1 Deg ijj n wass usin-dd arraw n AREBBI ḥima ad bedden zzat i SIDI, uca yusa-dd uřa d cciṭan di řwest nsen maḥend ad issbedd ixef nnes zzat i SIDI. 2 Inna SIDI i cciṭan: “Manis i dd-tusid cek? Cciṭan yarra-dd x SIDI, inna: “Usiɣ-dd zeg wetlaɛ x temmurt, kkiɣ tt marra.” 3 Inna SIDI i cciṭan: “Ma teḥḍid amsexxar inu Ayub? Amecnaw netta war iǧi x temmurt: d aryaz ikmeř, iggur nican, itteggʷed AREBBI u ittḥeyyad x min iǧan d aɛeffan! Ɛad yarni itteṭṭef di řeṣfayet nnes, x minni cek d ayi tɛarrned ḥima ad t ṣarḍeɣ x walu.”

4 Yarra-dd cciṭan x SIDI, inna: “Tiřmect s teřmect d marra min ɣares ɣar bnadem, ad t iwc i tudart nnes. 5 Swiẓẓeḍ mɣir afus nnek ɣares uca ḥada iɣsan nnes d weysum nnes, ma xenni netta s tidett war dayek ittceqqaf deg wudem nnek?”

6 Xenni inna SIDI i cciṭan: “Xzar, netta deg ufus nnek, maca ejj i-t ad iddar!”

7 Xas uca yuyur cciṭan zi zzat n wudem n SIDI uca iwta Ayub s tḥebba tiɛeffanin, zi třeqqa n iḍaren nnes ɣares ař tqiccet n uceqquf n uzeǧif nnes. 8 Netta iksi aceǧiq n tqedduḥt, ḥima ad zzayes iḥekk ixef nnes, uca iqqim di řwest n yiɣɣeḍ. 9 Tenna as temɣart nnes: “Ma ɛad tᵉtteṭṭfed di řeṣfayet nnek? Ini as i AREBBI: ‘D wenni netta!’, uca mmet!”

10 Netta maca inna as: “Am mammec ssawařent temɣarin tibuhařiyyin tessawařed uřa d cem am icten zzaysent. Ma neccin nkessi řxar zi AREBBI, maca war nkessi xenni uřa d řɣar?” S marra man aya Ayub war ixḍi ca s iyencicen nnes.

11 Sřin třata n imeddukkař n Ayub marra min xas ikkin d řɣar u nitni usin-dd kuř ijj zi temmurt nnes: Ilifaz zi Tayman, Bildad zi Cuḥa u Ṣufar zi Naɛmat. Ggin ad din uyuren ḥima ad kides ssḥissfen u ḥima ad dayes ggen uř.

12 Zi řaggʷaj ssgeɛɛden tamuɣři nsen, maca war tt ɛqiřen ca. Nitni ssgeɛɛden tmijja nsen uca run. Kuř ijj icarreg aseřham nnes uca ssuysen iɣɣeḍ ɣar ujenna tiwa i izeǧifen nsen.

13 Qqimen ɣares x temmurt, sebɛa n wussan d sebɛa n ǧiyaři. Uřa d ijjen war issiweř uřa d ijj n wawař ɣares, maɣar ẓrin, aqa řeḥriq nnes tuɣa d ameqqran aṭṭas.