1 Izři. Azehhed n Dawud.

2 A AREBBI, uř inu iɛewweř,

ad ɣennjeɣ ad zehhdeɣ, wah uřa d aɛuǧi inu.

3 Faq, lharpa d řgambri!

Necc xseɣ ad ssfaqeɣ tafawt n řefjar.

4 Necc ad Cek qadiɣ jar řegnus, a SIDI,

ad ak zehhdeɣ jar ccuɛub.

5 Maɣar tamexsiwt nnek icewwaren tᵉttakkwaḍ tiwa i ijenwan,

řaman nnek ɣares ař iseynuten. ^■  

6 A AREBBI, sgeɛɛed ixef nnek tiwa i ijenwan,

arr aɛuǧi nnek x marra tammurt,

7 ḥima imɛizzen nnek ad ttwanejmen,

awi asenjem s ufus afusi nnek u arr-dd xaneɣ awař.

8 AREBBI tuɣa issawař di Zzawect nnes Iqeddsen,

s uyenni i ɣa negzeɣ s řefraḥet.

Necc ad bḍiɣ Cakim,

ad ɛebbareɣ taysart n Sukkut.

9 Jilɛad inu, Manassa inu,

Ifrayim d aseřqi ijehden n uzeǧif inu,

Yahuda d amgewwed inu.

10 Maca Mu’ab d ssarij inu n usird,

x Idum ad nḍareɣ tisiřa inu,

x temmurt n Filicit ad dduqqzeɣ s usřiwřew.

11 Wi d ayi ɣa inedhen di tendint ifaryen s iɣebrawen?

Wi d ayi ɣa igewwden ɣar Idum?

12 Ma war d aneɣ tenḍared, a AREBBI,

u ak-d řɛeskarat nneɣ ma zeɛma war dd-teffiɣed ɛad akidsen, a AREBBI? ^■  

13 Ewc aneɣ afus ḥima ad aneɣ tessnejmed zi řeḥṣaret,

maɣar asenjem s ufus n yijj n bnadem aqa ibḍeř.

14 Ak-d AREBBI ad negg s wemḥaḍ,

u Netta ad iɛfes x yenni d aneɣ iḥeṣṣaren.