Tamwarrit n Ayub x Ilifaz - afeqqus nnes
6
1 Yarra-dd Ayub, inna: 2 A, mři maca meɛlik ittwawzen řhemm inu,
mři jjin ad igeɛɛed x řmizan uřa d řeɣben inu akides imun!
3 Maɣar řexxu aqa-t idqeř x yejdi n řebḥur,
x uya tteffɣen wawařen inu nhřa axemmem. ■
4 Maɣar nnuɣent dayi fřitcat n Umzemmar x kuřci,
ařami buḥbeř inu isess arrhaj nsent.
Inexřiɛen zi Arebbi kkaren-dd akidi. ■
5 Ma issḥundrut weɣyuř n řexřa ɣar arrbiɛ aziza?
Niɣ issmuhrut ufunas ɣar heddu nnes?
6 Macca břa aředdi ma ad t yecc bnadem břa tameǧaḥt?
Niɣ aqa din aředdi di řmeḥḥ acemřař n tmeǧač?
7 Min yugi řeɛmar inu ad t iḥada,
řexxu aya marra i necc am macca iɣummen.
8 Mři dd ɣa yas min arezzuɣ,
iwa, iwca Arebbi min sittimeɣ.
9 Mři tuɣa ixs SIDI maḥend ad ayi iřbez,
maḥend ad issarxu afus nnes u maḥend ad ayi iqess.
10 Man aya ad ayi yiři ɛad d afewwej,
ad ayi inɛec di řeḥriq nni war xafi issɛizzi ca,
maɣar war nkareɣ ca awařen n Umqeddas.
11 Min iɛna jjehd inu, aqa zemmareɣ ad rajiɣ ɛad?
Niɣ min iɛna uneggaru inu, ad sebbařeɣ ixef inu ɛad?
12 Ma jjehd inu am jjehd n iẓra?
Ma arrimet inu am nnḥas?
13 Ma war ǧiɣ qaɛ břa twiza s yixef inu,
ma war xafi ittwakkes ufekki qaɛ?
14 Wenni umi iqḍeɛ řayas ittxeṣṣa as tamexsiwt icuwwaren zeg umeddukkeř nnes,
mařa lla izemmar ad yejj tiggʷudi zeg Umzemmar x kuřci.
15 Aytma banen-dd d iɣeddaren am tɣezrin deg idurar,
am tassut n tɣezrin nni iɛeddun deɣya,
16 inni ittbarrcinen s wejris,
u inni di issnuffar wedfeř ixef nnes.
17 Deg wussan nni di dewřent ḥṣarent, beddent,
xmi ḥemmant, ttaẓɣent, imḥa wemcan nsent.
18 Ibriden n tecři nsen farɣen,
geɛɛden di řeɛwin uca weddaren.
19 Imsebriden zi Tayma qqimen ttceɛɛayen,
ikarawanen zi Caba ttrajan tent.
20 Nitni ttwacemten deg utecři nni ɣarsen.
Usin-dd ɣar tɣezrin deg idurar uca barrqen.
21 S tidett, řexxu tdewřent kennint d walu,
teẓrint arẓiyyet inu uca tᵉggʷedent.
22 Ma nniɣ: ‘Awyem ayi-dd ca!’
niɣ: ‘Wcem ayi tirzifin zeg wagřa nwem!’
23 niɣ: ‘Fekk ayi zeg ufus n wenni iḥeṣṣaren!’
niɣ: ‘Fdi ayi zeg ufus n ayt n bu-řexcunet!’
24 Sɣar ayi, xenni ad sseɣdeɣ,
scen ayi min di weddareɣ!
25 Mammec jehhden wawařen yecnan,
maca min xef awebbex nwem?
26 Ma tᵉttxarrṣem deg wawařen maḥend ad ayi twebbxem?
Ma xenni awařen n wenni umi qeḍɛen řayas am řeɛwin i kenniw?
27 Ɛad x yijj n unibu ayujiř ad xas tenḍarem taqedduḥt,
u ɛad x yijj n umeddukkeř nwem ad xas teggem tameɛmuč.
28 Xenni řexxu, mařa texsem, ḥḍam xafi mliḥ,
necc war xawem ssxarriqeɣ deg uɣembub nwem.
29 Qeǧbem ayi, war iɛeddeř ad yiři ddeǧ.
Qeǧbem ayi ɛawed, tasegda inu tbedd ɛad nican.
30 Ma aqa din řɣecc x yiřes inu?
Ma war ittředdi waneɣ inu x min war iḥřin?