106
1 Hallilu-Yah, qadam SIDI, maɣar Netta iṣbeḥ, maɣar tamexsiwt nnes icewwaren tᵉttɣima i řebda. ■
2 Wi izemmaren ad iḥaja timegga timeqqranin n SIDI,
ad ibarreḥ marra ccan nnes?
3 Sseɛd nsen i yinni iḥḍan řḥeqq,
sseɛd nnes i wenni itteggen řebda tasegda.
4 Ɛqeř xafi, a SIDI, s arḍa ɣar řgens nnek,
ɛahed ayi s usenjem nnek,
5 maḥend ad ẓareɣ řxar i yenni zzayek ittwafarzen,
maḥend ad farḥeɣ s řefraḥet n řgens nnek,
maḥend ad farḥeɣ s yixef inu jmiɛ ak-d tesɣart nnek.
6 Neccin nexḍa, jmiɛ ak-d ibabaten nneɣ,
negga řɣecc,
negga tuɛeffna. ■
7 Ibabaten nneɣ di Miṣra war fhimen i lmuɛjizat nnek,
war xarrṣen deg ufeyyeḍ n tmexsiwt nnek icewwaren,
maca ɣewwɣen ɣar řebḥar, ɣar Řebḥar n Telga. ■
8 Maca Netta issenjem i-ten di ṭṭweɛ n Yisem nnes,
ḥima ad tᵉttwassen řemɣaret nnes. ■
9 Netta iwebbex Řebḥar n Telga ařami idweř yuẓeɣ,
uca ijja i-ten ad kken x wudem n temmurt n waman yuǧɣen amecnaw di řexřa. ■
10 Netta ifekk i-ten zeg ufus n yinni i-ten icarrhen,
issenjem i-ten zeg ufus n řeɛdu.
11 Aman dřin inni ten iḥeṣṣaren,
war iqqim uřa d ijjen zzaysen. ■
12 Nitni ttecřen x wawařen nnes,
ṣebbḥen as s yijj n yezři n uṣebbeḥ. ■
13 Maca ttun deɣya timegga nnes,
war xsen ad rajan ɛad ccwar nnes.
14 Nitni dewřen ttmeɣɣřen aṭṭas di řexřa,
qeǧben Arebbi di tnezruft. ■
15 Xenni iwca asen min ttaren,
maca issemẓi řqedd n řeɛmur nsen. ■
16 Nitni dewřen usmen zi Musa di řmargeḥ n řɛeskar,
uřa zi Harun, amqeddes n SIDI. ■
17 Tammurt tennurzem, tṣarḍ Datan,
uca tenti abarru n Abiram. ■
18 Timessi tebda tecmeḍ jar ubarru nsen,
ijj n uceɛɛař n tmessi iqqed iɛeffanen nni. ■
19 Nitni ggin ijj n uyenduz ɣar Ḥurib,
uca uḍaren zzat i yijj n řexyař ifesyen. ■
20 Nitni beddřen aɛuǧi n SIDI
ak-d řexyař n ijj n ufunas i ittetten arrbiɛ.
21 Ttun Arebbi, Amsenjem nsen,
wenni tuɣa iggin timegga timeqqranin di Miṣra,
22 lmuɛjizat di temmurt n Ḥam,
timegga ssaggʷadent ɣar Řebḥar n Telga.
23 Inna aqa ad ten ikeḥḥeḍ,
mři war iǧi d Musa, wenni zzayes ittwafarzen,
ikkar-dd di txenduqt zzat i wudem nnes di ṭṭweɛ nsen,
maḥend ad issbeɛɛed asɛar nnes i zi ixs ad ten ihellek. ■
24 Nitni kksen taqcurt x temmurt iɛizzen,
war ttecřen ca x wawař nnes. ■
25 Nitni ndeqmen deg iqiḍan nsen,
war sřin ɣar tmijja n SIDI.
26 Netta issgeɛɛed afus nnes xasen,
ijjuǧ ad ten isseɣḍeř di řexřa, ■
27 maḥend ad isseɣḍeř tarwa nsen jar řegnus,
maḥend ad ten izeǧeɛ di temmura. ■
28 Nitni ssřeḥmen ixef nsen ɣar Baɛal-Faɣur,
ccin tiɣarṣa i imettan. ■
29 Sɛaren t s tmegga nsen,
ɣares ařami dd xasen tewḍa jjriḥect.
30 Xenni ikkar-dd Finaḥas, yusa-dd jar asen,
u ammu i tᵉttwasbedd jjriḥect.
31 Aya ittwaḥseb as-dd d tasegda,
zi jjiř ař jjiř i řebda.
32 Nitni sɛaren afugem nnes ɣar waman n Mariba,
ařami igga Musa řɣar di ssibbet nsen, ■
33 maɣar ssarezgen řeɛmar nnes,
ɣares ařami iffeɣ wawař war iḍbiɛen zeg iyencicen nnes.
34 Nitni war teḥḥan řegnus
i xef i d asen inna SIDI ittxeṣṣa ad ten teḥḥan.
35 Maca ṣṣuren ixef nsen ak-d řegnus
řemden ad ggen min ggin nitni. ■
36 Nitni tuɣa ttsexxaren i řexyařat n ṣṣanam nsen,
inni d asen idewřen d taxceft.
37 Nitni iwyen iḥenjiren nsen d tḥenjirin nsen d taɣarṣt i ccwaṭen. ■
38 Nitni ssizzřen idammen imezdagen,
idammen n iḥenjiren nsen d tḥenjirin nsen,
nni iwyen d taɣarṣt i řexyařat n ṣṣanam n Kenɛan,
ařami tedweř temmurt tefsed s idammen. ■
39 Nitni dewřen xemjen zi tmegga nsen,
ssfesden ixef nsen s řexdayem nsen.
40 Yarɣa weɣḍab n SIDI x řgens nnes,
u Netta iɛiff tasɣart nnes.
41 Netta isellem i-ten ɣar ifassen n řegnus,
u inni ten icarrhen dewřen ttseǧaḍen xasen.
42 Ḥṣaren ten řɛedyan nsen,
nitni ttwaswaḍɛen sadu afus nsen.
43 Aṭṭas n twařawin tuɣa issenjam i-ten,
maca nitni ssarezgen xas s tɣennant nsen,
ttwasmeẓyen s řmuɛṣiyyet nsen.
44 Waxxa amenni Netta ixzar-dd ɛad ɣarsen umi ten tuɣa di řeḥṣaret,
umi isřa tɣuyyit nsen.
45 Yidar Řɛahd nnes di ṭṭweɛ nsen,
u indem zi ssibbet n tmexsiwt nnes icewwaren.
46 Isscen asen arreḥmet nnes,
zzat i wudem n marra inni ten iḥebbsen.
47 Senjem aneɣ, a SIDI, AREBBI,
ndeh aneɣ nmun zi řegnus,
ḥima ad nqada Isem amqeddas nnek,
ad Cek nṣebbeḥ s yezřan n usemɣar. ■
48 Ad ittwabarek SIDI, AREBBI n Israil,
zi řebda ař řebda!”
Ejj marra řgens ad yini: ‘Amin! Hallilu-Yah!’ ■