119
1 Alif. Sseɛd nsen i yinni ikemmřen abrid n tudart nsen břa řɛib, inni igguren x webrid n Ccariɛa n SIDI. ■
2 Sseɛd nsen i yinni iḥeṭṭan cchadat nnes,
inni xas yarezzun s marra uř nsen.
3 Nitni war tteggen řɣecc,
maca gguren deg ibriden nnes.
4 A SIDI, cek tumared
maḥend bnadem ad iḥḍa tiweṣṣa nnek nican.
5 Mři qaɛ ibriden inu ttwaseggden,
maḥend ad ḥḍiɣ tiweṣṣa nnek,
6 xenni ɛemmarṣ ad seḍḥiɣ
mařa xezzareɣ ɣar marra tiweṣṣa nnek.
7 S wuř iqqur ad Cek qadiɣ,
mařa necc řemdeɣ řeḥkamat nnek iseggden.
8 Ad ḥḍiɣ tiweṣṣa nnek!
War dayi semmeḥ marra!
9 Bit. Mammec i ɣa issizdeg ijj n ubřiɣ abrid nnes?
S wemnaɛ nnes deg wawař nnek.
10 Necc arezzuɣ xak s wuř inu marra,
war d ayi ttejji ad ffɣeɣ x řumurat nnek.
11 Min teqqared Cek, xemmřeɣ t deg wuř inu,
maḥend war kidek xeṭṭiɣ.
12 Tettwabarked Cek, a SIDI,
seřmed ayi tiweṣṣa nnek.
13 S iyencicen inu barrḥeɣ
marra lfarayiḍ n uqemmum nnek.
14 Aqa farḥeɣ s webrid n cchadat nnek,
am x marra min iǧan iɣřa.
15 Ad xarrṣeɣ di řumurat nnek,
ad xezzareɣ ɣar imesraq nnek.
16 Necc ḍaffareɣ tiweṣṣa nnek,
awař nnek war t tᵉttuɣ.
17 Gimel. Egg tcuni i umsexxar nnek,
maḥend ad ddareɣ u ad ḥḍiɣ awař nnek. ■
18 Arzem ayi tiṭṭawin inu,
ḥima ad ẓareɣ lmuɛjizat n Ccariɛa nnek.
19 Necc aqa ayi d abarrani x temmurt,
war xafi teffar řumurat nnek. ■
20 Řeɛmar inu ittwafna,
s uweḥḥec ɣar lfarayiḍ nnek.
21 Cek tɛaqbed imɛeffaren ittwaneɛřen,
inni itteffɣen x řumurat nnek.
22 Ksi xafi řefḍiḥet d useḥqar,
maɣar ḥḍiɣ cchadat nnek.
23 Uřa d řḥukkam qqimen, ssawařen ak-d wayawya xafi,
maca amsexxar nnek ittxarreṣ di tweṣṣa nnek.
24 Cchadat nnek d meẓri inu,
aqa-tent d imcawaren inu. ■
25 Dalit. Řeɛmar inu iřṣeq ɣar tɛejjajt,
arr-dd dayi tudart ɛlaḥsab awař nnek.
26 Necc neɛmeɣ i Cek x ibriden inu u Cek testajbed ayi.
Seřmed ayi tiweṣṣa nnek. ■
27 Arr ayi ad fehmeɣ abrid n řumurat nnek,
ad xarrṣeɣ di lmuɛjizat nnek.
28 Řeɛmar inu ifsi s wecḍan,
seggem ayi ɣar webrid n wawař nnek.
29 Siggʷej ayi x webrid n ixarriqen,
ḥinn xafi s Ccariɛa nnek.
30 Necc ixḍareɣ abrid n tidett,
ssarseɣ lfarayiḍ nnek zzati.
31 Necc cebbareɣ di cchadat nnek, a SIDI,
war d ayi ttejji ad seḍḥiɣ.
32 Necc ad ḍfareɣ abrid n řumurat nnek,
maɣar Cek teggid ttasiɛ i wuř inu.
