118
1 Qadam SIDI, maɣar Netta d aṣebḥan, maɣar tamexsiwt nnes icewwaren tᵉttɣima i řebda.
2 Ejj Israil ad yini:
“Tamexsiwt nnes icewwaren tᵉttɣima i řebda.”
3 Ejj taddart n Harun ad tini
“Tamexsiwt nnes icewwaren tᵉttɣima i řebda.”
4 Ejj inni itteggʷeden SIDI ad inin:
“Tamexsiwt nnes icewwaren tᵉttɣima i řebda.”
5 Di řeḥṣaret řaɣiɣ ɣar SIDi.
SIDi yarra-dd xafi umi iwca ayi ttasiɛ.
6 SIDI aqa-t akidi, war tteggʷedeɣ ca,
maɣar min izemmar bnadem ad ayi igg? ■
7 SIDI aqa-t akidi jar yenni d ayi iwcin afus.
Necc ad xezzareɣ ɣar swadday x yenni d ayi icarrhen.
8 Iḥřa ad arzuɣ dduri ɣar SIDI,
x utecři x bnadem. ■
9 Iḥřa ad arzuɣ dduri ɣar SIDI,
x utecři x tarwa n taṣiřet.
10 Marra řegnus nnḍen ayi-dd.
Necc ɣeḍřeɣ ten s Yisem n SIDI.
11 Nnḍen ayi-dd, wah, quwwaren ayi.
Necc ɣeḍřeɣ ten s Yisem n SIDI.
12 Nitni nnḍen ayi am tzizwa,
aqa amecnaw timessi n isennanen xesyen.
Necc ɣeḍřeɣ ten s Yisem n SIDI.
13 Cek tɛarned ayi s řeqsaḥet ařami ggur ad wḍiɣ,
maca SIDI iwca ayi afus.
14 SIDi d jjehd inu d azehhed inu,
Netta idweř ayi d asenjem.
15 Deg iqiḍan n imseggaden ittwaseř řḥess n usřiwřew d usenjem.
Afus afusi n SIDI igga s jjehd.
16 Afus afusi n SIDI ittwasgeɛɛed,
afus afusi n SIDI igga s wemḥaḍ. ■
17 Necc war tmettiɣ ca, ad ddareɣ,
ad barrḥeɣ timegga n SIDi.
18 SIDi iwebbex ayi aṭṭas,
maca war d ayi iwci i řmewt.
19 Arzmem ayi tiwwura n tsegda,
ad zzaysent adfeɣ, ad qadiɣ SIDi.
20 Ta d tawwart n SIDI,
imseggaden ad zzayes adfen.
21 Necc ad ac qadiɣ umi d ayi tesřid,
tdewřed ayi d asenjem.
22 Aẓru i war xsen ibennayen,
idweř d ixef n teɣmart. ■
23 Aya ittwagg zi SIDI,
u man aya d řeɛjeb di tiṭṭawin nneɣ.
24 Wa d ass i igga SIDI,
ejj aneɣ ad narceq u ad dayes nfarḥ.
25 A SIDI, awi-dd asenjem,
a SIDI, awi-dd afřaḥ.
26 D amimun wenni dd ɣa yasen s Yisem n SIDI!
Neccin ad kenniw nbarek zi Taddart n SIDI.
27 Arebbi d SIDI nni d aneɣ iggin tafawt.
Qnem taɣarṣt n řɛid s iseɣwan ɣar waccawen n uɛalṭar, řmedbeḥ n wecmaḍ.
28 Cek d Arebbi inu, s uya ad Cek qadiɣ,
a AREBBI inu, ad Cek ssɛuǧeɣ.
29 Qadam SIDI, maɣar Netta d aṣebḥan,
maɣar tamexsiwt nnes icewwaren tᵉttɣima i řebda.