1 Azehhed n Dawud.

A SIDI, seř i tẓaǧit inu, sḥess i uzaweg inu.

Arr-dd xafi ɛlaḥsab tidett nnek, ɛlaḥsab tasegda nnek.

2 War ttegg ccreɛ ak-d umsexxar nnek,

maɣar uřa d ijj zeg inni iddaren ad yiři d amsegged zzat i wudem nnek. ^■  

3 Minzi řeɛdu iḍeffar řeɛmar inu,

iɛeffes x tudart inu ɣar temmurt,

issrusa ayi deg imucan n taǧest,

am yenni immuten zi mecḥař uya.

4 Buḥbeř inu ittefciř xafi,

uř inu yarewweɛ di daxeř inu.

5 Necc ttɛeqřeɣ x wussan iɛdun,

ttxemmameɣ di marra timegga nnek,

ttxarrṣeɣ di řefɛayeř n ifassen nnek. ^■  

6 Necc ttbezzɛeɣ ifassen inu ɣarek,

řeɛmar inu aqa-t zzatek am ict n temmurt iffuden. Silah.

7 Arr-dd xafi deɣya, a SIDI, buḥbeř inu ittefciř,

war ssnuffara udem nnek zzayi,

maḥend war ddikkwiřeɣ am yenni dd-ihekkwan deg weḥfur n wenḍeř.

8 Ejj ayi ad sřeɣ i tmexsiwt nnek icewwaren ɣar teffut,

maɣar ttecřeɣ xak.

Scen ayi abrid i ɣa uyureɣ,

maɣar ssgeɛɛdeɣ řeɛmar inu ɣarek. ^■  

9 A SIDI, kkes ayi-dd i řɛedyan inu,

ɣarek i dd-arewřeɣ.

10 Seřmed ayi ad ggeɣ min iǧan i arḍa nnek, maɣar Cek d AREBBI inu.

Ejj Arruḥ nnek iṣebḥen ad ayi indeh deg ict n temmurt iwaṭan.

11 A SIDI, arr-dd dayi tudart di ṭṭweɛ n Yisem nnek.

S tsegda nnek, suffeɣ řeɛmar inu zi řeḥṣaret,

12 areddeǧ řɛedyan inu di tmexsiwt nnek icewwaren,

qḍa x marra inni d ayi iḥeṣṣaren,

maɣar necc d umsexxar nnek. ^■