33 Hi. A SIDI! seřmed ayi abrid n tweṣṣa nnek,
xenni necc ad dayes ṭṭfeɣ ař aneggar.
34 Ewc ayi řefhamet, xenni necc ad ḥḍiɣ Ccariɛa nnek,
u ad dayes ṭṭfeɣ s wuř inu marra.
35 Ndeh ayi x webrid n řumurat nnek,
minzi farrḥeɣ zzayes.
36 Arr uř inu ɣar cchadat nnek,
war iǧi ɣar ṭṭmeɛ n arbeḥ.
37 Sheyyeḍ tiṭṭawin inu x řbaṭeř,
arr-dd dayi tudart s ibriden nnek.
38 Ḍmen min tennid i umsexxar nnek,
wenni Cek itteggʷden.
39 Sḥeyyeḍ xafi řefḍiḥet i zi tteggʷedeɣ,
maɣar lfarayiḍ nnek cnant.
40 Xzar, ttweḥḥceɣ řumurat nnek,
arr ayi ddareɣ s tsegda nnek.
41 Waw. Ejj ad ɣari dd-tas tmexsiwt nnek icewwaren, a SIDI,
asenjem nnek aqa-t am mammec i tennid Cek.
42 ḥima zemmareɣ ad arreɣ x wenni zzayi issbehdařen,
maɣar ttecřeɣ x wawař nnek.
43 War ttekkes awař n tidett qaɛ zeg uqemmum inu,
maɣar ttrajiɣ lfarayiḍ nnek.
44 Necc ad ḥḍiɣ Ccariɛa nnek břa qeṭṭu,
i řebda qaɛ.
45 Necc ggureɣ di ttasiɛ,
maɣar arzuɣ x řumurat nnek.
46 Ad ssiwřeɣ x cchadat nnek zzat i ijeǧiden,
war zzatsen ttseḍḥiɣ ca.
47 Ad arreɣ meẓri di řumurat nnek,
tinni i ttexseɣ.
48 Necc ad ksiɣ ifassen inu
qibař i řumurat nnek, tinni i ttexseɣ,
ad xarrṣeɣ di tweṣṣa nnek.
49 Zayin. Ɛqeř x wawař i tennid i umsexxar nnek,
min xef tuyřed asitem inu.
50 D wa d afewwej inu x řemḥayen inu,
maɣar lwaɛd nnek yarra-dd dayi tudart.
51 Imɛeffaren ḥeccen ayi-dd awař ař ṭṭarf,
maca necc war ḥeyyideɣ ca x Ccariɛa nnek.
52 Necc xarrṣeɣ di lfarayiḍ nnek n řebda, a SIDI,
xenni aqa ttwafewwjeɣ.
53 Tafqeḥt tᵉṭṭef ayi di ssibbet n iɛeffanen,
inni isemmḥen di Ccariɛa nnek.
54 Tiweṣṣa nnek tuɣa atent d izřan inu,
di taddart n tbarranect inu.
55 Di ǧiřet tuɣa ttxarrṣeɣ deg Yisem nnek, a SIDI,
u ḥḍiɣ Ccariɛa nnek. ■
56 Ammu i d ayi imsar,
maɣar ḥḍiɣ řumurat nnek.
57 Xit. SIDI d tasɣart inu,
necc nniɣ ad ḥḍiɣ awařen nnek.
58 Ḥeccmeɣ zzat i wudem nnek s marra wuř inu,
ḥinn xafi am mammec i d ayi tennid.
59 Necc xarrṣeɣ deg ibriden inu,
ad ssɛeqbeɣ iṣuraf n iḍaren inu ɣar cchadat nnek.
60 Necc qeǧqeɣ, war ɛeṭṭařeɣ ca,
ḥima ad ḥḍiɣ řumurat nnek.
61 Iseɣwan n iɛeffanen carrfen ayi,
maca war ttᵉttuɣ Ccariɛa nnek.
62 Ɣar wezyen n ǧiřet ttnekkareɣ,
ḥima ad Cek qadiɣ x lfarayiḍ nnek iseggden.
