145
1 Izři n uṣebbeḥ n Dawud. Alif. A, AREBBI inu, Ajeǧid, necc ad Cek ssɛuǧeɣ,
ad barkeɣ Isem nnek i řebda qaɛ.
2 Bit. Kuř ass ad Cek barkeɣ,
ad ssemɣareɣ Isem nnek i řebda qaɛ.
3 Gimel. SIDI d ameqqran u Netta issdiheǧ asemɣar aṭṭas.
Řemɣaret nnes war dayes bu tarezzut. ■
4 Dalit. Jjiř awarni jjiř ad issemɣar řexdayem nnek,
ad barrḥen s tmegga nnek timeqqranin. ■
5 Hi. Necc ad ssiwřeɣ x tessiqt n uɛuǧi n lɛaḍama nnek,
x řexbar n lmuɛjizat nnek. □
6 Waw. Nitni ad ssiwřen x jjhed n tmegga nnek issaggʷaden,
u necc ad barrḥeɣ s řemɣaret nnek.
7 Zayin. Řidaret n tcuni nnek ifeyyḍen ggin tt am ijj n řɛunṣar ittcurcur,
ad sřiwřiwen i tsegda nnek. ■
8 Xit. SIDI d arḥim d aḥnin,
ɣares ttasiɛ n řxaḍar d waṭṭas n tmexsiwt icewwaren. ■
9 Tit. SIDI d aṣebḥan i marra,
arreḥmet nnes aqa-tt sennej i marra timegga nnes.
10 Yud. Marra timegga nnek, a SIDI, ad Cek qadin,
imtiqqan nnek ad Cek barken.
11 Kaf. Nitni ad ssiwřen x uɛuǧi n Tgeldit nnek,
u ad idaren timegga nnek timeqqranin,
12 Lamid. ḥima ad barrḥen s tmegga nnes timeqqranin i tarwa n bnadem,
uřa s uɛuǧi n lɛaḍama n Tgeldit nnes.
13 Mim. Tageldit nnek d ict n Tgeldit i marra ikuden,
řeḥkamet nnek ad tiři x kuř jjiř.
14 Samix. SIDI ittɣemmed marra inni iwḍan,
ittseggem marra inni iqwisen.
15 Ɛayin. Marra tiṭṭawin ttrajant Cek,
Cek tᵉtticed asen macca di řweqt nsen nican. ■
16 Pi. Cek tarezzmed afus nnek,
tessyawaned marra min iddaren ak-d min ixs řxaḍar nsen.
17 Tsadi. SIDI aqa-t nican di marra ibriden nnes,
ittegg s tmexsiwt icewwaren di marra timegga nnes.
18 Quf. SIDI yudes i marra inni xas ittřaɣan,
marra inni xas ittřaɣan di tidett.
19 Rix. Netta igga s řxaḍar i marra inni t itteggʷden,
ittesřa iɣuyyan nsen u issenjam i-ten.
20 Cin. SIDI iḥeṭṭa x marra inni t ittexsen,
maca marra iɛeffanen itteḥḥa i-ten.
21 Taw. Aqemmum inu ad issiweř x uṣebbeḥ n SIDI,
marra ddat ad ibarek Isem nnes iqeddsen,
i řebda qaɛ.