1 N Dawud.

Ad Cek qadiɣ s marra uř inu,

ad Cek zehhdeɣ zzat i irebbiten.

2 Ad aḍareɣ ɣar Zzawect nnek Tameqqrant iqeddsen,

ad qadiɣ Isem nnek x tmexsiwt nnek icewwaren u x řaman nnek,

maɣar Cek tessemɣared awař nnek x marra Isem nnek.

3 Deg wass řami xak dd-řaɣiɣ, tarrid-dd xafi,

Cek tewcid jjehd i řeɛmar inu.

4 Marra ijeǧiden n temmurt ad Cek qadan, a SIDI,

xmi ttesřan awařen zeg uqemmum nnek.

5 Ad ɣennjen x ibriden n SIDI,

maɣar aɛuǧi n SIDI d ameqqran.

6 Maɣar waxxa ittwassuɛřa SIDI aṭṭas,

ɛad ixezzar-dd ɣar umwaḍeɛ,

maca bu-nnfaxet issen i-t zi řaggʷaj. ^■  

7 Mařa uyureɣ di řwest n řeḥṣaret, ad ayi dd-tᵉttarred ɣar tudart.

Cek tesswiẓẓḍed afus nnek ḍidd i weɣḍab n řɛedyan inu,

afus nnek afusi issenjem ayi.

8 SIDI ad t ikemmeř i necc.

A SIDI, tamexsiwt nnek icewwaren aqa-tt i řebda,

řefɛayeř n ifassen nnek war ten tarexxud.