1 Asem-dd, ejj aneɣ ad nesřiwřew zzat i SIDI,

ejj aneɣ ad nedduqqez s usřiwřew i Teṣḍart n usenjem nneɣ.

2 Ejj aneɣ ad nades ɣar wudem nnes s uqadi,

ejj aneɣ ad as nesřiwřew s izehhiden.

3 Maɣar SIDI d ijj Arebbi d ameqqran,

ijj n Ujeǧid d ameqqran sennej i marra irebbiten.

4 Deg ufus nnes ǧan imucan yuǧɣen qaɛ n temmurt,

uřa d tiqiccatin n idurar aqa atent nnes.

5 Nnes řebḥar, maɣar ixřeq i-t-i-dd,

u ifassen nnes ggin uřa d řbar.

6 Asem-dd, ejj aneɣ ad nesjed, ad naḍar,

ejj aneɣ ad nesjed x ifadden zzat i SIDI, wenni d aneɣ iggin,

7 maɣar Netta d AREBBI nneɣ u neccin d řgens n tarewsa nnes,

uřa d uǧi n ufus nnes.

Mařa ass-a tseǧem ɣar tmijja nnes, ^■  

8 war sseqsiḥem ca uř nwem, am di Mariba,

am deg wass n Massa di řexřa, ^■  

9 mani tuɣa d ayi ttjarrben řejdud nwem,

qeǧben ayi,

waxxa tuɣa ẓrin řxedmet inu. ^■  

10 Arebɛin n iseggʷusa tuɣa ttɛiffeɣ jjiř-a, nniɣ:

“Aqa-ten d ijj n řgens s wuř iweddaren,

war ssinen ibriden inu.”^■  

11 S uyenni Necc jjuǧeɣ deg weɣḍab inu:

“Nitni war dd-ttidfen ɛemmarṣ di arraḥet inu!”