139
1 I umeqqran n imeɣnajen. N Dawud. Azehhed. A SIDI, Cek tbeqqced ayi u tessned ayi.
2 Cek tessned aɣimi inu d ubeddi inu,
zi řaggʷaj tfehhmed ixarriṣen inu.
3 Xmi ggureɣ u xmi ṭṭṣeɣ tarezzud dayi,
aqa Cek tessned marra ibriden inu.
4 Minzi war din uřa d ijj n wawař x yiřes inu,
u xzar, Cek a SIDI, tessned t kuřci.
5 Cek tḥeṣṣared ayi zi ḍeffar u zi zzat,
tessarsed xafi tařeqqa n ufus nnek.
6 Tussna aya d atebhet i necc,
tuɛřa xafi, war zemmareɣ ad tt awḍeɣ.
7 Ɣar mani zemmareɣ ad raḥeɣ zi Arruḥ nnek,
ɣar mani i ɣa arewřeɣ zeg wudem nnek?
8 Mařa geɛɛdeɣ ɣar ujenna, aqa Cek dinni,
mařa ggiɣ řaxart d tassut inu,
xzar, aqa Cek uřa dinni, ■
9 Mařa ksiɣ afriwen am tfawt n řefjar,
ad zedɣeɣ ɣar uneggar qaɛ n řebḥar, □
10 xenni uřa dinni ad ayi indeh ufus nnek,
afus nnek afusi ad ayi iṭṭef.
11 Mařa nniɣ: “Iwa taǧest, wḍa-dd xafi,
xenni ǧiřet d tfawt i d ayi iquwwaren.
12 I Cek taǧest war teǧi d ṭṭřam,
i Cek ǧiřet tᵉttegg tfawt am uziř,
i Cek taǧest aqa-tt am tfawt.
13 Minzi Cek txeřqed-dd tiẓẓař inu,
tmuded ayi deg uɛeddis n yemma.
14 Qadiɣ Cek umi dd-ttwaxeřqeɣ zeg ict n tebridt n řeɛjeb d tameqqrant.
Timegga nnek d lmuɛjizat, řeɛmar inu tessen t mliḥ qaɛ.
15 Ixsan inu tuɣa war xafek nnuffaren,
umi ttwaggeɣ di tnuffra,
ttwamudeɣ am ijj n uburḍa di řaǧaɣ n temmurt. ■
16 Tiṭṭawin nnek ẓrint abeddu inu iḍefṣen.
Deg wedlis nnek ittwannḍen aqa marra yuran,
aqa ussan i tuɣa ttwarecmen meřmi tuɣa ɛad war iǧi uřa d ijjen zzaysen.
17 Mammec ɣari ttɛizzan ixarriṣen nnek, a Arebbi,
mammec imɣar ubarru nsen!
18 Mařa xseɣ ad ten ḥesbeɣ, aqa aten ktar aṭṭas zeg yejdi,
u xmi faqeɣ, aqa ayi ɛad akidek.
19 A Arebbi, meɛlik i ɣa tenɣed xenni aɛeffan,
maɛlik i ɣa tejjed iryazen i issazzařen idammen ad xafi aggʷejjen,
20 inni xak issawařen s tḥraymect,
řɛedyan nnek inni ineṭṭqen Isem nnek di řbaṭeř.
21 A SIDI, ma war carrheɣ inni Cek icarrhen,
u ma war ttɛiffeɣ inni akidek ittemɛařan?
22 Necc carrheɣ ten ijj n wecrah ikmeř,
aqa nitni dewřen ayi d řɛedyan.
23 Arzu xafi, a Arebbi, ssen uř inu,
qeǧeb ayi u ssen ixarriṣen inu. ■
24 Xzar-dd, ma aqa ayi di ca n webrid n řeqjaḥet
u ndeh ayi ɣar webrid n řebda.