Řḥard amezwaru n Bildad ak-d Ayub
8
1 Xas uca yarra-dd Bildad, wenni dd-yusin zi Cuḥa, inna: 2 Mecḥař i ɣa tekked tessawařed ammu,
ad iřin wawařen n uqemmum nnek amecnaw aṣemmiḍ n tharyaḍt.
3 Ma ad issfarɣ Arebbi tasɣart,
niɣ ad issfarɣ Umzemmar x kuřci tasegda? ■
4 Mařa akides xḍan iḥenjiren nnek,
aqa issekk i-ten deg ufus n uxeṭṭu nsen.
5 Mařa cek tarezzud Arebbi s jjehd,
u tᵉttzawged aḥinni ɣar Umzemmar x kuřci, ■
6 mařa teǧid d amezdag u tseggmed,
xenni ad ac iwca taynit nican,
ad iɛdeř tazeddiɣt nnek i cek.
7 Tamezwarut nnek ad tiři d tuqřič,
maca taneggarut nnek ad tiři temɣar.
8 Wah, seqsa xenni ɣar jjiř iɛdun,
ttḥekkared di řejdud nsen. ■
9 Maɣar neccin n iḍennaḍ waha, war nessin walu,
maɣar ussan nneɣ x temmurt am tiři. ■
10 Ma war cek sseřmiden nitni, ma war ɣarek ssiwiřen,
ma war dd-ssuffuɣen awařen zeg wuř nsen?
11 Ma iɣemmi uɣanim n papirus břa ssebxet,
ma ad imɣar uɣanim ɣar tma n yeɣzar břa aman?
12 Xmi ittnewwar, war imjar ɛad,
ittaẓeɣ qbeř marra arrbiɛ nneɣni. ■
13 Ammu i ǧan imesraq n marra inni ittun Arebbi,
řayas n umnafeq ad ifna. □ ■
14 Min xef iɛemmed, ad ittwaqḍeɛ,
min xef ittcař, ad dd-iban d axmař n qundɛa.
15 Ad isenned x taddart nnes, maca war tᵉttbeddi,
ad dayes icebbar, maca war tᵉttɣimi tbedd.
16 Netta d aziza di tfawt n tfuct,
u řefruɛ nnes imeẓyanen ttbezzaɛen x weḥwic nnes.
17 Iẓewran nnes mmuden ixef nsen x ijj n uɛurric n yeẓra,
ittarja ict n taddart n yeẓra i yixef nnes.
18 Mařa Netta iqeǧeɛ i-t zeg wemcan nnes,
ad t inkar wemcan nni, ad yini: ‘Ɛemmarṣ war cek ẓriɣ!’
19 Xzar, ta teǧa d řefraḥet n webrid n tudart nnes
u inneɣni ad ɣemyen zeg ucař.
20 Xzar, Arebbi war ineṭṭar wenni ikemřen
u war ittic afus i iɛeffanen.
21 Ɛad ad iccur aqemmum nnek s tḍeḥḥact,
u iyencicen nnek s usřiwřew.
22 Imecrah nnek ad yarḍen řefḍiḥet,
u aqiḍun n iɛeffanen war ittiři ɛad.