1 Wenni izeddɣen deg udurri n Umɛuǧi x kuřci,

aqa netta ad issens di tiři n Umzemmar x kuřci.

2 Ad iniɣ i SIDI: Cek d amcan inu n tarewřa d lburj inu,

AREBBI inu, wenni x ttecřeɣ!

3 Maɣar Netta ad cek ifekk zi texceft n ineymaren n ijḍaḍ,

zi ṭṭaɛun yareddǧen. ^■  

4 S arric nnes ad cek ideř,

sadu wafriwen nnes ad tafed adurri.

Řmanet nnes d taseddart tameqqrant d arruḍ n wuzzař. ^■  

5 War tᵉtteggʷeded ca zeg unexřiɛ n ǧiřet,

zi fřitca n řqews i din iṭṭawen s wass, ^■  

6 uřa zi ṭṭaɛun i dd-ittennḍen di taǧest,

zi lhalak i yareddǧen s uziř.

7 Waxxa ad wḍan ařef ɣar uɣezdis nnek,

u ɛecra ařef ɣar afus afusi nnek,

waxxa amenni war cek dd-ittikkʷiḍ.

8 Ad twařid aya s tiṭṭawin nnek waha,

ad tẓared mammec i ɣa ittwaxřef zeg iɛeffanen.

9 Maɣar xak: ‘Cek a SIDI, aqa Cek d amcan inu n tarewřa!’

Aqa cek teggid Amɛuǧi x kuřci d tazeddiɣt i yixef nnek,

10 war dayek tneṭṭeḥ tuɛeffna,

uřa d ict n jjriḥect war dd-tqarrab ca ɣar uqiḍun nnek,

11 maɣar Netta ad xak yumur lmalakat nnes,

maḥend ad cek ḥḍant di marra ibriden nnek. ^■  

12 Ad cek ksin x ifassen nsent,

ḥima aḍar nnek war ineggeḥ aẓru. ^■  

13 Ad tɛefsed x weyrad izehharen u x třefsa,

ad tɛejned x weyrad ameẓyan d řhaycet n řebḥar. ^■  

14 Umi dd-iqqen netta ɣari,

Necc ad t ssnejmeɣ.

Necc ad t ssgeɛɛdeɣ,

maɣar netta issen Isem inu.

15 Netta ad ayi iřaɣa u Necc ad xas dd-arreɣ.

Di řeḥṣaret aqa ayi ɣares.

Necc ad t fekkeɣ, ad as ssɛuǧeɣ.

16 Necc ad t ssjjiwneɣ ak-d tuzzeggart n wussan,

Necc ad as ssecneɣ asenjem inu.