102
1 Taẓaǧit n wenni iḥeṣṣaren mařa manayenni d aṭṭas xas, uca xenni ittfarreɣ imunas nnes zzat i SIDI.
2 A SIDI, seř ɣar tẓaǧit inu,
ejj aɣuyyi inu ad ɣarek dd-yaweḍ.
3 War tteffar udem nnek xafi deg wass i di ttwaḥṣareɣ.
Arr-dd ɣari amezzuɣ nnek deg wass i di řaɣiɣ,
seř-dd xenni ɣari deɣya,
4 minzi ussan inu ɛdun am ddexxan,
ixsan inu am tefqunt icemḍen. ■
5 Uř inu ittisřaw u yuẓeɣ am arrbiɛ,
ařami ttuɣ ad cceɣ aɣrum inu.
6 Ixsan inu řeṣqen ɣar teřmect inu
zi ssibbet n uzehhar yuǧɣen inu.
7 Necc am ijj bu-uɛuqqi n ujḍiḍ di řexřa,
dewřeɣ am ijj n muka jar řxirbat.
8 Necc beddeɣ faqeɣ,
dewřeɣ am yijj n wejḍiḍ i iqqimen weḥḥdes x tzeqqa.
9 Řɛedyan inu ttekkwaren ayi ass marra.
Inni xafi ittɛeddan,
neɛɛřen am qqaren isem inu.
10 Maɣar ttᵉtteɣ iɣɣeḍ am weɣrum,
u xeǧḍeɣ tisessit inu s imeṭṭawen inu
11 zi ssibbet n wesxeḍ nnek d uduqqez n weɣḍab nnek,
maɣar Cek tessgeɛɛded ayi u tenḍared ayi ɛawed ɣar temmurt.
12 Ussan inu am ict n tiři izzuggarten,
u necc taẓɣeɣ am tuga.
13 Maca Cek, a SIDI, ad teqqimed i řebda,
zi jjiř ař jjiř ad dayek xarrṣen.
14 Cek ad tekkared ad tarḥmed x Ṣihyun,
maɣar aqa d řweqt maḥend ad xas tḥinned,
minzi řweqt ittwaggen aqa tiweḍ-dd.
15 Maɣar iẓra nnes usin-dd x řxaḍar n imsexxaren nnek
u nitni ksin s wesḥissef di tɛejjajt nsen.
16 Řegnus ad ggʷeden Isem n SIDI,
marra ijeǧiden n temmurt ad ggʷeden aɛuǧi nnek,
17 xmi i ɣa ibna SIDI Ṣihyun twařat nneɣnit,
ad dd-iban deg uɛuǧi nnes,
18 ad iřha ak-d tẓaǧit n umezřuḍ,
u war isseḥqara ca taẓaǧit nsen.
19 Man aya ad ittwari i jjiř i dd ɣa yasen,
řgens nni dd ɣa ittwaxeřqen,
ad iṣebbeḥ i SIDi,
20 maɣar Netta aqa issijj-dd zi Zzawect nnes Iqeddsen yuɛřan,
zeg ujenna ixzar-dd SIDI ɣar temmurt swadday
21 ḥima ad iseř anixsis n umeḥbus,
ḥima ad yarxu i yenni iǧan d tarwa n řmewt,
22 maḥend ad barrḥen s Yisem n SIDI di Ṣihyun,
d ccenɛet nnes di Urcalim,
23 xmi dinni i ɣa ttwasmunen řegnus,
jmiɛ ak-d tgeldiwin ḥima ad sexxarent i SIDI.
24 Netta issarxu jjehd inu ak-d webrid,
Netta issemẓi deg wussan inu.
25 Necc nniɣ: ‘War d ayi kessi deg wezyen n wussan n tudart inu, a Arebbi,
aqa iseggʷusa nnek ttɣiman zi jjiř ař jjiř.
26 Zeg wecḥař uya teggid dsas i temmurt,
ijenwan d řxedmet n ifassen nnek.
27 Ina ad fnan, maca Cek ad tdumed.
Nitni marra ad arcan am warruḍ,
Cek ad ten tbeddřed am ict n řeɛbayet,
ammu i ɣa ttwabeddřen.
28 Cek maca d Cek,
iseggʷusa nnek war qeṭṭin ɛemmarṣ.’
29 Iḥenjiren n imsexxaren nnek ad din zedɣen,
u tarwa nsen ad ttwasmetnen zzat i wudem nnek.