109
1 I umeqqran n imeɣnajen. Azehhed n Dawud. A AREBBI n uṣebbeḥ inu, war sɣidi!
2 Maɣar aqemmum n ijj n uɛeffan,
aqa aqemmum iccur s ixarriqen innurzem xafi.
Nitni ssawařen akidi s yijj n yiřes issxarriqen.
3 Nnḍen ayi-dd s wawařen iccuren s wecrah,
ttmenɣan akidi x walu. ■
4 I twarrit x tmexsiwt inu kkaren nitni ḍidd inu,
u necc kessiɣ s řmeɛruf.
5 Nitni xeǧṣen ayi řxar s řɣar,
tamexsiwt inu s wecrah.
6 Egg xas ijj n uɛeffan,
ejj cciṭan ad ibedd ɣar uɣezdis nnes.
7 Mařa xas carrɛen, ad iffeɣ am ijj n uqṭaṭɛi,
uca uřa d taẓaǧit nnes ad tiři d ddenb. ■
8 Ad dewřen ussan nnes udrusen waha,
ejj wenneɣni ad iṭṭef řfusina nnes.
9 Ad dewřen iḥenjiren nnes d iyujiřen,
tamɣart nnes d tajjač.
10 Ad tellɛen iḥenjiren nnes da d diha, ad ttaren,
ad arzun x macca jar řxirbat nsen.
11 Ad ittar bu-umarwas marra min ɣares,
ad keccḍen ibarraniyyen řɣiǧet n warber nnes.
12 War ɣares ittiři uřa d ijjen wenni d as i ɣa iggin s tmexsiwt icewwaren,
ejj uřa d ijj ad iḥinn x iyujiřen nnes.
13 Ad ttwateḥḥan tarwa nnes awarni as,
ad ittwamḥa isem nsen di jjiř i dd ɣa yasen.
14 Ad yidar SIDI řmuɛṣiyyet n ibabaten nnes,
ɛemmarṣ war imeḥḥi ddenb n yemmas.
15 Iři ad bedden řebda qibač i SIDI,
ejj i-t ad ikkes řidaret nsen x temmurt. ■
16 Maɣar netta war iɛqiř ḥima ad yegg s tmexsiwt icewwaren,
maca imarret řmeskin d umezřuḍ,
uřa d wenni umi ittwarẓ wuř, ḥima ad t ineɣ.
17 Netta tuɣa ittexs nneɛřet,
xenni ejj i-tt ad xas tewḍa,
u umi war ifarḥ s lbaraka,
ejj i-tt ad xas tiggʷej.
18 Umi yarḍ nneɛřet am warruḍ nnes,
ejj i-tt ad tadef xenni am waman ɣar daxeř nnes,
am zzect deg ixsan nnes.
19 Ejj ad tiři nneɛřet nni am warruḍ i di ittřeḥḥef,
am webyas i ibekkes řebda.
20 Ta d řmunet n SIDI i iɣrimen inu,
i yenni issawařen řɣar x řeɛmar inu.
21 Maca Cek, a SIDI, Sidi inu,
egg dayi am mammec texsed di ṭṭweɛ n Yisem nnek,
maɣar tamexsiwt nnek icewwaren d taṣebḥant,
senjem ayi.
22 Maɣar necc di řeɣben u zeřḍeɣ,
uř inu ittwasnuqqeb ɣar daxeř deg idmaren inu.
23 Amecnaw ict n tiři izzuggarten qeṭṭiɣ,
zřuzan ayi am yict n tmurɣi.
24 Ifadden inu ttarjijin s uẓummi,
arrimet inu ittxeṣṣa i-t tadunt.
25 Necc dewřeɣ asen d ict n řqecɛet n useḥqar.
Mařa ẓrin ayi, ssenhezzan azeǧif nsen.
26 Ewc ayi afus, a SIDI, AREBBI inu,
senjem ayi ɛlaḥṣab tamexsiwt nnek icewwaren,
27 ḥima ad ssnen aqa d man aya d afus nnek,
aqa Cek i iggin man aya, a SIDI.
28 Nitni d yenni ineɛɛřen, maca Cek ad tbarked,
nitni ttɣewwɣen, ad dewřen ttseḍḥan
maca amsexxar nnek ad ifarḥ.
29 Ejj iɣrimen inu ad yarḍen s řefḍiḥet,
ad řeḥḥfen deg useḍḥi am deg ijj n useřham.
30 Zeg wuř inu ad qadiɣ SIDI s uqemmum inu,
ad t ssemɣareɣ jar waṭṭas.
31 Maɣar Netta ad ibedd ak-d umezřuḍ ɣar ufus nnes afusi,
ḥima ad t issenjem zeg inni iḥekkmen x řeɛmar nnes.