1 Ɣennjem i SIDI ijj n yezři amaynu,

ɣennjem i SIDI, marra tammurt! ^■  

2 Ɣennjem i SIDI, barkem Isem nnes,

beccarem i usenjem nnes ass x wass.

3 Barrḥem aɛuǧi nnes jar řegnus,

řeɛjayeb nnes jar marra řegnus.

4 Maɣar SIDI d ameqqran u issdaḥeǧ asemɣar aṭṭas,

Netta d amsaggʷed mahu marra irebbiten.

5 Minzi marra irebbiten n řegnus aqa aten d l’aṣnam,

maca SIDI igga ijenwan.

6 Tissiqt d řɛezz ǧan zzat i wudem nnes,

jjehd d waẓri aqa aten di Zzawect nnes Iqeddsen.

7 Wcem i SIDI, a, tiqebbař n řegnus,

wcem i SIDI aɛuǧi d jjehd.

8 Wcem i SIDI aɛuǧi n Yisem nnes,

awyem-dd tawhibt u asem-dd ɣar řemraḥat nnes,

9 sejdem i SIDI s ucewwar iqeddsen,

arjijem zzat i wudem nnes, a marra tammurt! ^■  

10 Inim jar řegnus: “SIDI iḥekkem!”

Nican, řexxu ddunect tbedd temten, war ttenhezzi ɛad.

Netta ad iḥkem řegnus s řḥeqq.

11 Ejj ajenna ad ifarḥ u tammurt ad tarceq,

ejj ad izhar řebḥar d uɛemmar nnes,

12 ejj ad isřiwřiw yeyyar s řefraḥet s marra min dayes,

xenni ad sřiwřiwent marra tcejjura n wezɣar ^□  

13 zzat i wudem n SIDI, maɣar Netta ad dd-yas,

maɣar Netta ad dd-yas ḥima ad icarreɛ tammurt.

Netta ad icarreɛ ddunect s tsegda,

u řegnus s řḥeqq nnes. ^■