Acetci n Ayub
3
1 Awarni man aya yarzem Ayub aqemmum nnes, inɛeř ass n wexřaq nnes. ■ 2 Ayub iṭṭef deg wawař, inna:
3 Ad ifna ass i di dd-ttwaxeřqeɣ,
uřa d ǧiřet i di nnan: ‘Ijj n weryaz ittwaksi.’
4 Ejj ass nni ad idweř d taǧest,
ɛemmarṣ war xas ittsseqsi Arebbi zeg ujenna,
u war xas tᵉttceɛciɛ tfawt n uziř ɛad.
5 Iři taǧest d tiři n řmewt ad xas arzunt,
u ejj iseynuten ad zedɣen tiwa nnes.
Iři ad xas dd-wḍant tkebbasin s uziř! □
6 Ad tekkes tkebbast yuǧɣen ǧiřet nni,
ejj ǧiřet nni war tfarreḥ jar wussan n useggʷas,
ejj i-tt war dd-tᵉttis di řeḥsab n iyuren.
7 Xzar, ejj ǧiřet nni ɛemmarṣ war dd-tᵉttiruw,
war dayes ittidef usřiwřew.
8 Ejj inni issfeṭṭḥen, ass nni ad t neɛřen,
inni ittḥakan ad ssekkaren ‘Liviyatan’. □
9 ejj ad ttwakebbsen itran n tuffut nnes,
ejj i-t ad iraja tafawt, řami war din teǧi.
Ejj abřiwen n tfawt n řefjar war tt ẓarren! □
10 Maɣar netta war ibelleɛ tiwwura n uɛeddis n yemma,
u war iffar řeɣben zzat i tiṭṭawin inu.
11 Mayemmi war mmuteɣ řami d ayi tuɣa deg uɛeddis n yemma,
mayemmi war ssuffɣeɣ buḥbeř řami dd-ffɣeɣ zeg uɛeddis n yemma?
12 Mayemmi d ayi rajan ifadden,
u mayemmi ibbac ḥima ad daysen ṭṭeḍeɣ?
13 Xenni iři ad zzřeɣ řexxu, ad ssqareɣ.
Iři ad ṭṭṣeɣ. Xenni balak ad ɣari tiři řhudnet,
14 jmiɛ ak-d ijeǧiden d imcawaren n temmurt,
inni ibnan i yixef nsen ijj n uyenni n arrwinat,
15 niɣ jmiɛ ak-d řḥukkam nni ɣar iǧa wureɣ,
inni iccuren tudrin nsen s nnuqart,
16 niɣ necc war ttiřiɣ ɛad, am ijj n weɣray n temɣart ssnuffaren t,
amecnaw iseyman nni ɛemmarṣ war iẓrin tafawt.
17 Dinni ssbedden iɛeffanen zi ṣṣdeɛ,
u dinni ttareyyaḥen inni umi ifna jjehd nsen.
18 Dinni ttareyyaḥen imeḥbas munen,
war qqimen ttesřan ɛad i tmijja n imzeyyaren n isemɣan.
19 Aqa din ameẓyan d umeqqran,
uca ismeɣ innufseř zi bab nnes.
20 Mayemmi temmewc tfawt i řmeskin,
u tudart umi yenni umi ittwassarzeg řeɛmar nsen,
21 i yenni ittmeẓren di řmewt, maca war tt ufin,
inni iɣezzan x řmewt ktar x řeknuz innufaren,
22 inni ifarrḥen aṭṭas ařami dewřen neggzen
u ttɣebban meẓri xmi ttafen anḍeř?
23 Mayemmi temmewc tfawt i weryaz wenni umi ittwasnuffar webrid nnes,
u wenni xef ibelleɛ Arebbi zi marra iɣezdisen?
24 Minzi deg wemcan n weɣrum inu ittas-dd usqinef inu,
iɣuyyan inu ttwazeǧɛen am waman.
25 Minzi tuɣa ttnexřaɛeɣ u amenni dd-iffeɣ,
u min zi tuɣa tteggʷedeɣ, wḍiɣ dayes.
26 War ɣari řhudnet, war arsiɣ ca u war ttareyyiḥeɣ.
Aqa usin-dd imxumbar.