Ayub issiweř ak-d Bildad x lɣaraḍ n Arebbi s uweddeb
10
1 Ittɛiffi řeɛmar inu zi tudart inu, ad barrḥeɣ acetci inu ammu waha břa amnaɛ,
ad ssiwřeɣ ɣar tarzugi n řeɛmar inu.
2 Necc ad iniɣ i Arebbi: ‘War d ayi ttegg d aɛeffan,
scen ayi, mayemmi akidi tᵉttmenɣid.
3 Ma ɣarek řefḍeř aqa Cek tḥeṣṣared,
aqa tneṭṭareḍ řxedmet n ifassen nnek,
am tᵉttegged tafawt x ixarriṣen n iɛeffanen?
4 Ma ɣarek tiṭṭawin n bnadem,
ma tᵉttwařid Cek am mammec ttwařan iwdan? □
5 Ma ussan nnek am wussan n bnadem?
Ma iseggʷusa nnek am iseggʷusa n weryaz,
6 aqa Cek tarezzud ammu x řmuɛṣiyyet inu,
tᵉttbeqqced di ddnub inu?
7 Waxxa Cek tessned aqa necc war ǧiɣ d aɛeffan,
waxxa amenni war din wenni i ɣa ifekken zeg ufus nnek.
8 Ifassen nnek xeřqen ayi-dd, ggin ayi,
aqa ttennḍen ayi, uca řexxu Cek tṣarḍed ayi.
9 Ɛqeř aqa Cek teggid ayi am tarrist,
u ɣar uactɛejjact texsed ad ayi tarred. ■
10 Ma war d ayi tzeǧɛed am uɣi,
am kisu tejjid ayi ad ccreɣ? ■
11 S teřmect d weysum tessyarḍed ayi,
s ixsan d iẓewran temmuded ayi.
12 Tudart d tmexsiwt icuwwaren tewcid ayi tt,
aḥeṭṭu nnek iḥḍa buḥbeř inu.
13 Txemmřed ta maca deg wuř nnek,
necc ssneɣ belli aya tuɣa-t ɣarek di řbař.
14 Mařa xḍiɣ, Cek ad ayi teḥḍid,
war d ayi tᵉttbarrid zi řmuɛṣiyyet inu.
15 Mařa ggiɣ řɣar, uct xafi!
Mařa necc d amsegged i ǧiɣ, war zemmareɣ ad ssgeɛɛdeɣ azeǧif inu.
Jjiwneɣ s řefḍiḥet, ttaciɣ ak-d řemḥayen inu.
16 Mařa ssgeɛɛdeɣ ixef inu, ad ayi tneymared am wayrad izehharen,
tesscaned xafi acuwwar n řeɛjeb n jjhed nnek řebda. ■
17 Maɛlik ufiɣ ad xafi tessbedded řebda icehhaden nneɣni,
uca ad tarnid ɛad deg weɣḍab nnek xafi,
iɛessasen i ixeǧfen ijj i wenneɣni řebda, wah ad ɣari ttnedhed ijj n řɛeskar.
18 Mayemmi i d ayi tejjid ad dd-ffɣeɣ zeg uɛeddis n yemma?
Mři ssuffɣeɣ buḥbeř, war d ayi tẓar uřa d ict n tiṭṭ!’ ■
19 Maɛlik ufiɣ axmi war iřiɣ ɛemmarṣ,
mmeksiɣ ɣar wenḍeř zeg uɛeddis n yemma.
20 Ma war ǧin wussan n tudart inu udrusen?
Mři d ayi ijja, ad xafi inneqřeb maḥend ad farheɣ cwayt ɛawed,
21 qbeř i ɣa uyureɣ, - war dikkwiřeɣ ɛad - ,
ɣar temmurt n taǧest d tiři n řmewt,
22 ɣar temmurt d tabarcant am tmeddit,
am tiři n řmewt, war din ittbin walu,
mani tegga tfawt am tmeddit.