1 I umeqqran n imeɣnajen. Azehhed n Dawud.

2 Fekk ayi zeg iɛeffanen, a SIDI,

ḥḍa ayi zeg iryazen n lɛunf,

3 inni ittxarrṣen deg wuř nsen di řɣar,

u ssekkaren imenɣan di marra ussan.

4 Nitni ssqeḍɛen iřsawen nsen am yijj n ufiɣar,

ssem iḥma aqa-t sadu iyencicen nsen. Silah. ^■  

5 Ḥḍa xafi, a SIDI, zeg ifassen n iɛeffanen,

ssar ayi zeg iryazen n lɛunf, inni yarezzun ad ayi ɣeḍřen ɣar temmurt. ^□  

6 Ayt n bu-nnfaxet ssnuffaren xafi ijj n řfex,

ttbezzaɛen tiseɣwin am ict n tracca ɣar uɣezdis n webrid,

aqa tteggen ayi tixefcin. Silah. ^■  

7 Necc nniɣ i SIDI: “Cek d Arebbi inu!”

Seř, a SIDI, ɣar tmijja n uzaweg inu.

8 A SIDI, Sidi inu, jjehd n usenjem inu,

deř azeǧif inu deg wass n řḥess n řesnaḥ.

9 A SIDI, war ttejji aɛeffan ad yarr meẓri.

War ttegg ttasiɛ i wenway nnes iɛeffnen,

uca ad ssɛuǧen ixef nsen. Silah.

10 X uzeǧif n marra inni d ayi dd-innḍen,

iři ad ten ideř uceqqef n iyencicen nsen,

11 ejj ad xasen kebben řefḥem itteḥduduqen,

iři Netta ad ten iɣḍer di tmessi, di řḥemřat yuǧɣen,

ḥima war ttekkaren ɛad.

12 Ejj aryaz i iceqqfen s yiřes war ittɣimi ibedd x temmurt,

iři aryaz bu-řexcunet, aqa ad ittwaɛarn s řɣar i igga

ař i ɣa iwḍa deɣya di texceft.

13 Necc ssneɣ, aqa SIDI ad isseqfeř ddeɛwet n řmusakin,

řḥeqq n imezřaḍ.

14 S tidett, imseggaden ad qadan Isem nnek,

inni igguren nican ad zemmaren ad qqimen bedden zzat i wudem nnek.