63 Necc d ameddukkeř n marra inni Cek itteggʷeden,
n yinni iḥeṭṭan řumurat nnek.
64 Zi tmexsiwt nnek icewwaren teccur temmurt marra, a SIDI,
seřmed ayi tiweṣṣa nnek.
65 Tit. Cek teggid s tcuni i umsexxar nnek, a SIDI,
ɛlaḥsab awař nnek.
66 Seřmed ayi maḥend ad meyyzeɣ u ad ssneɣ mliḥ,
minzi ttecřeɣ x řumurat nnek.
67 Qbeř ma ttwaḥṣareɣ, weddareɣ,
maca řexxu ḥeṭṭiɣ min teqqared Cek.
68 Cek d aṣebḥan u tᵉttegged min iṣebḥen,
seřmed ayi tiweṣṣa nnek.
69 Imɛeffaren arexxun-dd xafi ixarriqen,
maca necc ḥeṭṭiɣ řumurat nnek s marra uř inu.
70 Uř nsen war ittacan am tadunt,
maca necc, aqa Ccariɛa nnek ttafeɣ dayes meẓri.
71 Tuɣa i necc mliḥ umi ttwaḥṣareɣ,
maɣar ammu i řemdeɣ tiweṣṣa nnek.
72 Ccariɛa zeg uqemmum nnek ɣari iḥřa aṭṭas
x wařaf n uqiyyat n wureɣ niɣ n nnuqart. ■
73 Yud. Ifassen nnek ggin ayi, kewwnen ayi.
Ewc ayi řeɛqeř, maḥend ad řemdeɣ řumurat nnek. ■
74 Inni Cek itteggʷeden ad ayi ẓaren uca ad farḥen,
maɣar ttrajiɣ awař nnek.
75 Necc ssneɣ, a SIDI, aqa seggdent řeḥkamat nnek,
u aqa Cek teḥṣared ayi s řaman.
76 Ejj ad tiři tmexsiwt nnek icewwaren d afewwej i necc,
am mammec i tennid i umsexxar nnek.
77 Ad xafi dd-tas arreḥmet nnek,
maḥend ad ddareɣ, maɣar Ccariɛa nnek dayes meẓri inu.
78 Ejj ad sseḍḥan imɛeffaren,
maɣar s ixarriqen ssfarrɣen ayi ṣṣifet inu,
maca necc txemmameɣ di řumurat nnek.
79 Ejj ad ɣari dd-dewřen inni Cek itteggʷeden,
inni issnen cchadat nnek.
80 Ejj ad yiři uř inu imun ɣar tweṣṣa nnek,
ḥima war ttseḍḥiɣ ca.
81 Kaf. Řeɛmar inu isxef zi meẓri ɣar usenjem nnek,
aqa ttrajiɣ awař nnek.
82 Tiṭṭawin inu deqqřent zi meẓri ɣar min teqqared Cek,
umi nniɣ: ‘Meřmi i xafi i ɣa tessfewwjed?’
83 Maɣar dewřeɣ am ict n txancet n yiřem tuyeř di ddexxan,
maca tiweṣṣa nnek war tent ttuɣ.
84 Mecḥař n wussan ɛad i iqqimen i umsexxar nnek?
Meřmi i ɣa tcarrɛed inni d ayi iḍeffaren?
85 Imɛeffaren ɣzan ayi iḥufar,
min war dd-yusin ak-d Ccariɛa nnek.
86 Marra řumurat nnek d tidett.
Nitni ḍeffaren ayi-dd s ixarriqen, ewc ayi afus!
87 Ɛřaḥař iři aqa teḥḥan ayi zi temmurt,
maca necc war ḥeyydeɣ x řumurat nnek.
88 Arr-dd dayi tudart ɛlaḥsab tamexsiwt nnek icewwaren,
xenni ad ḥḍiɣ cchadet i dd-iffɣen zeg uqemmum nnek.
