1 Azehhed n Dawud.

A SIDI, necc ttřaɣiɣ ɣarek, deɣyat ɣari,

seř ɣar tmijja inu xmi dd xak i ɣa ttřaɣiɣ.

2 Iři ad tbedd tẓaǧit inu am řebxur ittfuḥen zzat i wudem nnek,

uřa d asgeɛɛed n ifassen inu am tewhibt n tmeddit. ^■  

3 A SIDI, egg ijj n uɛessas ɣar uqemmum inu,

ḥḍa tawwart n iyencicen inu.

4 Egg aqa uř inu war ittnejbid ɣar ict n tmesřact d taɛeffant,

maḥend ad ggeɣ timegga s řɣecc ak-d iryazen nni itteggen řmuɛṣiyyet,

egg aqa necc war ttᵉtteɣ zi tazyuḍi nsen.

5 Ejj amsegged ad ayi iwwet, maɣar aya d tamexsiwt icewwaren,

mařa netta ittsegged ayi, aya d zzect x uzeǧif inu,

ad tt iqbeř uzeǧif inu,

maɣar ammu taẓaǧit inu ɛad ḍidd i tmegga nsen iɛeffnen. ^□  

6 Řquḍat nsen mmenḍaren swadday x uɣezdis n jjarf,

aqa sřin belli awařen inu iḍarfen.

7 Axmi tᵉttwacarrez u tennurzem temmurt,

ammu i ttwazeǧɛen ixsan nneɣ ɣar uqemmum n řaxart. ^■  

8 Maca tiṭṭawin inu xezzarent-i-dd ɣarek, a SIDI, Sidi inu,

necc ttecřeɣ xak, war ttejji řeɛmar inu d aɛaryan.

9 Siggʷej ayi i wemnaɛ n řfex i d ayi nedyen,

zi txecfin n yinni itteggen řmuɛṣiyyet.

10 Iři iɛeffanen ad wḍan marra di traccawin nsen,

min ɣa kkeɣ ɛedduɣ.