařa kenniw d iɣeddaren, aqa ad kenniw sszeǧɛeɣ jar řegnus, ^■   9 maca mařa tdewřem-dd ɣari, ad ṭṭfem di řumurat inu u ad tent teggem, waxxa din zzaywem inni x yuẓẓřen ɣar ṭṭarf aneggar n ujenna, Necc ad ten dd-ssmuneɣ ssenni, ad ten awyeɣ ɣar wemcan i ixḍareɣ Necc ḥima ad dinni ssezdɣeɣ Isem inu.

10 Nitni wah d imsexxaren nnek d řgens nnek nni tfekked s jjehd nnek ameqqran u s ufus nnek ijehden.

11 A, Sidi inu, iři ad iften umezzuɣ nnek ɣar tẓaǧit n umsexxar nnek u ɣar tẓaǧit n imsexxaren nni ittexsen ad tteggʷeden zeg Yisem nnek. Ejj amsexxar nnek ad yaweḍ ass-a u ewc as arreḥmet zzat i wudem n weryaz-a.” Necc tuɣa ayi d awarrad n ujeǧid.