89 Lamid. A SIDI, awař nnek ittɣima i řebda imten deg ujenna.
90 Tamexsiwt nnek icewwaren tiweḍ zi jjiř ař jjiř.
Cek teggid tammurt ad tbedd temten u ammu i ɣa teqqim tbedd. ■
91 Ɛlaḥsab lfarayiḍ nnek ad qqiment beddent,
maɣar marra nitenti d imsexxaren nnek.
92 Mři war teǧi Ccariɛa nnek d meẓri inu,
iři ttwahellkeɣ di řeḥṣaret inu.
93 Ɛemmarṣ ad ttuɣ řumurat nnek i řebda,
maɣar zzaysent tarrid-dd ayi tudart.
94 Necc aqa ayi i Cek, senjem ayi,
minzi arzuɣ x řumurat nnek.
95 Iɛeffanen rajan ayi ḥima ad ayi teḥḥan,
maca necc xezzareɣ ɣar cchadat nnek.
96 Necc ẓriɣ aqa marra min teǧa řekmaret ɣares aneggar,
maca řumur nnek ɣares ttasiɛ aṭṭas.
97 Mim. Mammec i xafi tɛizz Ccariɛa nnek,
ass ikmeř ttxarrṣeɣ dayes.
98 S řumurat nnek tarrid ayi d amiɣis x řɛedyan inu,
maɣar aqa aten ɣari i řebda.
99 Necc ɣari řeɛqeř ktar x marra imseřmaden inu,
maɣar ttxarrṣeɣ deg ibriden nnek.
100 Necc ɣari řefhamet ktar x iwessura,
maɣar ḥḍiɣ řumurat nnek.
101 Menɛeɣ iḍaren inu zi qaɛ ibriden iɛeffanen,
ḥima ad ḥḍiɣ awař nnek.
102 Necc war ḥeyydeɣ ca x lfarayiḍ nnek,
maɣar Cek d wenni d ayi issɣaren.
103 Mammec i ɣa yiři d miẓid min teqqared Cek i waneɣ inu,
x tamment i uqemmum inu! ■
104 Zi řumurat nnek ttarriɣ-dd řeɛqeř,
s uyenni carrheɣ kuř amesruq n ixarriqen.
105 Nun. Awař nnek d řefnar i uḍar inu
d tafawt i umesruq inu.
106 Necc jjuǧeɣ u xseɣ ad tt ssqefřeɣ,
aqa ad ḥḍiɣ marra lfarayiḍ nnek iseggden. ■
107 Necc ttwaḥṣareɣ aṭṭas, a SIDI,
arr-dd dayi tudart ɛlaḥsab awař nnek.
108 Ttzawgeɣ, ksi tiwhibin n řxaḍar zeg uqemmum inu, a SIDI,
u seřmed ayi lfarayiḍ nnek.
109 Tudart inu aqa-t řebda di lxaṭer,
maca ɛemmarṣ ad ttuɣ Ccariɛa nnek.
110 Iɛeffanen ggin ayi ijj n řfex,
maca necc war ffɣeɣ ca x řumurat nnek.
111 Cchadat nnek d tasɣart inu i řebda,
maɣar nitenti ssfarrḥent uř inu.
112 Ḥezzmeɣ uř inu maḥend ad ggeɣ ɛlaḥsab tiweṣṣa nnek,
i řebda, ař aneggar.
113 Samix. Ayt n tnayen n iɣembab carrheɣ ten,
maca ttexseɣ Ccariɛa nnek.
114 Cek d adurri inu d taseddart n useřqi inu,
necc ttrajiɣ awař nnek.
115 Beɛɛed xafi, a iɛeffanen,
ḥima ad ḥḍiɣ řumurat n AREBBI inu.
116 Senned ayi ɛlaḥsab lwaɛd nnek,
maḥend ad ddareɣ u war ttseḍḥiɣ di řayas inu.
117 Ɛemmed ayi, xenni ad ttwasnejmeɣ,
u ad arreɣ meẓri di tweṣṣa nnek řebda.
118 Marra inni ittaggʷejen x tweṣṣa nnek, sseḥqareɣ ten,
maɣar řɣecc nsen mɣir d ixarriqen.
