1 Deg uyur n Nisan, deg useggʷas wiss ɛicrin n ujeǧid Artaḥcasta, umi tuɣa din binu zzat i wudem nnes, imsar, aqa ksiɣ binu uca wciɣ t i ujeǧid. Ɛemmarṣ war nzemmeɣ zzat i wudem nnes. 2 Xenni inna ayi ujeǧid: “Mayemmi inzemm wudem nnek, u cek war teḥřiced ca? Aqa man aya war iǧi mɣir d ijj n řḥař n wuř ibarrcnen.” Xenni dewřeɣ nnxeřɛeɣ aṭṭas. 3 Nniɣ i ujeǧid: “Tudart i ujeǧid i řebda. Mammec war ittiři wudem inu inzemm, aqa tandint, amcan n imeḍřan n ibabaten inu, d řxarbet d tewwura nnes tecca i-tent tmessi?” 4 Inna ayi ujeǧid: “Man xenni min tᵉttared cek?” Xenni ẓuǧeɣ i AREBBI n ijenwan 5 uca nniɣ i ujeǧid: “Mařa tusa as-dd i ujeǧid x řxaḍar u yufa amsexxar nnek arḍa zzat i wudem nnek, sekk ayi-dd xenni ɣar Yahuda, ɣar tendint n imeḍřan n ibabaten, inu ḥima ad tt bniɣ ɛawed.” 6 Xas uca inna ayi ujeǧid, umi teqqim temɣart n ujeǧid x uɣezdis nnes: “Mecḥař i ɣa tekk twaḥit nnek u meřmi i dd ɣa tɛeqbed?” Umi d as nniɣ řqedd n ijj n řmijař, ittɣiř as man aya mliḥ i ujeǧid, uca issekk ayi dinni.

7 Arniɣ nniɣ as i ujeǧid: “Mařa tusa as-dd i ujeǧid x řxaḍar, xenni ad ayi mmewcent tebratin i lwulat n temmurt aɣirin i iɣzar n Lfuraṭ, maḥend ad ayi ssqebbḍen ař ɣa yawḍeɣ ɣar Yahuda, 8 uřa d ict n tebrat i Asaf, aɛessas n weftis n ujeǧid nni iǧan amecnaw jjennet, ḥima ad ayi yewc akeccuḍ ḥima ad zzayes negg tiḥenya i tzeqqa sennej i tewwura n řeqṣar nni iǧan zzat i Taddart, u i řḥiḍ n tendint, u i taddart mani i ɣa zedɣeɣ.” Uca iwca ayi tent ujeǧid minzi afus aṣebḥan n AREBBI tuɣa t xafi. 9 Xenni iwḍeɣ ɣar lwulat di temmurt aɣirin i iɣzar n Lfuraṭ u wciɣ asen tibratin n ujeǧid. Ajeǧid issekk akidi uřa d ikumandaren d imnayen n iysan. ^□  

10 Umi Sanballaṭ zi Ḥurun, d Tubiya, amsexxar Aɛammuni, sřin aya, tuɣa aya ɣarsen d ict n tmesřact d taɛeffant aṭṭas, aqa yusa-dd ijj bnadem ḥima ad yarzu řxar i ayt n Israil.

11 Ammu usiɣ-dd ɣar Urcalim uca dinni qqimeɣ třata n wussan.

12 Xenni kkareɣ di ǧiřet, necc d ca n yeryazen akidi, uca necc tuɣa war ssargbeɣ uřa d ijj n bnadem x min tuɣa d ayi igga SIDI deg wuř ḥima ad t ggeɣ i Urcalim uca war kidi ksiɣ řmař mɣir řmař min xef i nyiɣ.

13 Ffɣeɣ s ǧiřet zi Tewwart n Teɣzurt ař udem n Tařa n Řhaycet u ssenni ɣar Tewwart n Řeɣbar. Necc xemmeɣ řeḥyuḍ n Urcalim, inni ittwahedmen u aqa tiwwura nnes tecca i-tent tmessi.

14 Necc nedheɣ xenni ɣar Tewwart n Tařa d uyeřmam n ujeǧid, maca war tuɣi din ttasiɛ i řmař sadu inu ḥima ad arniɣ ɣar zzat.

15 Xenni geɛɛdeɣ s ǧiřet x tseǧya uca xemmeɣ řḥiḍ uca ɛeqbeɣ-dd, uca udfeɣ ɛawed ɣar Tewwart n Teɣzurt. Ammu i-dd-ɛeqbeɣ.

16 War ssinen imḍebbaren mani tuɣa ruḥeɣ d min tuɣa xseɣ ad ggeɣ. Maɣar ař din war ssargbeɣ uřa d ict n řḥajjet i Wudayen d ikehhanen d tarwa n taṣiřet d imḍebbaren d inneɣni inni iggin řxedmet.

17 Xenni nniɣ asen: “Kenniw tᵉttwařam řeɣben i di neǧa, aqa Urcalim tᵉttwaredeǧ u tiwwura nnes tecca i-tent tmessi. Asem-dd, ad nebna řḥiḍ n Urcalim, ḥima war nettwaseḥqar ɛad ktar.”

18 Necc ḥajiɣ asen mammec afus n SIDI inu tuɣa d aṣebḥan xafi uřa d awařen i d ayi inna ujeǧid. Xenni nnan: “Neccin ad nekkar ad nebna.” Uca nitni ssjehden ifassen nsen i řxedmet-a taṣebḥant

19 Umi sřan t Sanballaṭ, zi Ḥurun, d Ṭubiya, amsexxar Aɛammuni, d Weɛrab Jacam, ssthezzan zzayneɣ u sseḥqaren aneɣ. Nitni nnan: “Manawya min i da tᵉtteggem? Ma texsem ad tɣewwɣem x ujeǧid?” 20 Necc arriɣ xasen, nniɣ asen: “AREBBI n ijenwan ad aneɣ iwc afus, u neccin, imsexxaren nnes, ad nekkar ad nebna. Kenniw maca war ɣarwem bu tesɣart uřa d řḥeqq niɣ řidaret di Urcalim.”