1 Axemmi n Dawud.

Taẓaǧit umi t tuɣa deg yefri.

2 S tmijja inu sɣuyyeɣ ɣar SIDI,

s tmijja inu ḥeccmeɣ SIDI.

3 Necc ttzeǧaɛeɣ ifeqquṣen inu zzat i wudem nnes,

ssargbeɣ as řeḥṣaret inu zzat i wudem nnes.

4 Mařa buḥbeř inu idqeř xafi aṭṭas, Cek tessned amesruq inu.

Nitni ssnuffaren ayi ijj n řfex deg webrid nni di ggur ad uyureɣ. ^■  

5 Sweḍ ɣar ufusi, u xzar, war din tuɣi ḥed i d ayi ɣa iwcen taynit,

ittwakkes ayi qaɛ mani i ɣa arewřeɣ,

war din tuɣi uřa d ijj i ɣa isseqsan x řeɛmar inu.

6 Necc sɣuyyuɣ-dd ɣarek, a SIDI. Qqareɣ:

“Cek d amcan inu n tarewřa,

tasɣart inu di temmurt n yinni iddaren.^■  

7 Ḥḍa x uɣuyyi inu, maɣar fniɣ qaɛ.

Fekk ayi zeg inni d ayi iḍeffaren,

maɣar nitni jehden xafi. ^■  

8 Suffeɣ řeɛmar inu zi řeḥbes maḥend ad qadiɣ Isem nnek.

Imseggaden ad ayi dd-nnḍen,

maɣar Cek tᵉttegged dayi s tcuni.”