103
1 N Dawud. Barek SIDI, a řeɛmar inu,
d marra min dayi Isem nnes iqeddsen.
2 Barek SIDI, a řeɛmar inu,
war ttᵉttu ɛemmarṣ marra timegga nnes iṣebḥen.
3 Netta d wenni d ac iɣeffaren marra ddnub nnek,
wenni issgenfan marra řehřacat nnek,
4 wenni issenjamen tudart nnek zeg wenḍeř,
wenni xak iggin ijj n ttaj n tmexsiwt icewwaren d arreḥmet,
5 wenni issjjawanen aqemmum nnek s min iṣebḥen,
wenni ittarran temẓi nnek am ugider.
6 SIDI ittegg tasegda d řḥeqq
i marra inni ittwaḥeṣṣaren.
7 Netta isscen i Musa ibriden nnes,
i ayt n Israil timegga nnes.
8 SIDI d arḥim d aḥnin,
ɣares ttasiɛ n řxaḍar, iccur s tmexsiwt icewwaren. ■
9 Netta war ittemcubbuc i řebda,
war ittɣimi ittxeyyiq i řebda. ■
10 Netta war d aneɣ ittegg ɛlaḥsab ddnub nneɣ,
u war zzayneɣ ixeǧef ɛlaḥsab řmuɛṣiyyet nneɣ,
11 maɣar am ujenna yuɛřan x temmurt,
ammu i temɣar tmexsiwt nnes icewwaren
sennej i marra inni t itteggʷeden.
12 Am iggʷej ccarq x řɣarb,
ammu i issiggʷej Netta ixeṭṭan nneɣ xaneɣ.
13 Am mammec iḥinn ijj n tbabat x iḥenjiren nnes,
ammu i iḥinn SIDI x yenni t itteggʷeden.
14 Maɣar Netta issen mammec nettwagg,
iɛqeř aqa neccin d acař.
15 Ussan n bnadem amecnaw tuga,
netta ittnuwar amecnaw tanuwwact n yeyyar. ■
16 Mařa ikka-dd xas usemmiḍ, war teqqim,
u amcan mani tuɣa tbedd, war xas issin ɛad.
17 Maca tamexsiwt icewwaren n SIDI,
tᵉttɣima zi řebda ař řebda sennej i yenni t itteggʷeden,
u tasegda nnes tᵉttɣima i warraw n warraw,
18 i marra inni iḥeṭṭan Řɛahd nnes,
u iɛeqqřen x řumurat nnes maḥend ad zzaysen tteggen. ■
19 SIDI issbedd řɛarc nnes deg ujenna,
Tagelda nnes tḥekkem x marra min iǧan.
20 Barkent SIDI, kennint, lmalakat nnes,
ayt n bu-teɣruḍt imeḥḍen inni itteggen awař nnes,
inni ittesřan i tmijja n wawař nnes.
21 Barkent SIDI, marra řɛeskarat nnes,
kenniw, imsexxaren nnes, inni itteggen min d as yarecqen! ■
22 Barkem SIDI, a marra min ittwaggen s ufus nnes,
di mani ma i teǧa řeḥkamet nnes.
Barek SIDI, a řeɛmar inu.