Tamwarrit n Ayub x Bildad
9
1 Yarra-dd Ayub, inna: 2 Ssneɣ nican, aqa ammu i teǧa,
maɣar mammec i ɣa yiři bnadem d amsegged ɣar Arebbi? ■
3 Mařa Netta ixs akides imcarreɛ,
iři netta war izemmar ad xas dd-yarr uřa d ict n twařa x wařef n twařawin.
4 Netta d amiɣis n wuř d bu-tzemmar ijehden,
man wen izemmaren ad isseqseḥ ixef nnes ḍidd nnes,
uca ad iqqim iddar di řaman?
5 Netta d wenni issmuṭṭuyen idurar am war tt tticin iwdan,
d wenni ten issneqřaben deg weɣḍab nnes,
6 Netta d wenni issenhezzan tammurt zeg wemcan nnes,
d wenni iggin ipilaren nnes ad arjijen,
7 Netta d wenni ittamaren tafuct ařami war dd-tenqir,
d wenni ittcemmaɛen itran!
8 Netta s yixef nnes waha ittbezzaɛ ijenwan,
u Netta iṣurruf tiwa n tɛurar n řemwaj n waman, ■
9 Netta d wenni iggin awraf n itran n Ddub Ameqqran d Uryun,
agraw n Sebɛa n Itran d Ixammen n Ljanub,
10 Netta d wenni iggin timesřayin timeqqranin,
- war izemmar bnadem ad tent ifhem - ,
uřa d řeɛjayeb břa řeḥsab. ■
11 Xzar, Netta iɛeddu xafi, war t ẓarreɣ,
iẓekkwa, necc war kides ttaciɣ.
12 Xzar, mařa ixḍef Netta, man wen i t ɣa imenɛen?
Man wen izemmaren ad as yini: ‘Min din ttegged Cek?’
13 Arebbi war ittarri aɣḍab nnes ad dd-idweř,
sadu nnes uḍaren imɛawanen n ‘Rahab’. □
14 Mammec i ɣa ggeɣ ad xas dd-arreɣ,
mammec i ɣa farzeɣ awařen inu mliḥ zzates?
15 Waxxa necc d amsegged, war zemmareɣ ad xas dd-arreɣ,
maca ad zawgeɣ Řqaḍi inu maḥend ad xafi iḥinn,
16 Mařa xafi dd-yarr řami řaɣiɣ,
war ttɣiřeɣ aqa Netta ad iseř ɣar tmijja inu.
17 Aqa Netta iřebbez ayi s ict n tḥaryaḍt,
u yarenni deg iyezzimen inu baṭeř.
18 Netta war d ayi ittejji ad arreɣ nnefs,
maca issjawan ayi s tarzugi.
19 Mařa teqqim tmesřact di jjehd, aqa Netta ijhed qaɛ,
mařa di ccreɛ, iqqar: ‘Wi d ayi ɣa iɛarḍen?’
20 Waxxa necc d amsegged, ɛad aqemmum inu ad xafi iḥkem,
waxxa necc břa řɛib, Netta ad ayi iɛeyyeb.
21 Waxxa necc břa řɛib i ǧiɣ, war ssineɣ maca řeɛmar inu,
tudart inu ḥessbeɣ tt d walu.
22 S uya i ɣa iniɣ: ‘Qaɛ d ict!
Am wenni iǧan břa řɛib am wenni iǧan d aɛeffan,
Netta ad ten iqḍa s tnayen idsen!’ ■
23 Mařa arekkuḍ ineqq deg ict n tecti,
xenni Netta istehezza zi řeqḍeɛ n řayas i imezdagen.
24 Tammurt ad temmewc deg ufus n uɛeffan.
Iɣembab n řquḍat nnes ittřeḥḥef asen.
Mařa war t iggi Netta, man wen xenni?
25 Deɣya x wenni ittazzřen aqa ttqeǧiqen wussan inu,
arewřen ɣar din, war twiřin řxar. ■
26 Kkin am tɣarruba n uɣanim,
am ugider iḥewwmen x zzardet.
27 Mařa nniɣ: ‘Ad ttuɣ acetci inu,
ad beddřeɣ aɣembub iceḍnen inu, ad ssfirnineɣ!’,
28 ammu i tteggʷedeɣ zi marra řeḥriq inu.
Necc ssneɣ Cek war zzayi tᵉttbarrid.
29 Necc d aɛeffan, mayemmi ssḥissifeɣ i walu?
30 Mařa ssirdeɣ s waman n wedfeř,
ad ssizedgeɣ ifassen inu s llixiya, ■
31 ɛad ad ayi tnetyed deg weḥfur,
ař d ayi ɣa iɛiff warruḍ inu.
32 Maɣar Netta war iǧi d bnadem am necc,
wenni xef zemmareɣ ad dd-arreɣ,
xmi nettaweḍ ɣar taddart n ccreɛ ak-d wayawya. ■
33 War din iǧi řɛadeř jar aneɣ,
wenni izemmaren ad issars afus nnes xaneɣ s tnayen idneɣ.
34 Ejj i-t ad xafi iksi aɛmud nnes,
war d ayi issnexřiɛ ɛad uhuddi nnes, ■
35 xenni ad ssiwřeɣ nhřa ma ad zzayes ggʷedeɣ,
maɣar necc war ǧiɣ ammu i yixef inu.