119 Am kuffu tmeḥḥid marra iɛeffanen zi temmurt,
s uyenni ttexseɣ cchadat nnek.
120 Zi tiggʷudi zzayek teccirruw arrimet inu,
ammu i ggʷedeɣ zi řeḥkamat nnek.
121 Ɛayin. Necc ggiɣ řḥeqq d tsegda,
war d ayi ttsellem i řmargeḥ n yenni d ayi iḥeṣṣaren.
122 Egg řɛarbun di ṭṭweɛ n umsexxar nnek,
war ttejji imɛeffaren ad ayi ḥṣaren.
123 Tiṭṭawin inu deqqřent zi meẓri ɣar usenjem nnek,
ɣar lwaɛd n tsegda nnek.
124 Egg s tmexsiwt nnek icewwaren ak-d umsexxar nnek,
seřmed ayi tiweṣṣa nnek.
125 Necc d amsexxar nnek, ewc ayi řeɛqeř,
maḥend ad ssneɣ cchadat nnek.
126 Aqa yiweḍ as-dd řḥař i SIDI ḥima ad ibedd x iḍaren nnes,
maɣar nitni arẓin Ccariɛa nnek.
127 S uyenni ttexseɣ tiweṣṣa nnek x wureɣ,
wah aṭṭas x wureɣ ittwaṣeffan.
128 S uyenni ḥesbeɣ marra řumurat nnek di kuř tamesřact nican,
maca carheɣ kuř amesruq n ixarriqen.
129 Pi. Cchadat nnek d lmuɛjizat,
s uyenni iḥeṭṭa tent wuř inu.
130 Anurzem n wawařen nnek isscan tafawt,
i iḥafiyyen ittic asen řeɛqeř. ■
131 Arzmeɣ aqemmum inu aṭṭas,
u ssaḥrateɣ zi meẓri ɣar řumurat nnek.
132 Arr udem nnek ɣari u ḥinn xafi,
am mammec dd-tekkar i yenni ittexsen Isem nnek.
133 Semten iṣuraf inu am mammec i d ayi tennid,
war ttejji ad xafi iḥkem řɣecc.
134 Fekk ayi zi řeḥṣaret n iwdan,
maḥend ad ḥḍiɣ řumurat nnek.
135 Ejj udem nnek ad yarɣ x umsexxar nnek,
seřmed ayi tiweṣṣa nnek. ■
136 Tiɣezratin n waman hwant-i-dd zi tiṭṭawin inu,
maɣar nitni war ḥeṭṭan Ccariɛa nnek.
137 Tsadi. Aqa Cek d amsegged, a SIDI,
uřa d lfarayiḍ nnek seggdent.
138 Cek tumured tasegda n cchadat nnek,
řmanet nsen d tameqqrant aṭṭas.
139 Asem inu ihellek ayi,
maɣar inni d ayi iḥeṣṣaren ttun awařen nnek.
140 Lwaɛd nnek iqqur aṭṭas,
amsexxar nnek ittexs i-t. ■
141 Necc d amuqřiř u ttwaseḥqareɣ,
maca war ttᵉttuɣ řumurat nnek.
142 Tasegda nnek d ict n tsegda i řebda,
Ccariɛa nnek d tidett.
143 Ddiqet d teggʷudi řeqqfent ayi,
maca řumurat nnek daysent meẓri inu.
144 Tasegda n cchadat nnek i řebda i teǧa.
Sefhem ayi tent, xenni ad ddareɣ.
145 Quf. Řaɣiɣ s marra uř inu, arr-dd xafi, a SIDI,
xenni ad ḥḍiɣ tiweṣṣa nnek.
146 Necc řaɣiɣ-dd xak, fekk ayi,
xenni ad ḥḍiɣ marra cchadat nnek.
147 Qbeř tuffut tuɣa ttřaɣiɣ ḥima ad ayi dd-tewced afus,
rajiɣ awař nnek. ■
148 Tiṭṭawin inu faqent qbeř řweqt n wuḍuf n wecbar,
ḥima ad xarrṣeɣ di min teqqared. ■
149 Seř-dd ɣar tmijja inu ɛlaḥsab tamexsiwt nnek icewwaren, a SIDI,
arr-dd dayi tudart ɛlaḥsab lfarayiḍ nnek.
