Řḥarḍ amezwaru n Ṣufar
11
1 Xenni yarra-dd Ṣufar, wenni dd-yusin zi Naɛma, inna: 2 Ma ad qqimen waṭṭas n wawařen břa tamwarrit,
u ma ad ɣares yiři i yijj n bu-uqemmum, řḥeqq řebda?
3 Ma izemmar řhard nnek ad issɣed iwdan,
ařami tzemmared ad testehzid břa ma cek isseḥcem uřa d ijj?
4 Cek tennid: ‘Teṣfa tɣuri inu,
necc aqa ayi d amezdag di tiṭṭawin nnek!’
5 Uh, mři Arebbi simant nnes issawař,
mři yarezzem iyencicen nnes qibač nnek.
6 Mři Netta d ac i ɣa isscen timesřayin ixemmřen n tiɣit,
maɣar nitenti sekkwant ddubel i ufekki.
Ssen, aqa Arebbi ad ittu aṭṭas n řmuɛṣiyyet nnek di tizi nnek.
7 Ma tzemmared ad tarzud di min yarzu Arebbi?
Ma tzemmared ad tessned min teɛna ṭṭbiɛet n Umzemmar x kuřci?
8 Aqa-tt tuɛřa x ujenna! Min texsed ad din tegged?
Tuǧeɣ x řaxart! Min tzemmared ad zzayes tessned?
9 Řeɛbar nnes d azirar x temmurt,
d miriw x řebḥar.
10 Mařa iɛdu, ibelleɛ uca iřaɣa i ddeɛwet,
man wen i t ɣa issbedden?
11 Maɣar Netta issen iɣeccacen,
ittwařa řɣecc břa ma t iḥḍa. ■
12 Maca mařa abuhaři izemmar ad yaf řefhamet,
xenni aɣyuř n řexřa izemmar ad idweř d bnadem. ■
13 Mařa cek tɛedřed uř nnek,
xenni bezzeɛ ifassen nnek ɣares.
14 Mařa irṣeq řɣecc ɣar ufus nnek, saggʷej i-t,
war ttejji ddeǧ ad izdeɣ di tqidunin nnek,
15 maɣar xenni tzemmared ad tessgeɛɛded udem nnek břa řɛib,
ad tbedded nican, war tteggʷeded ca.
16 Maɣar ad tᵉttud řeɣben nnek,
u ɛemmarṣ war dayes tᵉttxemmimed ɛad,
am ɛemmarṣ war tᵉttxemmimed ɛad ɣar waman iɛddun.
17 Abrid n tudart nnek ad yarɣ
tiwa x ṭṭḥa n uziř,
waxxa din taǧest, ad tiři am teffut. ■
18 Ad tacid ixef nnek di řaman, minzi aqa din řayas,
ad texzared deg wenneḍ, ad tᵉṭṭsed di řhudnet. ■
19 Ad tezzřed, nhřa ma cek issnexřeɛ uřa d ijj,
uca aṭṭas i cek i ɣa zawgen zzat i wudem nnek. ■
20 Maca tiṭṭawin n iɛeffanen ad ddarɣřent,
qaɛ tarewřa ad asen tweddar,
ad meẓren ad deřqen i buḥbeř. ■