Ayub yarni di temwarrit nnes i Ilifaz: Ma war iddar bnadem tudart teqseḥ?
7
1 Ma war din iǧi umenɣi ittxeṣṣan ad t imneɣ bnadem x temmurt, u ma war ǧin wussan nnes am wussan n ucewwař?
2 Am ittmeẓri imseɣ ɣar tiři,
am ittrajan ucewwar řmunet,
3 ammu dewřen iyuren ccuren s ubarreq d tasɣart inu,
u ǧyaři ccurent s tamara bḍan ayi tent.
4 Xmi ttezzřeɣ ttᵉṭṭṣeɣ, qqareɣ
‘Meřmi zemmareɣ ad kkareɣ, meřmi i ɣa teɛdu ǧiřet?’
Jjiwneɣ s řehweř ař d yeffu řḥař.
5 Arrimet inu tyarḍ deg ikeccawen u di teqcurin n ucař,
tiřmect inu tqeṭṭa u tᵉttgeyyeḥ.
6 Deɣya x umekkuk n uxeyyaḍ ɛeddun wussan inu,
ɛeddun břa asitem.
7 Ɛqeř, aqa tudart inu d aṣuḍi n nnefs waha,
u tiṭṭ inu war tẓarr ɛemmarṣ ɛad min iṣebḥen. ■
8 Tiṭṭ n wenni d ayi ittwařan, war d ayi tẓarr ɛad.
Tiṭṭawin nnek ad xafi iřint, maca nnec war da ttiřiɣ ɛad.
9 Am mammec ittdurruq useynu, iɛeddu,
ammu i ɣa ihwa di řaxart, war zzayes dd-ittgeɛɛid ɛad.
10 Ɛemmarṣ war dd-ittɛiqqib ɣar taddart nnes,
ɛemmarṣ war xas itteɛqiř wemcan nnes.
11 Ammu i war tteqqneɣ aqemmum inu,
ad ssiwřeɣ di řeḥṣaret n buḥbeř inu,
ad cetciɣ di tarzugi n řeɛmar inu.
12 Ma necc d řebḥar niɣ d řhaycet,
aqa Cek tessbedded xafi aɛessas?
13 Mařa nniɣ necc: ‘Tassut ad ayi tɛezza,
qama inu ad xafi tessehwen acetci inu!’,
14 ammu id ayi tᵉttɣezzid s tirjiwin,
u s tmeẓriwin tessaggʷaded ayi,
15 ařami idweř řeɛmar inu ittixḍar ajeyyef,
ittixḍar řmewt x yeysan inu.
16 Necc ttɛiffiɣ man aya, war ddareɣ i řebda.
Arxu zzayi, maɣar ussan inu am aṣuḍi n nnefs waha.■
17 Min iɛna bnadem aqa Cek tḥessbed t d ameqqran ammu,
u teřhid akides s wuř nnek? ■
18 Aqa Cek tarezzfed ɣares qaɛ ateffu,
tqeǧbed i-t qaɛ tazeḥziht?
19 Mecḥař ɛad war zzayi tᵉttekksed tiṭṭawin,
war d ayi tarexxud ḥima ad ssɣeřyeɣ ikuffan inu?
20 Ma xḍiɣ? Min d ac i ɣa ggeɣ i Cek,
i Cek a-y-aɛessas n bnadem?
Mayemmi i d ayi tessbedded d taḥjurt zzatek,
u dewřeɣ d ddqeř i yixef inu?
21 Mayemmi war d ayi tɣeffared axeṭṭu inu,
u war tɛeddud x řmuɛṣiyyet inu?
Maɣar řexxu ad zzřeɣ di tɛejjajt u Cek ad xafi tarzud,
maca war ttiřiɣ ɛad.