150 Inni yarezzun ad ggen řefḍayeḥ udsen ayi,
aqa nitni ggʷejen aṭṭas x Ccariɛa nnek.
151 Cek tudsed, a SIDI,
marra řumurat nnek d tidett i ǧan.
152 Uřa d aṭṭas zeg wami tuɣa ssneɣ cchadat nnek,
maɣar Cek teggid tent i řebda.
153 Rix. Xzar ɣar řeɣben inu u tessnejmed ayi,
maɣar war ttuɣ Ccariɛa nnek.
154 Aɣ ayi tasɣart uca fekk ayi,
arr-dd dayi tudart am mammec i d ayi tennid.
155 Iggʷej usenjem x iɛeffanen,
maɣar war arezzun tiweṣṣa nnek.
156 A SIDI, arreḥmet nnek d aṭṭas,
arr-dd dayi tudart ɛlaḥsab lfarayiḍ n nnek.
157 Inni d ayi ittdarracen d yenni d ayi iḥeṣṣaren aqa aten s waṭṭas,
maca necc war ḥeyydeɣ ca x cchadat nnek.
158 Ẓriɣ inni d ayi iɣdaren uca ɛiffeɣ ten,
maɣar nitni war ṭṭifen deg wawař nnek.
159 Xzar, mammec ttexseɣ řumurat nnek, a SIDI,
arr-dd dayi tudart ɛlaḥsab tamexsiwt nnek icewwaren.
160 Beddu n wawař nnek aqa-t d tidett,
kuř řeḥkam iseggden zzayek aqa-t i řebda.
161 Cin. Řḥukkam darrcen xafi x walu,
maca uř inu tuɣa itteggʷed zeg wawař nnek.
162 Necc farḥeɣ x lwaɛd nnek,
amecnaw ijjen i ittaf ict n tkeccaḍt tameqqrant.
163 Necc carrheɣ axarriq u ɛiffeɣ t,
maca ttexseɣ Ccariɛa nnek.
164 Sebɛa n twařawin deg wass ṣebḥeɣ Cek,
x řeḥkamat n tsegda nnek.
165 Inni ittexsen Ccariɛa nnek, aqa ɣarsen řehna tameqqrant,
war din aẓru n uneqraḍ zzatsen.
166 A SIDI, ttrajiɣ asenjem nnek,
u tteggeɣ ɛlaḥṣab tiweṣṣa nnek.
167 Řeɛmar inu iḥeṭṭa cchadat nnek,
ttexseɣ tent aṭṭas.
168 Necc ḥeṭṭiɣ řumurat nnek d cchadat nnek,
maɣar marra ibriden inu arzmen zzatek.
169 Taw. A SIDI, ejj ad ɣarek dd-yaweḍ uřaɣi inu zzat i wudem nnek,
ewc ayi řeɛqeř ɛlaḥsab awař nnek.
170 Ejj ad dd-yas uḥeccem inu ɣar wudem nnek,
senjem ayi am mammec i d ayi tennid.
171 Iyencicen inu ad ucruren aṣebbeḥ am ijj n řɛunṣar,
maɣar Cek tesseřmaded ayi tiweṣṣa nnek.
172 Iřes inu ad yarr min tennid Cek,
maɣar marra řumurat nnek seggden.
173 Ejj afus nnek ad ayi igg twiza,
maɣar ixḍareɣ řumurat nnek.
174 A SIDI, ttmeẓreɣ ɣar usenjem nnek,
Ccariɛa nnek aqa dayes meẓri inu.
175 Ejj řeɛmar inu ad iddar, ad Cek iṣebbeḥ,
ad ayi ɛawnent lfarayiḍ nnek.
176 Necc weddareɣ am ijj n uhuři iweddaren.
Arzu x umsexxar nnek, maɣar war ttuɣ řumurat nnek. ■