Řḥarḍ amezwaru n Ilifaz: Ksi awebbex n Arebbi!
4
1 Xenni yarra-dd Ilifaz, wenni dd-yusin zi Tayman, inna: 2 Mařa ḥed yarzu maḥend ad kik issiweř, ma ad tᵉttwaceḍned s man aya?
Maca man wen izemmaren ad issbedd řhard nnes?
3 Xzar, tessɣared aṭṭas n iwdan,
u ifassen yarxun tessmeḥḍed i-ten.
4 Wenni inqarḍen, tessbedded t s wawař nnek,
u ifadden ifecřen tewcid asen jjehd ɛawed.
5 Maca řexxu imsar aya i cek uca tᵉttwaceḍned,
řexxu iřqef i cek aya uca tarejfed.
6 Ma war teǧi tiggʷudi zi Arebbi d řaman nnek,
u řeṣfayet n ibriden nnek d řayas nnek?
7 Xemm maca! Man wen ittwahellken am iǧa d amezdag,
u mani ttwateḥḥan inni igguren nican?
8 Ẓriɣ aqa inni icarrzen ddeǧ d yenni izarrɛen řeɣben
ad t mjaren ɛawed. ■
9 Ad hellken zeg usuḍi n nnefs n Arebbi,
u ad fnan s uṣuḍi zeg wenzaren nnes. ■
10 Zzhir n weyrad d tmijja n yizem ameẓyan
uřa d tiɣmas n wayraden imeẓyanen ad ttwarẓan.
11 Ad ihellek wayrad, minzi war din yufi zzardet,
u ad ttwabezzɛen tarwa n tayradt.
12 Di tnuffra yiweḍ ayi-dd ijj n wawař,
u amezzuɣ inu iṭṭef zzayes řeḥmis,
13 am tuɣa ɣarrqeɣ deg ixarriṣen issxarwiḍen zi tmeẓra n ǧiřet,
řami dd-iwḍa yiḍeṣ yuǧɣen x iwdan.
14 Teřqef ayi tiggʷudi d tarjijit,
u marra ixsan inu nnxeřɛen.
15 Ijj n buḥbeř iḥara x uɣembub inu,
issbedd acewwaf di arrimet inu.
16 Netta ibedd, maca war ɛqiřeɣ x tefras nnes.
Ijj n waddud ibedd zzat i tiṭṭawin inu.
Xenni sřiɣ i tmijja tᵉttemtim, teqqar:
17 ‘Ma izemmar ijj n bnadem ad yiři isegged x Arebbi?
Ma izemmar ijj n weryaz ad yiři iṣfa x Wenni t iggin?’
18 Xzar, war ittciři Netta uřa x imsexxaren nnes,
uca igga řɛib ak-d lmalakat nnes umi weddarent. ■
19 Xenni am umezwar nni izeddɣen di tudrin n ucař,
inni ɣar teǧa tɛejjajt d dsas.
Aqa ad ttwařebzen amezwar x tcinda.
20 Zi tuffut n ṣṣbeḥ ɣares ař tameddit ad ttwafartken.
Břa ma ad iwc bnadem taynit i man aya, ad fnan i řebda.
21 Ma war dd-tᵉttwaqřeɛ ɣarsen tesɣunt n uqiḍun nsen?
Ad mmten, maca war iǧi di tiɣit.