ADLIS WISS XEMSA: IZEHHIDEN 107-150
107
1 Qadam SIDI, maɣar Netta d aṣebḥan, maɣar tamexsiwt nnes icewwaren tᵉttɣima i řebda.
2 Ejj inni ittwafdin zi SIDI ad ssiwřen ammu,
inni ifdi zeg ufus n yinni ten iḥeṣṣaren, □
3 inni issmun zi temmura,
zi ccarq, zi řɣarb, zi ccamal u zi řebḥar.
4 Tuɣa din inni iweddaren di řexřa,
abrid nsen ikka x tnezruft,
war ufin tandint maḥend ad dayes zedɣen.
5 Daysen řaẓ d ufadi,
řeɛmar nsen ifceř daysen.
6 Xenni sɣuyyen ɣar SIDI di řeḥṣaret nsen,
u Netta issenjem i-ten zi tiggʷudi nsen.
7 Netta indeh i-ten deg ijj n webrid isegged,
maḥend ad uyuren ɣar ict n tendint ḥima ad dayes zedɣen.
8 Ejj i-ten ad qadan SIDI x tmexsiwt nnes icewwaren,
x lmuɛjizat nnes i tarwa n bnadem.
9 Maɣar Netta issjjiwen řeɛmar iffuden,
řeɛmar iǧuẓen iccur i-t s řxar.
10 Tuɣa din inni iqqimen di taǧest d tiři n řmewt,
s iceddiyen n ddeǧ d wuzzař,
11 maɣar ɣewwɣen ak-d wawařen n Arebbi,
war sřin ɣar ccwar n Umɛuǧi x kuřci.
12 Netta isseqneɛ uř nsen s tamara,
nnderfen war ufin wi ɣa iwcen afus.
13 Xenni řaɣan i SIDI di řeḥṣaret nsen,
u Netta issenjem i-ten zi tiggʷudi nsen.
14 Netta issuffeɣ i-ten zi taǧest u zi tiři n řmewt,
u yarẓa iceddiyen nsen.
15 Ejj i-ten ad qadan SIDI x tmexsiwt nnes icewwaren,
x lmuɛjizat nnes i tarwa n bnadem.
16 Maɣar Netta yarẓa tiwwura n nnḥas,
icarreg zzekrunat n wuzzař.
17 Tuɣa din ibuhařiyyen inni ittwaɣezzan,
zi ssibbet n uxeṭṭu nsen d n řmuɛṣiyyet nsen.
18 Iɛiff řeɛmar nsen zi marra macca,
iwḍen ař tewwura n řmewt.
19 Xenni řaɣan i SIDI di řeḥṣaret nsen,
u Netta issenjem i-ten zi tiggʷudi nsen.
20 Netta issekk awař nnes,
u issgenfa i-ten u issenjem i-ten zeg imeḍřan.
21 Ejj i-ten ad qadan SIDI x tmexsiwt nnes icewwaren,
x lmuɛjizat nnes i tarwa n bnadem.
22 Ejj i-ten ad awyen tiwhibin n uqadi,
ad barrḥen timegga nnes s usřiwřew. ■
23 Tuɣa din inni ihekkwan ɣar řebḥar s iɣarruba,
inni ixeddmen x waman iwesɛen. ■
24 Ẓrin min igga SIDI,
uřa d lmuɛjizat nnes di řaǧaɣ n řebḥar.
25 Mařa Netta issiweř,
ikkar-dd ijj n usemmiḍ,
nni issgeɛɛden řemwaj nnes.
26 Gaɛɛden ɣar ujenna,
uca hwan ɣar tisi n waman n řaǧaɣ.
Ifsi řeɛmar nsen zi tiggʷudi.
27 Meyyřen, meyyřem zi ssa ɣar da am umescar,
iweddar asen marra řeɛqeř nsen x min ɣa ggen.
28 Xenni řaɣan i SIDI di řeḥṣaret nsen,
u Netta issuffeɣ i-ten-dd zi tiggʷudi nsen.
29 Netta yarra asemmiḍ ad yars,
ařami dewřen řemwaj sseɣḍen.
30 Nitni farḥen umi arsin řemwaj,
u umi Netta indeh i-ten ɣar řmuyyi i ɣares tuɣa meẓren.
31 Ejj i-ten ad qadan SIDI x tmexsiwt nnes icewwaren,
x lmuɛjizat nnes i tarwa n bnadem,
32 ejj i-ten ad t ssɛuǧen deg wegraw n řgens,
ad t cennɛen di řḥeřqet n imɣaren.
33 Netta yarra iɣezran d řexřa,
řɛunṣarat yarra i-tent d tammurt iffuden,
34 tammurt i itticen řɣiǧet yarra i-tt d tameǧaḥt,
zi ssibbet n tuɛeffna n yinni dayes izeddɣen.
35 Netta yarra řexřa d ayeřmam n waman,
tammurt yuẓɣen d řɛunṣarat.■
36 Dinni i issezdeɣ inni iǧuẓen,
uca din ssbedden nitni ict n tendint maḥend ad dayes zedɣen.
37 Nitni zarrɛen deg iyyaren u tteẓẓun tizayarin deg imarjaɛen,
tinni dd-ittawyen igumma d řɣiǧet nsen.
38 Netta ibarek i-ten, ařami dewřen deg waṭṭas,
agřa n řmař nsen war ittwasemẓi.
39 Xenni maca dakkwařen nitni di drus ɛawed,
hekkwan ɣar řaǧaɣ zi ssibbet n řeḥṣaret d řɣar d wecḍan.
40 Netta ittkebba aseḥqar x tarwa n taṣiřet nsen,
ijja i-ten ttᵉtliɛen di řexřa mani war ǧin ibriden.
41 Issgeɛɛed-dd amezřuḍ zi řeɣben,
uca yarra řaǧat am tḥimarin n wuǧi. ■
42 Inni igguren nican ttwařan uca farrḥen,
maca marra ayt n řmuɛṣiyyet tteqqnen aqemmum nsen. ■
43 Wenni d amiɣis, ejj i-t ad iḥḍa,
ejj i-ten ad ssnen nican min ixs ad tini tmexsiwt icewwaren n SIDI.