1 SIDI iḥekkem,

ejj tammurt ad tfarḥ,

ad arecqent marra tegzirin. ^■  

2 Quwwaren as iseynuten d yijj n useynu ibbumbes,

tasegda d řḥeqq aqa aten d dsas n řɛarc nnes.

3 Timessi teggur as ɣar zzat n wudem nnes,

tqedd iɣrimen nnes i d as dd-ittennḍen.

4 Assamen nnes ssřaqqan ddunect,

tammurt tẓarr i-tt, tenhezza. ^■  

5 Idurar fessyen am ccmeɛ zzat i wudem n SIDI,

zzat i wudem n Sidi n marra tammurt.

6 Ijenwan ttbarrḥen tasegda nnes,

marra řegnus ttwařan aɛuǧi nnes. ^■  

7 Ejj ad sseḍḥan marra inni ittsexxaren i řexyařat ineqcen n ukeccuḍ,

marra inni ittcennɛen di l’aṣnam.

Aḍarem zzates kenniw, marra irebbiten!

8 Ṣihyun isřa, ifarḥ,

yessis n Yahuda arecqent,

zi ssibbet n řeḥkamat nnek, a SIDI.

9 Maɣar Cek, a SIDI, d Amɛuǧi x marra tammurt,

Cek d wenni yuɛřan qaɛ x marra irebbiten.

10 Kenniw i ittexsen SIDI, carhem řɣar.

Netta iḥeṭṭa x řeɛmur n imtiqqan nnes,

Netta issenjam i-ten zeg ufus n iɛeffanen. ^■  

11 Tafawt tᵉttwazarɛ i umsegged,

d řefraḥet i yenni ɣar iǧa uř iseggmen.

12 Kenniw imseggaden, farḥem zi SIDI,

qadam xmi tᵉttidarem taqeddast nnes.