104
1 Barek SIDI, a řeɛmar inu! A SIDI, AREBBI inu, mammec d ameqqran Cek!
Cek tyarḍed s lɛaḍama d řɛezz.
2 Netta iřeḥḥef ixef nnes s tfawt amecnaw s ijj n upartessu,
Netta ittbezzeɛ ajenna am tjartiřt n uqiḍun. ■
3 Aqa Netta d wenni issarsen tḥenya n wesqef sadu ixxamen nnes x waman,
d wenni iggin iseynuten d akarru nnes,
d wenni igguren x wafriwen n usemmiḍ, ■
4 d wenni iggin lmalakat nnes am isemmiḍen,
u imsexxaren nnes d ict n tmessi itteḥduduqen. ■
5 Netta issbedd tammurt x dsusa nnes,
war ggur ad tenhezz ɛemmarṣ i řebda. ■
6 Cek třeḥḥfed as s waman yuẓɣen am s yijj n warruḍ,
aman bedden tiwa i idurar.
7 Nitni arewřen zeg usiggʷed nnek,
qeǧqen ad ffɣen zi tmijja n wajjaj nnek.
8 Ttwassgeɛɛden idurar, hekkwant teysarin,
deg wemcan i d asen teggid.
9 Cek teggid aymir i waman u war ggur ad t ɛdun,
war dd-dekkwiřen maḥend ad dřen tammurt.
10 Cek d wenni ineddhen tařawin di teɣzurin,
aqa ttazzřent din jar idurar.
11 Aqa warrdent marra řmař n yeyyar,
iɣyař n řexřa ttekksen afadi nsen zzaysent.
12 Ijḍaḍ n ujenna zeddɣen ɣar temmawin nsen,
zi jar řefruɛ tᵉttekk-dd tmijja nsen.
13 Netta aqa d wenni ittessun idurar zeg ixxamen nnes deg ujenna,
tammurt tᵉttyawan zi řɣiǧet i dd-iffɣen zi min teggid Cek. □
14 Netta igga arrbiɛ iɣemmi i řmar,
uřa d aɣemmuy di ṭṭweɛ n bnadem,
maḥend ad dd-yawi aɣrum zi temmurt
15 u binu nni issfarraḥen uř n bnadem.,
ařami iɣembab ad zzayes wessgen mahu zi zzect,
uřa d aɣrum nni issejhed uř n bnadem.
16 Ticejjura n SIDI ttyawanent,
ticejjura n tengelt n Lubnan nni iẓẓu Netta,
17 mani tteggen ijḍaḍ řɛucc nsen,
mani i teǧa taddart n ubellarj di tcejjura n umerzi. □
18 Idurar yuɛřan aqa aten i iɣayḍen n tṣuḍar,
řejruf d amcan n tarewřa i ikawkawen n teṣḍart.
19 Netta igga taziri d řeɛbar i ikuden ittwaggen,
tafuct tessen meřmi i ɣa teɣři.
20 Cek tessekkid-dd taǧest u tewḍa-dd ǧiřet,
i di ttextutyen marra řewḥuc n wezɣar. □
21 Ayraden imeẓyanen zehharen x zzardet,
maḥend ad arzun x macca nsen zi Arebbi. ■
22 Mařa teffeɣ-dd xenni tfuct, ttecruruden ɣar řmargeḥ,
uca ttɣemmaren deg ifran nsen.
23 Xenni itteffeɣ bnadem ɣar řxedmet nnes,
ɣar tewwuri nnes ař tameddit.
24 Mammec aṭṭas i teggid, a SIDI,
s tiɣit i teggid marra timesřayin,
tammurt tᵉttwaccur s wagřa nnek.
25 Aqa din řebḥar imɣar, yiriw ɣar marra iɣezdisen nnes,
mani issfuffey marra s imuddaren imeqqranen d imeẓyanen, břa řeḥsab,
26 mani gguren iɣarruba,
‘Liviyatan’ nni teggid ḥima ad dayes ittirar.
27 Nitni marra ttrajan Cek,
ad asen tewced macca nsen di řweqt nnes. ■
28 Mařa tewcid asen, yarrwen nitni,
mařa tarzmed afus nnek,
ddakkwařen jjiwnen s řxar.
29 Mařa teffared udem nnek,
aqa ttnexřaɛen,
mařa tkessid asen nnefs,
ad ssuffɣen buḥbeř u ad dd-dewřen ɣar ucař nsen. ■
30 Mařa tessekked-dd Arruḥ nnek,
xenni ttwaxeřqen-dd nitni,
u ad tarrid aɣembub n temmurt d amaynu.
31 Aɛuǧi n SIDI ad yiři i řebda,
SIDI ad ifarḥ i marra min igga.
32 Mařa Netta ixezzar di temmurt, tᵉttarjiji,
mařa iḥada idurar, ad dduxxnen.
33 Necc xseɣ ad ɣennjeɣ i SIDI min ɣa kkeɣ ddareɣ,
ad zehhdeɣ i AREBBI inu min da i ɣa kkeɣ ǧiɣ. ■
34 Axemmem inu ad dd-yas x řxaḍar nnes,
ad farḥeɣ di SIDI.
35 Imednab ad ttwateḥḥan qaɛ zi temmurt,
iɛeffanen war ttiřin ɛad.
Barek SIDI, a řeɛmar inu. Hallilu-Yah!