5
1 Řaɣa maca! Ma din ca n yijjen i xak dd ɣa yarren? Ɣar man zeg imqeddasen i ɣa tsewḍed?
2 Minzi axeyyeq ineqq abuhaři,
u tusmi tneqq aqubbani.
3 Ẓriɣ ijj n ubuhaři iḍřeq i weẓwar,
maca x ict n řɣefřet tuɣa ittxeṣṣa ad neɛřeɣ tazeddiɣt nnes.
4 Iggʷejen iḥenjiren nnes x usenjem,
ttwaddzen ɣar tewwart n tendint
uca war tuɣi din wi ten i ɣa issnejmen,
5 umi icca umehyuf ṣṣabet nnes,
- issuffeɣ i-t-i-dd ɛad zeg isennanen -,
u iṣarḍ uxewwan agřa nsen.
6 Maɣar war iǧi zi tɛejjajt i zi dd-ittekk řɣar,
u zi temmurt war dd-tɣemmi tamara war ineffɛen,
7 maca bnadem ittwaxřeq-dd i tamara war ineffɛen,
am tceɛɛařin n tmessi ṭṭawent ɣar ujenna.
8 Necc maca iři arzuɣ Arebbi,
ad ssiwḍeɣ tamesřact inu ɣar AREBBI,
9 wenni itteggen timesřayin timeqqranin,
war din wi tent i ɣa ifehmen,
ittegg lmuɛjizat i war izemmar ad ttwaḥesbent. ■
10 Issakkʷaḍ-dd anẓar x wudem n temmurt,
uca issekka aman x wudem n iyyaren,
11 ḥima ad issgeɛɛed imwaḍɛen,
uca inni iceḍnen ad ten ssuɛřan ɣar řaman. ■
12 Netta issbeṭṭeř inwayen n iḥraymiyyen,
ařami ifassen nsen war zemmaren ad ggen walu. ■
13 Imiɣisen imenneɛ i-ten di teḥraymect nsen,
uca ittwasbeṭṭeř ccwar n iḥraymiyyen. ■
14 Deg uziř mmsagaren ak-d taǧest,
uca di ṭṭḥa n uziř ttfafan am ttfafan di ǧiřet. ■
15 Netta issenjam zi ssif i dd-itteffɣen zeg uqemmum nsen,
uřa d amezřuḍ zeg ufus n wenni ijehden.
16 Ammu i yeǧa řayas i umezřuḍ,
uca ddeǧ ad ibelleɛ aqemmum nnes. ■
17 Xzar, sseɛd n weryaz wenni iseggem Arebbi.
S uya war tesseḥqiri ca ttarbiyyet n Umzemmar x kuřci! ■
18 Maɣar Netta issyezzem u ittcedda,
iccat, uca xenni ifassen nnes ssgenfan. ■
19 Di setta n řeḥṣarat ad cek ifekk,
di tenni wiss sebɛa war ggur ad cek iřqef řɣar. ■
20 Di řaẓ ad cek dd-issenjem zi řmewt,
deg umenɣi zi tiyyita n ssif.
21 Ad tiřid di řaman zzat i urekkuḍ n yiřes,
war tᵉtteggʷeded ca zeg wareddeǧ mařa yusa-dd.
22 X wareddeǧ d řaẓ tzemmared ad tḍeḥced,
zi řewḥuc n řexřa n temmurt war tᵉtteggʷeded.
23 Maɣar tqeḍɛed řɛahd ak-d iẓra n yeyyar,
xenni řewḥuc n řexřa ad kidek ddaren di řehna. ■
24 Ad targbed aqa řehna d aqiḍun nnek,
ad tbeqqced tazeddiɣt nnek, ad tafed war cek ittxeṣṣi walu.
25 Cek ad tessned aqa arraw nnek aṭṭas,
u ddurryet nnek am wefsu aziza n temmurt.
26 Ad tadfed ɣar wenḍeř di tewsar,
am mammec ssgeɛɛden ijj n uɛurric n tqebbiḍin n imendi
ɣar unedrar di řḥař nnes.
27 Xzar, man aya, aqa neccin narzu dayes, ammu i teǧa!
Seř ɣares uca ssen i-t deg yixef nnek!